Kain kain vailens bilong wok politik i kamap long olgeta hap bilong graun.

•   Ol man i kilim 39 lida bilong politik na ol narapela vailens i kamap long wok politik i bagarapim eleksen long Meksiko long 2023-2024.

•   I no longtaim i go pinis kain kain vailens bilong wok politik i kamap long Yurop, kain olsem ol i bin traim long sutim praim minista bilong Slovakia long gan long Me 15, 2024.

•   Ol manmeri long Amerika i kirap nogut long ol man i sut long gan bilong kilim foma presiden Donald Trump long Julai 13, 2024.

 Wai na i gat planti vailens bilong wok politik? Yu ting dispela hevi bai pinis? Baibel i tok wanem?

 Baibel i tok taim bilong yumi olsem “taim bilong las de” na i tok profet olsem planti manmeri bai kamapim vailens na ol bai i stap wanbel.

•   “Long taim bilong las de, taim nogut bai kamap na dispela bai givim hatwok long ol man. Ol man bai . . . i no tok tenkyu, ol bai i no stap gut long narapela, . . . ol bai i no laik kamap wanbel, . . . ol bai kamap wail olgeta, . . . ol bai birua long ol pren bilong ol, ol bai i gat strongpela het, ol bai pulap long pasin antap.”​—2 Timoti 3:1-4..

 Baibel i tok ol kain trabel olsem ol man bai bikhet na pait long gavman na ol kros pait bilong politik bai i go bikpela long dispela taim. (Luk 21:9) Tasol politik i no inap mekim olsem inap inap oltaim.

 Baibel i tok olsem God bai bagarapim ol gavman bilong ol man long graun na gavman bilong em long heven bai bosim graun.

•   “God bilong heven bai kamapim wanpela kingdom we . . . bai brukbrukim i go liklik liklik na pinisim olgeta [narapela] kingdom, na em wanpela tasol bai stap oltaim oltaim.”​—Daniel 2:44..

 Kingdom Bilong God bai mekim ol manmeri long olgeta hap bilong graun i kamap wanbel na ol bai stap bel isi.

•   King bilong gavman bilong heven, Jisas Krais, Baibel i kolim em olsem “Prins Bilong Bel Isi,” na em bai mekim ol samting bilong “bel isi bai i no gat pinis bilong en.”​—Aisaia 9:6, 7.

•   Long nau, ol manmeri husat i laik stap aninit long wok bos bilong em, ol i wok long lain long hau long i stap bel isi. Olsem na Baibel i tok: “Bai ol i paitim bainat bilong ol i kamap ain bilong brukim graun na paitim spia bilong ol i kamap naip bilong wokim gaden. Wanpela kantri i no inap apim bainat na pait long narapela kantri, na bai ol i no skul moa long pait.”​—Aisaia 2:3, 4.

 Bilong kisim sampela save moa, ritim atikol “Kingdom Bilong God Bai Mekim Wanem?” na watsim vidio Kingdom Bilong God Em Wanem Samting?