Rasia i salim ami bilong en i go pait long Yukren long Februeri 24, 2022. Dispela i kamapim bikpela hevi long ol manmeri na planti milion manmeri i ranawe lusim Yukren na i go long ol narapela kantri bikos long dispela pait. a

 “Ol bom i wok long pundaun na pairap. Mipela i pret nogut tru na mi hatwok long stori long dispela samting. Taim mipela i harim olsem ol tren i wok long kisim ol manmeri i go lusim taun, mipela i mekim disisen long lusim dispela ples. Mipela i lusim olgeta samting, na olgeta wan wan man i karim wanpela liklik beg tasol. Mipela i kisim tasol ol dokiumen, ol marasin, wara, na sampela liklik kaikai. Mipela i lusim olgeta samting na mipela i go long tren stesin taim ol bom i wok long pundaun na pairap.”​—Nataliia, bilong Kharkiv, Yukren.

 “Mipela i no bin ting olsem woa bai kamap inap long las minit. Mi harim ol bikpela pairap long sampela hap bilong taun na ol windo i wok long guria. So mi mekim disisen long lusim taun na mi kisim tasol ol samting em mi nidim. Mi lusim haus long 8 klok long moning na kisim tren i go long Lviv na bihain mi kisim bas i go long Polan.”​—Nadija, bilong Kharkiv, Yukren.

Long dispela atikol

•  Wanem ol samting i kamapim dispela hevi bilong refiuji?

•  Ol refiuji inap wetim wanem gutpela samting bai kamap bihain?

•  Yu ting Baibel inap helpim ol refiuji long nau?

 Wanem ol samting i kamapim dispela hevi bilong refiuji?

 Hevi bilong refiuji long Yukren i kamap bikos Rasia i salim ami bilong en i go pait long Yukren. Tasol Baibel i stori long ol narapela bikpela risen na i gat ol hevi bilong refiuji:

•   Ol gavman bilong ol man long olgeta hap bilong graun i no lukautim gut ol manmeri long ol samting ol i nidim. Planti taim ol man i gat namba long wok gavman i yusim pawa bilong ol long daunim ol manmeri.​—Eklisiastis 4:1; 8:9.

•   Satan dispela Devil, em “hetman bilong dispela graun,” i kirapim ol manmeri long mekim ol pasin i nogut tru, olsem na Baibel i tok: “Dispela graun olgeta i stap long han bilong Satan.”​—Jon 14:30; 1 Jon 5:19.

•   Ol manmeri bin karim ol hevi inap planti handret yia, na tu, nau yumi stap long dispela haptaim em Baibel i tok profet long en olsem: “Long taim bilong las de, taim nogut bai kamap na dispela bai givim hatwok long ol man.” (2 Timoti 3:1) Long dispela haptaim bai i gat ol woa, ol netrol disasta, ol bikpela hangre, na ol bikpela sik—em ol hevi we i save mekim na ol manmeri i mas ranawe lusim ples bilong ol.​—Luk 21:10, 11.

 Ol refiuji inap wetim wanem gutpela samting bai kamap bihain?

 Baibel i tokaut olsem Krieta bilong yumi Jehova, b em God i save mekim pasin laikim na pasin sori long ol refiuji na ol manmeri em ol i ranawe lusim haus bilong ol. (Lo 10:18) Em i tok promis long stretim ol hevi bilong ol refiuji long rot bilong gavman bilong em long heven, em Kingdom Bilong God, dispela gavman bai senisim olgeta gavman bilong ol man. (Daniel 2:44; Matyu 6:10) Jehova bai yusim Kingdom bilong Em long bagarapim na pinisim Satan em dispela Devil. (Rom 16:20) Dispela Kingdom em wanpela gavman we bai bosim olgeta hap bilong graun na em bai pinisim pasin birua i stap namel long ol kantri. Olgeta manmeri bai stap wanbel wantaim olsem wanpela famili long olgeta hap bilong graun. I no gat wanpela bai ranawe lusim haus bilong em, bikos Baibel i tok promis olsem: “Olgeta wan wan bai sindaun aninit long rop wain na diwai fik bilong em yet, na i no gat wanpela bai mekim ol i pret, long wanem, maus bilong Jehova, bosman bilong bikpela lain ami, i bin tok pinis.”​—Maika 4:4.

 Kingdom Bilong God tasol bai stretim hevi bilong refiuji em yumi bungim long nau. Jehova bai yusim Kingdom bilong em long pinisim ol hevi we i subim ol manmeri i go kamap ol refiuji. Skelim sampela eksampel:

•   Woa. “[Jehova] i save mekim i dai ol pait.” (Buk Song 46:9) Bilong kisim save long hau God bai pinisim ol pait, ritim dispela atikol “Peace on Earth—How Will It Come?”

•   Pasin bilong mekim nogut long ol man na pait na bagarapim man. “[Jehova] bai kisim bek ol long han bilong ol man i mekim nogut long ol na long ol man i pait na bagarapim ol.” (Buk Song 72:14) Bilong kliagut long hau ol manmeri i ken senisim ol pasin nogut em ol i bin mekim inap longpela taim, ritim ol atikol siris nem bilong en “Lusim Pasin Bilong Heitim Narapela.”

•   Stap rabis. “[Jehova] bai kisim bek ol rabisman i singaut long kisim helpim.” (Buk Song 72:12) Bilong kisim save long hau God bai stretim as tru bilong ol hevi i save kamapim pasin bilong stap rabis, ritim dispela atikol “Is a Fair Economic System Possible?”

•   Sot long kaikai. “Bai i gat planti wit samting long graun.” (Buk Song 72:16) Bilong kisim save long hau God bai givim kaikai long olgeta manmeri na bai ol i no ken stap hangre moa, ritim dispela atikol “A World Without Hunger?”

 Yu ting Baibel inap helpim ol refiuji long nau?

 Yes. Baibel i tokaut long gutpela samting bai kamap bihain em ol refiuji inap bilip na wet long en, na tu, em inap long helpim ol refiuji long karim ol hevi em ol i bungim long nau.

 Stiatok bilong Baibel: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God; na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela.”​—Filipai 4:6, 7.

 Mining: Askim God long mekim isi bel na tingting bilong yu long wanem wanem ol hevi yu wok long karim. Lukim dispela atikol “Philippians 4:6, 7—‘Do Not Be Anxious About Anything.’”