WAS I STAP!
Ol Saientis i Muvim Taim Bilong Graun Long Bagarap i Kam Fowed—Baibel i Tok Wanem?
Long Janueri 24, 2023, ol saientis i muvim han bilong klok long Taim Bilong Graun Long Bagarap a i kam klostu moa long 12 klok long biknait, em taim ol i tok long pinis bilong dispela graun bai kamap.
“Klok i soim ‘Taim Bilong Graun Long Bagarap’ we i makim bagarap bai painim ol manmeri i muv i kam klostu moa long 12 klok nait long Tunde taim woa i stap yet long Yukren, ol gavman i tok pait long sait bilong nuklia bom, na ol bikpela senis i kamap long klaimet.”—AFP International Text Wire.
“Long Tunde, ol saientis i tokaut olsem ‘Taim Bilong Graun Long Bagarap’ i muv i kam klostu moa inap 90 seken paslain long 12 klok long nait—ol man i stap klostu moa long armagedon winim bipo.”—ABC News.
“Sampela saientis long olgeta hap bilong graun i bung wantaim na tok lukaut olsem bikpela hevi i laik painim ol manmeri winim olgeta taim bipo.”—The Guardian.
Yu ting taim bilong ol manmeri na dispela graun bilong yumi long bagarap i wok long i kam klostu? Yu ting yumi mas pret long wanem samting bai kamap long bihain? Baibel i tok wanem?
Ol samting bai kamap long bihain
Baibel i tok, “graun i save stap oltaim oltaim” na bai i gat ol manmeri em ol “bai stap oltaim long en.” (Eklisiastis 1:4; Buk Song 37:29) So ol manmeri bai i no inap bagarapim graun bilong yumi o mekim samting na bai yumi no inap i stap long en, nogat.
Tasol Baibel i stori long pinis bai kamap. Olsem, em i tok “ol manmeri i stap longwe long God, ol bai pinis.”—1 Jon 2:17.
Bilong kisim save moa long tok Baibel i mekim long pinis bilong ol manmeri i stap longwe long God, ritim atikol “Is the World Coming to an End? What Is the Apocalypse?”
Bilong kisim save long tok Baibel i mekim long ol samting bai kamap, ritim atikol “When Will the World End?”
Wok yet long stap belgut
Baibel i ken helpim yumi long stap belgut maski ol hevi i wok long kamap long graun. Olsem wanem em inap helpim yumi?
Baibel i kamapim ol edvais em yumi ken bihainim. (2 Timoti 3:16, 17) Olsem, ritim atikol “How to Control Worry” bilong kisim save long hau Baibel i ken helpim yu long stap belgut maski i gat ol hevi long laip bilong yumi.
Baibel i kamapim olsem yumi inap wetim gutpela samting. (Rom 15:4) Em i stori gut long ol samting em yumi ken save ol bai kamap long nau na long bihain, na dispela i helpim yumi long wetim gutpela samting maski ol hevi i kamap long graun.
Bilong helpim yu long kisim sampela save moa long Baibel, mipela i kirapim yu long traim fri Baibel stadi kos bilong mipela long nau.
a “Taim Bilong Graun Long Bagarap em wanpela disain ol i wokim bilong kirapim ol manmeri long tingim olsem ol strongpela teknoloji em yumi yet i wokim, klostu taim ol bai bagarapim graun bilong yumi. Em wanpela tok piksa, bilong kirapim yumi long skelim gen ol samting nogut i wok long kamap sapos yumi laik i stap laip yet long dispela graun.”—Bulletin of the Atomic Scientists.