Woa i kamap long Yukren na senis long weda i wok long kamapim bikpela hevi tru long saplai bilong kaikai long olgeta hap bilong graun. Dispela hevi i go bikpela moa long ol kantri i no gat planti wok bisnis samting, planti taim ol i hatwok long kisim ol kaikai ol i nidim.

•   “Ol woa, senis long weda, pe bilong baim petrol samting i go antap na planti samting moa i mekim na i hatwok long wokim na tilim kaikai.”​—António Guterres, sekreteri-jeneral bilong UN, Julai 17, 2023.

•   “Rasia i no moa insait long wanpela agrimen ol i bin mekim bilong kisim ol wit samting long Yukren i go long ol narapela kantri. Ol saveman i ting olsem dispela bai mekim hevi bilong kaikai i sot long olgeta hap bilong graun i go nogut moa, na ol kantri i sot long mani, moa yet Not Afrika na Midel Is, prais bilong kaikai long ol dispela kantri bai i go antap moa.”​—Atalayar.com, Julai 23, 2023.

 Skelim tok Baibel i mekim long hevi bilong kaikai i sot na wanem samting bai painim yumi long bihain.

•   Jisas i tok profet olsem: “Wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre.”​—Matyu 24:7.

•   Buk Revelesen i stori long fopela man i sindaun long hos. Wanpela bilong ol dispela man i sindaun long hos i makim ol woa. Baksait long em i gat narapela man i sindaun long hos na em i makim ol bikpela hangre, em haptaim we kaikai bai sot tru na prais bilong ol kaikai bai i go antap moa. “Mi lukim wanpela blakpela hos. Na man i sindaun long en em i holim wanpela skel long han bilong en. Na mi harim samting olsem maus bilong wanpela man i . . . tok olsem, . . . ‘Pe ol man i kisim long wanpela de, em bai inap long ol i baim wanpela liklik sospen wit o tripela liklik sospen bali tasol.’”​—Revelesen 6:5, 6, Buk Baibel.

 Ol dispela tok profet bilong Baibel i stori long kaikai bai sot i wok long kamap tru long nau, em dispela haptaim we Baibel i kolim olsem “taim bilong las de.” (2 Timoti 3:1) Bilong kisim sampela save moa long “taim bilong las de” na fopela man i sindaun long hos olsem Buk Revelesen i stori long en, lukim vidio Kirap Long 1914 Ol Samting Long Dispela Graun i Senis na ritim atikol “Fopela Man Long Hos—Ol i Husat?”

•   Baibel i gat ol edvais we inap helpim yumi long karim ol hevi i painim yumi, dispela i makim tu hevi bilong prais bilong kaikai i go antap, na tu, hevi bilong kaikai i sot. Lukim sampela eksampel long atikol “How to Live on Less.”

•   Na tu, Baibel i helpim yumi long bilip na wet olsem ol samting bai kamap orait long bihain. Em i tok promis olsem wanpela taim bai i kamap na “bai i gat planti wit samting long graun” na olgeta manmeri bai i gat planti kaikai. (Buk Song 72:16) Bilong kisim sampela save moa long dispela samting bai kamap bihain na as na yu ken trastim dispela tok promis, ritim atikol “I Gat Ol Gutpela Samting Bai Kamap Bihain.”