Long Me 24, 2022, bikpela hevi i kamap long liklik taun bilong Uvalde, Texas, long Amerika. Nius The New York Times i tok: “Wanpela man i sut long gan na kilim i dai 19 pikinini na 2-pela tisa . . . long Robb Elementary School.”

 Sori tru, dispela kain bikpela hevi i save kamap planti taim. Nius USA Today i tok long Amerika tasol, “ i gat 249 taim ol man i sutim ol narapela long gan long ol skul long las yia—dispela i winim olgeta narapela taim kirap long yia 1970.”

 Wai na ol dispela kain bikpela hevi i kamap? Hau bai yu inap karim hevi bilong dispela kain pasin nogut? Yu ting pasin bilong pait na bagarapim narapela bai pinis? Baibel i kamapim ol bekim.

•    Baibel i kolim haptaim yumi stap long en olsem “taim bilong las de,” na planti man bai “i no gat pasin bilong laikim ol wanfamili,” na “ol bai kamap wail olgeta,” ol bai mekim ol pasin nogut tru na ol pait na kilim i dai ol narapela. Ol man i mekim ol dispela pasin “bai i go nogut moa.” (2 Timoti 3:1-5, 13) Bilong kisim sampela save moa, ritim atikol “Did the Bible Predict the Way People Think and Act Today?”

 Planti man i laik save, ‘Wai na God i no laik pasin ol bikpela hevi, olsem ol man i sutim narapela long gan long skul?’ Bilong lukim bekim bilong Baibel, ritim atikol “Wai na Hevi i Save Painim Ol Gutpela Man?”

•    “Olgeta tok ol i bin raitim long bipo, ol i bin raitim bilong skulim yumi. Dispela tok . .  . i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.”—Rom 15:4.

 Ol stiatok bilong Baibel bai helpim yu long karim hevi bilong pasin bilong pait na bagarapim man. Bilong kisim sampela save moa, lukim nius Awake!, nem bilong en “Will Violence Ever End?”

 Sapos papamama i laik helpim ol pikinini bilong karim hevi bilong ol nius we i pretim ol, ritim atikol “Disturbing News Reports and Your Children.”

•    “Em bai kisim bek ol long han bilong ol man i mekim nogut long ol na long ol man i pait na bagarapim ol.”—Buk Song 72:14.

•    “Bai ol i paitim bainat bilong ol i kamap ain bilong brukim graun Na paitim spia bilong ol i kamap naip bilong wokim gaden. Wanpela kantri i no inap apim bainat na pait long narapela kantri, na bai ol i no skul moa long pait.”—Maika 4:3.

 God bai mekim samting ol man i no inap long mekim. Kingdom bilong God long heven bai pinisim olgeta samting bilong pait na pasin bilong pait na bagarapim narapela. Bilong kisim sampela save moa long samting Kingdom Bilong God bai mekim, ritim atikol “Aninit Long Kingdom Bilong God ‘Bel Isi Bai i Pulap.’”