Yes, bikos God i laik bai ol manmeri i bung wantaim long lotu. Baibel i tok: “Yumi wan wan i mas tingim narapela narapela, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim.”—Hibru 10:24, 25.

 Jisas i tok ol disaipel bilong em bai insait long wanpela lain lotu taim em i tok olsem: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Nambawan rot bilong soim dispela pasin laikim, em olsem ol disaipel bilong Krais bai bung wantaim ol wanbilip bilong ol. Ol bai bung long ol kongrigesen long olgeta taim bilong lotu wantaim. (1 Korin 16:19) Ol bai stap olsem wanpela bikpela lain brata i stap long olgeta hap bilong graun.—1 Pita 2:17.

Yu mas bung wantaim wanpela lotu tasol i gat sampela samting moa yu mas mekim

 Tru Baibel i soim olsem ol man i mas bung wantaim bilong lotuim God, tasol em i no tok man i ken amamasim God long rot bilong i stap memba tasol bilong wanpela lotu, nogat. Bilong God i ken orait long wanpela man, lotu bilong em i mas mekim sampela samting long laip bilong em. Olsem, Baibel i tok: “Pasin bilong mekim lotu i klin na i no gat doti long en long ai bilong God Papa bilong yumi i olsem: yumi mas lukautim gut ol pikinini i no gat papamama na ol wido, na helpim ol long karim ol hevi bilong ol. Na yumi mas stap longwe olgeta long pasin doti bilong dispela graun.”—Jems 1:27.