Wanpela bikpela hevi ol yangpela i save bungim em papamama i divos. Hau bai yu inap karim dispela hevi?

Long dispela atikol

•  Tripela samting yu no ken mekim

•  Tripela samting yu mas mekim

•  Tok bilong ol wanlain

 Tripela samting yu no ken mekim

 1. Bleimim yu yet

 “Wanpela taim mama i tokim mi olsem ol hevi i kamap namel long em na papa stat long taim mi bon, so mi tingting olsem mi tasol i mekim na marit bilong ol i bruk.”​—Diana.

 Tingim dispela: Papamama i no divos bikos long yu. Ol i divos bikos long hevi bilong ol yet. Yu i no kamapim dispela hevi na yu no inap stretim dispela hevi. Em wok bilong ol yet long stretim ol hevi bilong tupela.

 2. Kros na i no fogivim narapela

 “Mi kros stret long papa bikos em i no stap gut long mama. Mi pilim hatwok long trastim em gen.”​—Rianna.

 Tingim dispela: Ating yu belhat na yu no amamas long samting i kamap namel long papamama bilong yu, na i stret yu pilim olsem. Tasol sapos yu holim yet bel kros, dispela i no gutpela. Dispela inap bagarapim bodi na tingting bilong yu. Olsem na ol man i save tok pasin bilong holim yet bel kros i kain olsem yu yet i dring posin na bai narapela man i ken kisim sik. a

 3. Holim tingting olsem yu bai i no amamas long marit bilong yu

 “Mi pret nogut tru olsem mi bai mekim wankain pasin olsem papa i mekim. Mi pret olsem sapos mi marit na mi gat ol pikinini, dispela bai mekim na mi bai bungim wankain hevi we i mekim na papamama i divos.”​—Jessica.

 Tingim dispela: Marit bilong papamama bilong yu i bruk i no makim olsem marit bilong yu tu bai bruk, nogat. Tasol yu inap kisim gutpela skul long ekspiriens bilong papamama bilong yu. Olsem, yu bai save gut long wanem kain ol pasin em poroman yu laik maritim i mas i gat. Hevi i kamap long marit bilong papamama inap kirapim yu long kisim ol pasin we bai mekim na yu kamap gutpela man marit o meri marit.

 Tripela samting yu mas mekim

 1. Toktok gut. Ol manmeri husat i no save kamapim bel hevi bilong ol, ol planti taim ol i mekim ol samting i bagarapim ol yet, olsem kalabus long ol drak o alkohol. Bilong helpim yu, bihainim ol dispela rot:

 Toktok long papamama. Sapos papamama wantaim o wanpela bilong tupela i laik stori toktok planti long yu long hevi bilong ol, long pasin isi strongim bel na tokim ol stret long hevi bilong ol i mekim wanem long yu. Sapos yu pilim hatwok long toktok long tupela, orait yu ken raitim pas long wanpela bilong ol o long tupela wantaim.

 Toktok wantaim wanpela pren yu trastim. Taim i gat wanpela husat inap putim gut yau long yu, dispela inap mekim gut bel bilong yu. Baibel i tok “trupela pren i save soim pasin laikim long olgeta taim na em i kamap olsem brata bilong yu long taim bilong hevi.”​—Provep 17:17.

 Toktok wantaim Krieta bilong yu. Oltaim “Man Bilong Harim ol prea,” God Jehova, i putim yau long yu. (Buk Song 65:2) Baibel i tok olsem yu ken ‘God i save wari long yu, olsem na yu mas putim olgeta hevi bilong yu long han bilong em.’​—1 Pita 5:7.

•   Olsem wanem? Husat em yu pilim olsem yu bai bosim bel na bihainim pasin isi long toktok wantaim em? Papa o mama?

•   Husat pren yu trastim (wanpela wanlain o man i bikpela pinis) inap sambai long yu?

•   Wanem wanpela hevi em yu inap beten long en?

 2. Bihainim ol senis

 Taim papamama i divos yu bai lain long nupela haus, nupela skul, nupela mak bilong mani, na ol nupela pren. Yes, dispela inap mekim na yu bel hevi na yu no pilim presa, na yu pilim olsem laip bilong yu i bagarap olgeta. Wanem samting inap helpim yu long mekim ol senis? Tingting tasol long wanem ol senis yu ken mekim we i stret long nupela sindaun bilong yu.

•   Wanem wanpela bikpela senis em yu inap mekim bikos long papamama bilong yu i divos?

•   Yu inap mekim wanem bilong bihainim dispela senis?

 3. Luksave long ol gutpela pasin bilong yu

 Taim papamama i divos dispela bai mekim yu wari na tingting planti, tasol dispela inap skulim yu long luksave long ol gutpela pasin bilong yu yet. Na yu inap kisim ol nupela pasin tu. Jeremy em papamama bilong em i divos taim em i gat 13 krismas, em i tok: “Papamama bilong mi i divos na dispela i mekim na mi lain long mekim planti samting. Mi fesbon pikinini, olsem na mi mekim planti samting bilong helpim mama na sapotim tu liklik brata bilong mi.”

•   Taim papamama i divos, yu luksave long sampela gutpela pasin bilong yu yet?

•   Yu laik wok strong long senisim wanem ol pasin?