Olsem wanem? Poroman marit bilong yu i tingting planti long pasin bilong yu long dring alkohol? Sapos olsem, hia em sampela samting yu inap tingim.

Long dispela atikol

•  Pasin bilong dring planti alkohol na marit—tupela i no inap wok gut wantaim

•  Olsem wanem? Alkohol i bosim yu?

•  Was gut long tok yu no gat dispela pasin

•  Samting yu ken mekim

 Pasin bilong dring planti alkohol i save kamapim olgeta kain hevi long sait bilong helt, dispela i makim tu sik bilong lewa, sirosis bilong liva, na kensa. Na tu, pasin bilong dring planti alkohol inap kamapim tu ol hevi insait long marit olsem pait, divos, hevi bilong mani, na i no stap gut long poroman marit.

 Baibel i tok taim man i dring planti alkohol, i olsem alkohol i “kaikaim man [wankain] olsem snek i save kaikaim man, na em i save kamapim posin olsem bilong wanpela posin snek.” (Provep 23:32) Hau na yu save olsem alkohol i bosim yu?

 Ol dispela askim bai helpim yu long skelim sapos alkohol i bosim yu:

•   Olsem wanem? Yu hatwok long bosim pasin bilong yu long dring alkohol?

•   Olsem wanem? Planti taim yu tingting long wanem narapela taim bai yu dring alkohol gen?

•   Yu save dring yet alkohol maski dispela pasin i givim hevi long yu—dispela i makim tu insait long marit bilong yu?

•   Olsem wanem? Yu pilim hatwok taim yu laik lusim pasin bilong dring alkohol?

•   Olsem wanem? Pasin bilong yu long dring i kamapim tok pait namel long yu na poroman marit?

•   Olsem wanem? Yu dring planti alkohol moa winim bilong pastaim?

•   Olsem wanem? Yu save hait na dring alkohol long haus o ples wok?

 Sapos yu tok yes long wanpela o sampela bilong ol dispela askim, dispela i soim olsem alkohol i bosim yu. Yu inap kisim pasin bilong dring oltaim, sampela taim ol i kolim olsem alcoholism.

 Olsem wanem? Poroman marit i kamapim olsem em i tingting planti long pasin bilong yu long dring alkohol? Sapos olsem, ating bai yu tok yu no gat hevi long dispela o yu givim eskius. Ating yu bai sutim tok long ol narapela, dispela i makim tu poroman marit, na mekim kain tok olsem:

•   “Sapos yu mekim gut long mi, mi no inap dring.”

•   “Sapos yu wok hat olsem mi, yu tu bai dring.”

•   “Mi save long planti husat i save dring planti moa winim mi.”

 Olsem wanem? Sapos yu mekim ol dispela kain tok, yu soim olsem laik bilong dring alkohol i bikpela samting winim tingting bilong famili i mas stap amamas? Wanem samting i bikpela samting moa?

 Stiatok bilong Baibel: “Maritman i save tingim . . . ol samting bai meri bilong em i amamas long em.”​—1 Korin 7:33.

•   Putim gut yau long tingting bilong poroman marit. Maski sapos yu ting poroman marit i tingting planti long dispela samting, ating i gutpela yu mekim sampela senis. Sapos yu no mekim olsem—yu dring yet maski poroman marit i gat tok long dispela—dispela inap soim olsem yu gat hevi long pasin bilong dring alkohol.

   Stiatok bilong Baibel: “Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet.”​—1 Korin 10:24.

•   Kisim save. Bilong winim pait, wanpela soldia i mas save gut long ol trik bilong birua bilong em. Yu bungim wankain hevi—long daunim birua bilong yu, yu mas save long samting alkohol i save mekim na hau em i kalabusim ol man. Na tu, yu mas kisim save long ol samting we bai helpim yu na yu no larim pasin bilong dring alkohol i bosim yu, na yu no pundaun long mekim gen dispela pasin.

   Stiatok bilong Baibel: “Wok yet long sakim ol laik bilong bel, em ol dispela laik i save pait long yupela.”​—1 Pita 2:11.

•   Kisim helpim. I gat planti program bilong helt we i save helpim ol man long daunim hevi bilong alkohol, dispela i makim tu ol program bilong helpim man long taim em i lusim dispela pasin, bihain long em i lusim, na ol haus sik. Yu ken askim tu wanpela pren i bikpela pinis long helpim yu luksave long wanem ol samting i mekim na alkohol i bosim yu. Na sapos sampela taim dispela laik i kamap gen, orait yu ken askim em long helpim yu.

   Stiatok bilong Baibel: “Trupela pren i save soim pasin laikim long olgeta taim na em i kamap olsem brata bilong yu long taim bilong hevi.”​—Provep 17:17.

 Pasin bilong dring planti em wanpela hevi na i no olsem yu mas ritim wanpela sotpela atikol o tok tasol olsem, “Mi bai dring liklik” na dispela bai pinisim hevi, nogat. Yu mas save olsem samting yu mekim bilong stretim dispela hevi bai helpim helt bilong yu—na tu marit bilong yu.

 Bilong kisim sampela save moa: Ritim ol dispela atikol na luksave long hau ol narapela i kisim helpim long daunim pasin bilong dring planti alkohol.

 “I Am No Longer a Cruel Man”

 “I No Longer Feel Ashamed of Myself”

 “The Streets Became My Home”

 Na tu, watsim vidio ‘Mi Les Pinis Long Pasin Mi Bihainim’