Planti man na meri i save stap wantaim paslain long ol i marit. Sampela i mekim olsem bikos ol i laik lukim sapos ol inap stap gut wantaim na dispela inap helpim marit bilong ol long i stap gut. Yu ting i gutpela long man na meri i stap wantaim paslain long ol i marit?

Long dispela atikol

•  Baibel i tok wanem?

•  Yu ting yupela i stap wantaim na dispela bai helpim yupela long taim yupela i marit?

•  Yu ting yupela i stap wantaim na dispela bai helpim yu long sait bilong mani?

•  Yu ting yupela i stap wantaim na dispela bai helpim yu long maritim wanpela gutpela poroman?

•  Yu ting i gat gutpela rot long bihainim?

•   Baibel i tambuim man na meri husat i no marit long slip wantaim. Olsem, Baibel tok: “Yupela i mas sakim pasin pamuk.” (1 Tesalonaika 4:3; 1 Korin 6:18) Dispela i makim tu man na meri husat i tingting long marit bihain, tasol long taim ol i no marit yet ol i slip wantaim. a Ol lo bilong Baibel i lukautim man na meri na bai meri i no kisim bel long taim ol i no marit yet o long ol narapela hevi we inap kamap long pasin bilong stap wantaim paslain long marit.

•   God i kamapim marit. Taim em i kamapim marit, em i tok: “Man bai lusim papa na mama bilong em na em bai pas wantaim meri bilong em, na tupela bai kamap wanpela bodi.” (Stat 2:24) Taim man na meri i stap gut long poroman, famili bilong ol bai i gat pasin laikim na ol bai stap gut.

 Sampela i tok yes. Ol i tok man na meri i lainim planti samting taim ol i wok wantaim long mekim ol wok long haus na luksave long pasin bilong narapela narapela. Tasol nambawan samting we inap helpim marit em pasin bilong stap gut long poroman marit.

 Hau bai man na meri i lain long pas gut wantaim long gutpela taim na long taim bilong hevi? I no long rot bilong man na meri i stap wantaim paslain long ol i marit na ol i holim tingting olsem ol i ken lusim narapela long wanem taim ol i laik, nogat. Tasol marit bai stap strong taim man na meri i wok strong long stap gut long narapela na wok wantaim long karim ol hevi.

 Samting Nogut Bilong En: Man na meri husat i stap wantaim na ol i ting olsem ol bai lain long narapela narapela paslain long ol i marit, dispela inap mekim na ol i seperet.

 Stiatok bilong Baibel: “Samting man i planim, dispela samting tasol em bai kamautim.”​—Galesia 6:7.

 Sampela i tok yes. Wok painimaut bilong Pew Research Center long Amerika i soim olsem ol manmeri husat i stap wantaim, 4-pela long olgeta 10-pela i ting dispela inap helpim ol long seivim mani. Tasol bihain long ol i stap wantaim inap sampela hap taim, planti bilong ol dispela lain we ol i mekim wok painimaut long ol i tok olsem, hevi bilong mani em namba wan risen na ol i no redi long marit.

 Pasin bilong sindaun wantaim paslain long marit inap kamapim ol hevi, moa yet long ol meri. Olsem, bihain long ol i seperet planti taim ol meri i save mekim bikpela long ol pikinini.

 Samting Nogut Bilong En: Pasin bilong stap wantaim paslain long marit inap kamapim ol hevi winim ol helpim em ol man i ting ol inap kisim.

 Stiatok bilong Baibel: “Mi Jehova, mi God bilong yupela, Mi tasol mi save skulim yupela long ol samting we inap helpim yupela.”​—Aisaia 48:17.

 Sampela i tok yes. Buk Fighting for Your Marriage i tok: “Ol lain i sindaun wantaim paslain long marit i luksave olsem planti taim i hatwok long seperet. Wai? Sampela i painimaut olsem man o meri ol i stap wantaim bai i no inap long stap olsem gutpela poroman marit. Tasol bikos ol i mekim wok wantaim olsem lukautim wanpela animal, wanbel long baim rent bilong haus, o meri i kisim bel, ol dispela samting i mekim na i hatwok long ol i lusim narapela. Ol i kamapim samting em lain bilong mekim wok painimaut i kolim olsem “stap wantaim bikos ol i lain pinis.” b Na buk Fighting for Your Marriage i tok moa olsem, “sampela manmeri i hatwok long ol i seperet paslain long ol i marit bikos em isi long stap wantaim.”

 Samting Nogut Bilong En: Dispela i no helpim yu long mekim gutpela disisen, taim yupela i stap wantaim dispela inap mekim na i hatwok long seperet maski yupela i no stap gut wantaim.

 Stiatok bilong Baibel: “Man i gat pasin bilong tingting gut na mekim samting, em i lukim hevi na em i haitim em yet, tasol man i sot long save, em bai wokabaut stret i go na karim hevi.”​—Provep 22:3.

 Yu inap abrusim ol hevi we inap kamap long pasin bilong stap wantaim paslain long marit na yu inap marit na stap gut. Hau? Taim yu bihainim ol lo bilong Baibel long marit. Lusim sampela haptaim long save long wanpela em yu laik maritim paslain long yu stap wantaim em olsem maritman o maritmeri. Em gutpela long makim wanpela husat i gat wankain tingting na laik olsem yu, dispela i bikpela samting moa winim gutpela skin na lukluk bilong em.

 Baibel i kamapim ol gutpela edvais we inap helpim yu na bai yu ken mekim ol samting na marit i ken stap amamas na stap strong. c Olsem, Baibel i kamapim ol stiatok we inap helpim yu long . . .

•   stap gut long narapela

•   kamap wanpela gutpela poroman marit

•   luksave long ol samting i soim olsem dispela man o meri i no inap stap gutpela poroman marit

 Bilong kisim sampela save moa long dispela topik, lukim “Marriage and Family” seksen long jw.org.

 Stiatok bilong Baibel: “God em i as bilong olgeta tok i stap long Rait Holi, na ol i gutpela long skulim man.”​—2 Timoti 3:16.