Wanpela wok painimaut i soim olsem, 80 pesen bilong ol yangpela long Amerika i save beten, na 40 pesen tasol bilong ol i save beten long olgeta de. ‘Beten em rot bilong mekim yu pilim amamas tasol, o em bikpela samting moa?’

•  Beten em wanem samting?

•  God i save putim yau?

•  Mi inap beten long wanem ol samting?

•  Tok bilong ol wanlain

 Beten em rot bilong toktok wantaim Krieta i wokim olgeta samting. Dispela em narakain tru! Jehova i winim tru ol man, tasol “em i no stap longwe long yumi olgeta wan wan.” (Aposel 17:27) Baibel i gat dispela naispela invatesen: “Yupela i mas i go klostu long God, na em bai kam klostu long yupela.”—Jems 4:8.

 Hau bai yu inap go klostu long God?

•   Wanpela rot em beten—em hau yu inap toktok wantaim God.

•   Narapela rot em long stadi long Baibel—em hau God i toktok long yu.

 Dispela pasin bilong toktok wantaim God na God i toktok wantaim yu—beten na stadi long Baibel—bai helpim yu long strongim pasin pren bilong yu wantaim em.

 “Toktok long Jehova—toktok wantaim God Antap Tru—em wanpela bikpela samting tru man inap kisim.”—Jeremy.

 “Taim mi kamapim tingting bilong mi long Jehova long rot bilong beten, dispela i mekim na pilim olsem mi go klostu moa long em.”—Miranda.

 Sapos yu bilip long God—na yu beten long em—ating i hatwok long yu bilip olsem tru tru em i putim yau. Maski i olsem, Baibel i tok long Jehova olsem “Man Bilong Harim ol prea.” (Buk Song 65:2) Na tu em i tokim yu long “putim olgeta hevi bilong [yu] long han bilong em.” Wai? Bikos “God i save wari long [yu].”—1 Pita 5:7.

 Tingim: Yu save lusim sampela haptaim long toktok wantaim ol gutpela pren bilong yu long olgeta taim? Yu inap mekim wankain samting long God. Beten na toktok wantaim em long olgeta taim, na kolim nem bilong em, Jehova. (Buk Song 86:5-7; 88:9) Baibel i tok long yu mas “beten oltaim.”—1 Tesalonaika 5:17.

 “Beten em toktok namel long mi na Papa bilong mi long heven, em wanpela rot we mi save autim olgeta tingting bilong mi i stap long bel.”—Moises.

 “Mi save toktok wantaim Jehova long ol samting i bikpela samting long mi, wankain olsem mi inap toktok wantaim mama bilong mi o wanpela gutpela pren.”—Karen.

 Baibel i tok: “Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God.”—Filipai 4:6.

 Yu ting dispela i makim olsem yu ken beten na kamapim ol hevi bilong yu? Yes! Baibel i tok: “Olgeta hevi yu karim, yu mas putim long han bilong Jehova, na em bai strongim yu.”—Buk Song 55:22.

 Em tru, taim yu mekim long God, yu ken kamapim ol hevi bilong yu, tasol i gat ol narapela samting tu yu ken kamapim. Wanpela yangpela meri em Chantelle, i tok: “Sapos mi askim tasol long Jehova i ken helpim mi, dispela i no gutpela pasin pren. Mi pilim olsem pastaim mi mas tok tenkyu, na bihain kolim ol narapela samting we mi bin amamas long en.”

 Tingim: Yu amamas long wanem ol samting long laip bilong yu? Yu inap tingim tripela samting long dispela de em yu inap tok tenkyu long Jehova long en?

 “Maski ol liklik samting olsem, wanpela naispela plaua yumi laikim, inap kirapim yumi long beten na tok tenkyu long Jehova.”—Anita.

 “Tingim tingim long bel wanpela samting long kriesen we yu amamas long en o wanpela skripsa bilong Baibel em yu pilim tru, na tok tenkyu long Jehova long dispela.”—Brian.