Ol lida bilong ol gavman long graun na ol bikpela oganaisesen i traim long kamapim bel isi long graun olgeta, tasol ol i no inap mekim olsem. Kirap long taim bilong Wol Woa 2 na i kam inap nau, i gat planti moa ol pait na ol woa winim long bipo. Inap olsem 2 bilion manmeri—em 25 pesen bilong populesen bilong ol manmeri long graun olgeta—i stap long ol kantri i gat ol pait na ol woa.

 Wai na ol man i no inap kamapim bel isi? Baibel i tok wanem?

1.  1. Ol pasin bilong ol man i mekim na i hatwok long ol i kamapim bel isi. Baibel i tok profet olsem long taim bilong yumi, “ol man bai laikim ol yet tasol, ol bai laikim tumas mani, ol bai apim nem bilong ol yet, ol bai i gat pasin antap,  . . . ol bai i no stap gut long narapela, . . . ol bai i no laik kamap wanbel, . . . ol bai i no gat pasin bilong bosim bel, ol bai kamap wail olgeta, . . . ol bai i gat strongpela het, ol bai pulap long pasin antap.”​—2 Timoti 3:2-4.

2.  2. Ol man—maski ol i wok bung wantaim o wan wan man yet—i no gat save inap long stretim ol hevi bilong ol yet, nogat, ol i mas kisim helpim i kam long Krieta bilong ol, em God Jehova. a Baibel i tok: “Man i no gat rait long stiaim wokabaut bilong em yet.”​—Jeremaia 10:23.

3.  3. Dispela graun i stap aninit long wok bos bilong wanpela man nogut husat i gat bikpela strong, em Satan dispela Devil, na em i “save giamanim olgeta manmeri bilong graun.” (Revelesen 12:9) “Dispela graun olgeta i stap long han bilong Satan,” olsem na bai i gat ol woa na ol bikpela pait i stap yet.​—1 Jon 5:19.

 Baibel i tokaut olsem God wanpela tasol bai kamapim bel isi long graun olgeta, na i no long rot bilong ol wok em ol man bilong graun i mekim.

•   “‘Mi tingim pinis ol samting mi laik mekim long yupela,’ Jehova i tokaut olsem, ‘mi laik mekim gut long yupela na mi no laik mekim nogut long yupela. Mi laik givim gutpela sindaun long yupela em yupela i ken bilip na wet long en.’”​—Jeremaia 29:11.

 Hau God bai truim dispela tok promis bilong em? “God husat i save givim bel isi, em bai krungutim Satan.” (Rom 16:20) God bai yusim wanpela gavman long heven, em Baibel i kolim olsem “Kingdom Bilong God,” long kamapim bel isi long olgeta hap bilong graun. (Luk 4:43) Aninit long wok king bilong Jisas Krais, em King bilong dispela Kingdom, ol manmeri bai kisim skul long olsem wanem ol i ken stap bel isi wantaim ol narapela.​—Aisaia 9:6, 7.

•    Bilong kisim sampela save moa, ritim atikol “Kingdom Bilong God Bai Mekim Wanem?”