Yu Ting Kingdom Bilong God i Stap Long Bel Bilong Yu?
Bekim Bilong Baibel
Nogat, Kingdom Bilong God em i no samting i stap long bel bilong ol Kristen. a Baibel i tokaut long ples tru bilong dispela Kingdom, na kolim olsem “kingdom bilong heven.” (Matyu 4:17, King James Version) Skelim ol tok bilong Baibel i soim olsem dispela Kingdom em i wanpela gavman tru we i stap long heven na i mekim wok.
Kingdom Bilong God i gat lain i mekim wok king, na i gat ol manmeri i stap aninit long wok bos bilong en, na em i gat namba bilong kamapim laik bilong God long heven na long graun.—Matyu 6:10; Revelesen 5:10.
Gavman bilong God, o Kingdom, bai bosim olgeta “manmeri bilong narapela narapela kantri na tok ples” bilong dispela graun. (Daniel 7:13, 14) I no gat wanpela man bilong graun i givim namba long dispela gavman long mekim wok, nogat, God tasol i bin givim namba long en.—Buk Song 2:4-6; Aisaia 9:7.
Jisas i bin tokim ol gutpela aposel bilong em olsem ol bai joinim em long Kingdom Bilong heven na “sindaun long ol sia king.”—Luk 22:28, 30.
Kingdom i gat ol birua, na em bai pinisim ol dispela birua.—Buk Song 2:1, 2, 8, 9; 110:1, 2; 1 Korin 15:25, 26.
Sampela man i bilip olsem Kingdom bilong God i stap long bel bilong yu taim yu bihainim tok bilong God, tasol Baibel i no tok olsem. Baibel i kamapim olsem “tok bilong Kingdom” o “gutnius bilong Kingdom” inap stiaim bel bilong yumi, na i stret em i mekim olsem.—Matyu 13:19; 24:14.
Wanem mining bilong dispela hap tok “kingdom bilong God i stap insait long yupela”?
Sampela manmeri i lukim tok bilong Luk 17:21 long sampela Baibel na ol i paul long Kingdom i stap long wanem hap. Olsem, King James Version i tok “kingdom bilong God i stap insait long yupela.” Sapos yumi laik kliagut long stretpela mining bilong dispela hap tok, orait yumi mas skelim ol tok i stap klostu long dispela ves.
Jisas i toktok wantaim ol Farisi, wanpela lain bilong ol lida bilong lotu, em ol i birua long Jisas na ol tu i sapotim disisen bilong kilim Jisas i dai. (Matyu 12:14; Luk 17:20) Olsem wanem?I stret long tok olsem Kingdom em wanpela samting i stap long bel bilong ol dispela lida? Jisas i tokim ol: “Long insait, yupela i pulap long pasin bilong tupela maus na pasin bilong brukim lo.”—Matyu 23:27, 28.
Ol narapela Baibel i kamapim stretpela mining bilong Luk 17:21 olsem: “Kingdom bilong God i stap hia wantaim yupela.” (Contemporary English Version) “Kingdom Bilong God i stap namel long yupela.” (New World Translation) Kingdom bilong heven i stap “wantaim” o “namel” long ol Farisi, na dispela i makim olsem Jisas, em Man God i makim long kamap King, em i sanap i stap long ai bilong ol.—Luk 1:32, 33.
a Planti lotu Kristen i skulim ol man olsem Kingdom Bilong God i stap insait long man, o em i samting i stap long bel bilong man. Olsem, long Amerika, Southern Baptist Convention i tok wanpela mining bilong Kingdom Bilong God em olsem, “God i stap insait long bel na laip bilong man.” Na tu, long buk bilong Pop Benedict Namba 16, nem bilong en, Jesus of Nazareth, em i tok “Kingdom Bilong God bai kam taim yumi bihainim tok bilong God long bel bilong yumi.”