“Ekonomi bilong graun olgeta i laik bagarap, nau prais bilong kaikai na ol narapela samting i wok long i go antap hariap tru, na long wankain taim, ol man i no gat mani bilong baim samting.” Presiden bilong World Bank Group i mekim dispela tok lukaut long ripot bilong Jun 2022.

 “Prais bilong fiul na kaikai i go antap hariap tru, na dispela i nogutim tru ol manmeri i stap long ol kantri i stap rabis,” tok bilong lain International Monetary Fund.

 Baibel i helpim yumi long kliagut long as na yumi feisim kain hevi bilong ekonomi, so olsem wanem yumi ken karim dispela hevi, na wanem rot bilong pinisim dispela hevi.

•   Baibel i kolim haptaim yumi stap long en olsem “taim bilong las de.”​—2 Timoti 3:1.

•   Jisas i tok long dispela haptaim olsem “ol manmeri bai lukim ol samting i mekim ol i pret.” (Luk 21:11) Prais bilong ol samting i go antap na dispela i mekim ol manmeri i pret. Ol manmeri i wari long wanem samting bai painim ol long bihain na hau ol bai lukautim famili long kaikai na ol samting ol i nidim.

•   Buk Revelesen i bin tok profet long prais bilong kaikai bai go antap long dispela taim bilong yumi. “Mi harim samting olsem wanpela nek i toktok . . . na i tok: ‘Pe bilong 1 kwat wit . . . na pe bilong 3 kwat bali em inap long pe bilong wanpela de bilong wok.”​—Revelesen 6:6, ftn.

 Bilong kisim sampela save moa long “las de” na ol tok profet long Buk Revelesen, lukim vidio Kirap Long 1914 Ol Samting Long Dispela Graun i Senis na ritim atikol “Fopela Man Long Hos—Ol i Husat?”

•   “Ol bai wokim ol haus na stap long ol, na ol bai planim ol gaden wain na kaikai prut bilong ol. Ol i no inap wokim haus na narapela man i kam sindaun long en, na ol i no inap planim samting na ol narapela i kisim na kaikai.”​—Aisaia 65:21, 22.

•   “Bai i gat planti wit samting long graun; Na antap long ol maunten, ol wit samting bai pulap.”​—Buk Song 72:16.

•   “Jehova i tok olsem, ‘Ol manmeri em ol i mekim nogut long ol na ol i karim pen na hevi, na ol rabisman i krai i stap, mi bai helpim ol.’”​—Buk Song 12:5. a

 Klostu nau God bai pinisim hevi bilong ekonomi long olgeta hap bilong graun, na i no long wanpela kantri tasol. Bilong save long hau God bai mekim olsem, ritim atikol “Is a Fair Economic System Possible?”

 Tasol long nau yet, Baibel inap helpim yu long karim hevi taim prais bilong kaikai i go antap. Hau em i ken helpim yu? Em i gat gutpela edvais long hau yu ken yusim gut mani. (Provep 23:4, 5; Eklisiastis 7:12) Bilong kisim sampela save moa, ritim atikol “Lukautim Ol Samting Bilong Yu” na “How to Live on Less.”