Long olgeta hap bilong graun, planti manmeri i laik bihainim vegan laip stail.

•   ”Vegan em wanpela tingting na wanpela laip stail ol man i bihainim na ol i wok strong long sakim olgeta kain pasin bilong mekim nogut long ol animal na kilim ol animal bilong kaikai, bilong wokim klos o bilong mekim ol narapela wok.”​—The Vegan Society

 Sampela manmeri i bihainim vegan laip stail bikos ol i tingim ol animal, na tu, ol i laik helpim envairomen, helt bilong ol, o long sampela samting bilong lotu.

•   “Vegan laip stail em i no wankain long pasin bilong bihainim ol daiet bikos ol man i bihainim dispela laip stail i tingim dispela olsem wanpela bilip bilong ol na em disisen wanwan man yet i ken mekim, na ol i ting em rot bilong senisim graun i kamap gutpela ples.”​—Britannica Academic

 Yu ting pasin bilong bihainim vegan laip stail em rot bilong mekim graun i kamap gutpela ples? Baibel i tok wanem?

 Baibel i kamapim klia olsem Man Bilong Wokim yumi, God Jehova, a em i wokim ol man i antap moa winim ol animal na em i givim ol wok bilong bosim ol animal. (Stat 1:27, 28) Tasol bihain, God i tok orait long ol man i ken kilim ol animal bilong kaikai. (Stat 9:3) Maski i olsem, em i no orait long pasin bilong mekim nogut long ol animal.​—Provep 12:10.

 Olsem Baibel i kamapim, maski yumi kaikai mit o nogat, em disisen bilong yumi wan wan. b Samting yumi makim i no mekim na yumi kamap gutpela man long ai bilong God. (1 Korin 8:8) Ol narapela i no ken sutim tok long disisen wanpela i mekim long wanem samting em i makim bilong kaikai.​—Rom 14:3.

 Baibel i kamapim klia olsem ol disisen yumi mekim long laip stail bilong yumi i no inap stretim ol hevi long graun. Planti hevi bilong graun i kamap long rot bilong ol wok politik, i stap bilong ol man, na hevi bilong mani na wok bisnis samting bilong dispela graun, em ol samting ol man yet i no inap stretim. Baibel i tok:

•   “Samting i krungut, man i no inap stretim”—Eklisiastis 1:15.

 Krieta bilong yumi bai stretim ol hevi yumi karim long nau. Baibel i mekim tok piksa bilong stori long samting em bai mekim.

•   “Na mi lukim nupela skai na nupela graun; skai bilong pastaim na graun bilong pastaim tupela i go pinis, na solwara i no stap moa.”​—Revelesen 21:1.

 God bai senisim ol gavman bilong ol man, o “skai bilong pastaim” wantaim “nupela skai,” em Kingdom gavman bilong em long heven. Kingdom bilong em bai rausim “graun bilong pastaim,” em ol man nogut, na em bai bosim “nupela graun,” o ol lain i redi long stap daun long wok bos bilong em.

 Aninit long wok bos bilong Kingdom Bilong God ol manmeri bai lain long hau ol i ken long stap gut wantaim ol animal na envairomen.​—Aisaia 11:6-9.