Long olgeta hap bilong graun, wok politik i brukim lain insait long ol kantri. Long 2022, Pew Research Center i mekim wanpela sevei na ol i tok, “inap 65 pesen bilong ol man na meri i bikpela pinis long 19 narapela narapela kantri i tok i gat ol strongpela tok pait insait long kantri bilong ol namel long ol man i sapotim narapela narapela ol politikol pati.”

 Yu luksave olsem planti man moa long ples yu stap long en i no stap wanbel bikos long wok politik? Wai na i olsem? I gat rot bilong stretim dispela hevi? Lukim tok Baibel i mekim.

 Baibel i tok profet olsem long taim bilong yumi, em “taim bilong las de,” planti man bai i gat ol pasin we i mekim na i hatwok long ol man i stap wanbel.

•   “Long taim bilong las de, taim nogut bai kamap na dispela bai givim hatwok long ol man. Ol man bai laikim ol yet tasol, . . . ol bai i no laik kamap wanbel.”​—2 Timoti 3:1-3.

 Maski planti man i traim bes long kamapim gutpela sindaun, ol gavman i hatwok long bosim gut ol man. Tingting bilong ol man long ol samting i no wankain, olsem na i hatwok long ol i wok bung wantaim long stretim ol hevi. Ol dispela samting i kamap ol i stret wantaim tok Baibel i mekim longtaim i go pinis.

•   “Man i bin bosim man na i bringim hevi tasol long em.”​—Eklisiastis 8:9.

 Maski i olsem, Baibel i stori long rot bilong stretim ol hevi—em i stori long wanpela gavman em lida bilong en i ken pinisim ol hevi bilong nau.

 Baibel i stori long wanpela lida husat inap long stretim ol hevi long graun: Jisas Krais. Jisas i gat strong, namba, na em i gat laik long kamapim bel isi na pasin wanbel long olgeta manmeri.

•   “Taim em i stap yet, ol stretpela manmeri bai kamap gut olsem gras i gro gut, na . . . bel isi bai i pulap long olgeta hap.”​—Buk Song 72:7.

•   “Olgeta lain manmeri bai mekim wok bilong em.”​—Buk Song 72:11.

 Jisas em i gutpela lida bikos em i save tingim ol manmeri na em i gat laik long helpim ol, moa yet ol lain em ol narapela i no mekim pasin fea long ol.

•   “Em bai kisim bek ol rabisman i singaut long kisim helpim, na em bai helpim tu ol man i no gat nem na ol man i no gat wanpela bilong helpim ol. Em bai sori long ol man i no gat nem na ol rabisman, na em bai kisim bek ol man i stap rabis. . . . Em bai kisim bek ol long han bilong ol man i mekim nogut long ol na long ol man i pait na bagarapim ol.”​—Buk Song 72:12-14.

 Kisim sampela save moa long Kingdom Bilong God, em wanpela gavman long heven na Jisas em i lida bilong en. Kisim save long hau wok bos bilong dispela Kingdom i ken helpim yu na hau yu ken sapotim dispela Kingdom.

•   Watsim dispela vidio Kingdom Bilong God Em i Wanem Samting?

•   Ritim atikol “Kingdom Bilong God—Wanpela Gavman i No Gat Korapsen.”