Ating 5 bilion manmeri bai watsim FIFA Wol Kap we bai kamap long Novemba 20 i go Disemba 18, 2022. Planti manmeri i pilim olsem taim ol i watsim ol kain spots olsem, dispela inap mekim ol i stap wanbel, na tu, em inap mekim sampela samting moa.

•   “Spots i gat pawa long senisim dispela graun. Em i gat pawa long kirapim tingting bilong ol manmeri. Em i gat pawa long bungim ol manmeri i kamap wanbel long spesel wei.”​—Nelson Mandela, bipo presiden bilong Saut Afrika.

•   “Soka . . . i bungim ol manmeri bikos em i givim ol hop na amamas na ol i laikim tru ol samting, em i kirapim ol long laikim ol narapela, na holim wankain tingting.”​—Gianni Infantino, presiden bilong FIFA. a

 Yu ting Wol Kap o wanpela narapela spots inap kamapim kain gutpela samting? Yu ting i gat rot long ol man inap stap bel isi na stap wanbel?

 Wol Kap bilong dispela yia i mekim ol manmeri long tingim planti samting moa na i no soka tasol. Ol dispela soka gem i kirapim ol man long tok pait long raits bilong ol man, skin kala, na hevi bilong mani.

 Maski i olsem, planti manmeri i pilim olsem kain ol intenesenel spots olsem Wol Kap i givim amamas long ol. Maski ol man i laik bai ol kain spots olsem i mekim ol i stap wanbel, tru tru dispela samting i no inap kamap. Kain ol spots i kamapim klia ol pasin bilong brukim lain em Baibel i tok bai kamap long haptaim bilong “las de.”​—2 Timoti 3:1-5.

 Baibel i stori long gutpela samting bai kamap bihain we bai mekim ol manmeri long olgeta hap bilong graun i kamap wanbel. Em i tok promis olsem olgeta manmeri long graun bai stap wanbel aninit long wanpela gavman long heven em “Kingdom Bilong God.”​—Luk 4:43; Matyu 6:10.

 King bilong dispela Kingdom, Jisas Krais, bai mekim samting bilong kamapim bel isi long olgeta hap bilong graun. Baibel i tok:

•   “Ol stretpela manmeri bai kamap gut olsem gras i gro gut, na . . . bel isi bai i pulap long olgeta hap.”​—Buk Song 72:7.

•   “Em bai kisim bek ol rabisman i singaut long kisim helpim, na . . . em bai kisim bek ol long han bilong ol man i mekim nogut long ol na long ol man i pait na bagarapim ol.”​—Buk Song 72:12, 14.

 Long nau tu, ol tok Jisas i skulim ol man long en i mekim planti milion manmeri long 239 kantri i stap wanbel wantaim. Ol i lain long lusim pasin bilong heitim narapela narapela. Bilong kisim sampela save moa, ritim ol atikol siris em nem bilong en “Lusim Pasin Bilong Heitim Narapela.”