“Yumi olgeta i laik bai laip i kamap wankain gen olsem long bipo.”—Angela Merkel, praim minista bilong Jemani.

 COVID-19 i wok yet long senisim sindaun bilong ol manmeri long olgeta hap, so ating yu wanbel long tok bilong em. Tasol dispela tok “wankain gen olsem long bipo” i makim wanem samting? Ol manmeri i laik mekim wanem?

•   Mekim gen ol samting ol i save mekim. Planti i laik tru long bung gen wantaim ol narapela, olsem pasin bilong holimpas narapela na sekan na raun lukim ol ples. Saveman Anthony Fauci a i tok ol man i pilim olsem “bilong laip i go bek wankain gen olsem long bipo,” ol i mas go long “ol restron, tieta, [na] ol kain samting olsem.”

•   Laip i kamap gutpela moa. Sampela i tingim nupela kain sindaun em pendemik i kamapim olsem laip we i gutpela moa winim bilong pastaim. Ol i pilim olsem senis i mas kamap long pasin bilong mekim ol bikpela wok, wansait pasin, na hevi bilong planti man i kisim sik bilong tingting. Bos bilong World Economic Forum, Klaus Schwab i tok: “Pendemik i opim rot long yumi skelim gen i stap bilong yumi, piksaim gen ol samting yumi laik bai kamap long graun, na yumi mas mekim ol dispela senis. Na dispela haptaim bai stap sotpela taim tasol.”

 Ol narapela i kisim ol bikpela hevi long dispela pendemik, so ol i pilim olsem i gutpela laip i go bek gen wankain olsem long bipo. Olsem, ol i pinisim planti long wok, ol i no gat haus moa, ol i sik, na samting i nogut moa em wanpela ol i laikim tru i dai.

 Em tru olsem, i no gat wanpela man i save long laip bai wanem kain bihain long pendemik i pinis. (Eklisiastis 9:11) Tasol Baibel inap helpim yumi long skelim ol samting yumi laik bai kamap na karim ol hevi em pendemik i kamapim. Na tu, Baibel i stori long gutpela sindaun em yumi olgeta i ken bilip long en, em sindaun we yu no ting bai kamap tru.

 Kirap long bipo yet, Baibel i tok profet olsem ol sik bai kamap long olgeta hap o “ol bikpela sik” bai kamap long “pinis bilong dispela taim.” (Luk 21:11; Matyu 24:3) Taim yumi holim dispela kain tingting long COVID-19 pendemik, yumi bai tingim dispela sik olsem wanpela bilong ol bikpela sain—dispela i makim tu ol woa, ol bikpela guria, na kaikai i sot—we i mas kamap bilong truim tok profet bilong Baibel.

 Hau dispela save inap helpim yumi: Ating sindaun bilong ol man bai wok long kamap orait liklik, tasol Baibel i tok olsem “taim nogut bai kamap na dispela bai givim hatwok long ol man.” (2 Timoti 3:1) Taim yumi save long dispela, yumi holim stretpela tingting long ol samting yumi laik bai kamap long ol dispela taim bilong hevi.

 Baibel i kamapim stretpela save: Klostu nau senis bai kamap long dispela graun we i pulap long ol hevi. Wanem kain senis bai kamap?

 Baibel i tok profet long ol gutpela samting bai kamap klostu nau, na em i no tok profet long ol hevi tasol we i painim yumi long nau, nogat. Em i stori long gutpela sindaun bai kamap long bihain em God tasol inap long kamapim, na i no gavman bilong ol man. “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:4.

 Jehova b God i tok promis: “Harim! Mi mekim olgeta samting i kamap nupela.” (Revelesen 21:5) Em bai pinisim ol hevi i stap long graun, dispela i makim tu ol hevi em pendemik i kamapim. Em bai mekim ol dispela samting:

•   Gutpela helt long bodi na tingting, na i no gat sik na dai.—Aisaia 25:8; 33:24.

•   Ol wok i givim amamas tru long man, na i no ol wok we bai pinisim nating strong bilong man na mekim man i bel hevi.—Aisaia 65:22, 23.

•   Olgeta manmeri bai i gat gutpela sindaun, na bai i no gat pasin bilong stap rabis na stap hangre.—Buk Song 72:12, 13; 145:16.

•   Bel hevi bai wok long pinis, na bai yumi lukim ol lain em yumi laikim tru i kirap bek na stap laip.—Aisaia 65:17; Aposel 24:15.

 Hau dispela save inap helpim yumi: Baibel i tok: “Samting yumi bilip na wet long en i stap olsem anka bilong laip bilong yumi.” (Hibru 6:19) Taim yumi bilip na wet long lukim ol gutpela samting bai kamap bihain, dispela inap helpim yumi long karim ol hevi bilong nau, stap bel isi, na yumi no wari na tingting planti.

 Olsem wanem? Yu inap bilip long ol tok promis bilong Baibel? Lukim atikol “Baibel—Buk i Gat Stretpela Save na Yumi Inap Bilipim.”

•   Tingim laip i bikpela samting

   Skripsa: “Man i gat savetingting, dispela bai seivim laip bilong em.”—Eklisiastis 7:12.

   Mining bilong en: Mekim ol gutpela disisen bilong lukautim yu yet na bai yu no kisim sik. Save long ol samting i kamap long hap bilong yu. Skelim lo bilong helt na seifti, sik i go bikpela olsem wanem, na namba bilong ol man i kisim olgeta sut pinis.

•   Was gut

   Skripsa: “Man i gat savetingting i save lukaut gut na i tanim baksait long pasin nogut, tasol longlong man i save mekim nabaut na em i bilip tumas long em yet.”—Provep 14:16.

   Mining bilong en: Wok yet long mekim ol samting bilong lukautim helt bilong yu. Ol saveman i tok olsem korona vairas bai stap inap sampela haptaim.

•   Bihainim ol infomesen i tru

   Skripsa: “Man i no gat gutpela tingting, em i save bilipim olgeta tok, tasol man i gat pasin bilong tingting gut na mekim samting, em i save skelim gut olgeta wokabaut bilong em.”—Provep 14:15.

   Mining bilong en: Skelim gut wanem kain edvais yu laik bihainim. Disisen bilong yu em i bikpela samting—yu inap bagarapim helt bilong yu sapos yu bihainim ol infomesen i no stret.

•   Holim stretpela tingting

   Skripsa: “No ken tok, ‘Wai na taim bipo i gutpela moa winim dispela taim nau?’ Bikos em i no savetingting long yu askim olsem.”—Eklisiastis 7:10.

   Mining bilong en: Mekim disisen olsem yu bai mekim ol samting bilong stap amamas long dispela taim bilong hevi. No ken tingim olsem laip paslain long pendemik em i gutpela moa, na abrusim pasin bilong tingting tumas long ol samting em pendemik i pasim yu long mekim.

•   Rispektim ol narapela

   Skripsa: “Yupela i mas givim ona long olgeta kain man.”—1 Pita 2:17.

   Mining bilong en: Ol manmeri i gat narapela narapela tingting long pendemik na ol hevi bilong en. Larim ol i kamapim tingting bilong ol, tasol long pasin rispek bihainim ol gutpela disisen yu mekim pinis. Tingim ol lain i no kisim sut, ol lapun, na ol lain husat i gat ol narapela bikpela sik.

•   No ken les kwik

   Skripsa: “Man i gat pasin laikim em i no save les kwik.”—1 Korin 13:4.

   Mining bilong en: Mekim gutpela pasin taim ol narapela i kamapim olsem ol i tingting planti long ol wok ol i save mekim paslain long pendemik. Long taim ol i rausim sampela tambu na yu inap mekim planti samting, no ken les kwik.

 Ol Witnes Bilong Jehova i kisim bel isi long rot bilong ol tok promis bilong Baibel long ol gutpela samting bai kamap bihain, na dispela i helpim ol na ol i no tingting tumas long pendemik. Na tu, ol i strongim narapela narapela taim ol i bihainim tok bilong Baibel long bung wantaim na mekim lotu. (Hibru 10:24, 25) Olgeta i welkam long ol miting bilong ol Witnes Bilong Jehova, em ol i mekim long rot bilong Intenet long dispela taim bilong pendemik.

 Sampela manmeri i tok olsem ol i joinim ol Witnes Bilong Jehova long mekim lotu na dispela i helpim ol long dispela taim nogut. Olsem, wanpela meri i kisim COVID-19 i tok orait long joinim ol Witnes Bilong Jehova long miting long rot bilong Intenet. Ol dispela miting i helpim em long stap bel isi maski em i karim hevi bilong helt long dispela vairas. Bihain em i tok: “Mi pilim olsem mi wanpela bilong dispela famili tu. Pasin bilong ritim Baibel i mekim bel na tingting bilong mi i stap isi. Em i helpim mi long tingim gutpela samting bai kamap bihain na i no ol hevi i painim mi. Tenkyu long helpim mi long go klostu long God em samting bipo mi laik tru long mekim.”