ASKIM BILONG OL YANGPELA
Wai na Papamama i No Larim Mi Bihainim Laik Bilong Mi?
Ol pren bilong yu i invaitim yu long wanpela pati long wiken. Yu askim papamama sapos yu ken go, tasol ol i tok stret olsem, “nogat.” Yu no kirap nogut long dispela. Lastaim tu ol i bin tok nogat.
Long dispela atikol
Wai na olgeta taim papamama i tok nogat?
Sapos olgeta taim papamama i save tok nogat taim yu askim ol long yu inap mekim wanpela samting, ating yu bai pilim olsem ol i no laik bai yu mekim ol samting bilong kisim amamas.
Wanpela tineja em nem bilong em Marie, em tu i pilim wankain taim em i gat mobail fon long namba wan taim. Em i tok: “Papa bilong mi i putim planti lo long wanem ol aplikesen mi ken daunlodim, wanem ol lain mi ken toktok wantaim long fon, na wanem taim mi ken toktok wantaim ol. Tasol ol gels husat i pren bilong mi, ol i stap fri long mekim ol samting long laik bilong ol!”
Samting bilong tingim: Yu ting tru tru papa bilong Marie i laik pasim em long kisim amamas? Wanem narapela samting em yu ting papa bilong Marie i tingting planti long en?
Lo bilong trafik i pasim yu long spit tumas, tasol em lukautim yu bai eksiden i no ken kamap; dispela i wankain long ol lo em papamama i putim
Traim dispela: Tingim olsem yu em papa o mama, na wanpela tineja pikinini bilong yu, nau em i gat fon. Yu bai tingting planti long em long wanem samting? Yu bai putim wanem ol lo em i mas bihainim na bai em i abrusim samting yu tingting planti long en? Yu bai tok wanem sapos tineja pikinini i tok yu wok long pasim em tumas na yu no larim em i mekim samting long laik bilong em?
“Oltaim papa i save tokim mi, ‘Yu bai mekim wanem sapos yu papa o mama?’ Dispela i save helpim mi long luksave olsem ol lo em i putim em bikpela samting na i gat risen na em i putim. Sapos mi gat ol pikinini, ating mi tu bai laik ol pikinini i bihainim lo mi putim wankain olsem papa i laik mi mekim.”—Tanya.
Mi ken mekim wanem na papamama bai tok yes?
“Pasin bilong bikmaus i no inap kamapim gutpela samting, na dispela bai mekim olgeta i no amamas—yu na papamama. Sapos yu kros, papamama bai lukim olsem yu no kliagut yet long ol samting, olsem na ol i no inap givim yu sampela moa fridom.”—Richard.
“Oltaim i gat gutpela risen na papamama i putim lo long mi mas bihainim. Ol i no laik pasim mi long kisim amamas; ol i laik mi kisim gutpela amamas—em ol amamas we i no inap bringim hevi o ol problem.”—Ivy.
Stiatok bilong Baibel: “Longlong man i save autim kwik belhat bilong em, tasol man i gat savetingting, em i save stap isi na kontrolim belhat bilong em.”—Provep 29:11.
“Mi save traim long hait long papa na brukim ol lo em i putim long mi mas bihainim long yusim fon. Mi traim long salim mesis long ol pren long biknait o daunlodim ol aplikesen papa i tambuim mi long en. Tasol planti taim em i painimaut, na em i putim sampela lo gen bikos em i no trastim mi moa. I no gutpela long yu hait long papamama na mekim samting ol i tok nogat long yu mekim.—Marie.
“No ken les kwik. Ating sampela haptaim bai lus long ol i senisim ol lo bilong ol, tasol sapos ol i lukim olsem yu bihainim ol lo ol putim pinis, ol inap givim yu sampela fridom.”—Melinda.
Stiatok bilong Baibel: “Yupela i mas bihainim tok bilong papamama bilong yupela long olgeta samting.”—Kolosi 3:20.
“Sapos yu strong tumas long bihainim laik bilong yu yet, dispela bai i no inap helpim yu long kisim samting yu laikim.”—Natalie.
“Papamama i laik save sapos yu inap skelim gut ol samting na mekim gutpela disisen. So taim mi toktok long papamama, mi save eksplenim samting long wei i soim olsem mi kliagut long wanem samting i stret na i no stret, na mi no save toktok tumas long ol filings bilong mi. Taim mi mekim olsem, ol i save tok yes long mi long mekim samting mi askim ol long en.”—Joseph.
Stiatok bilong Baibel: “Onarim papa na mama bilong yu.”—Efesus 6:2.
