Mipela ol Witnes Bilong Jehova i no save selebretim betde bikos mipela i bilip olsem God i no orait long ol kain bung olsem. Tru Baibel i no kolim stret olsem i tambu long mekim betde, tasol em i helpim yumi long kliagut long risen na ol i mekim ol dispela bung, na tu, long kliagut long tingting bilong God long ol dispela samting. Skelim 4-pela bilong ol dispela samting na ol stiatok bilong Baibel.

1.   Ol haiden i as bilong bung bilong betde. Wanpela buk (Funk & Wagnalls Standard Dictionary of Folklore, Mythology, and Legend) i tok, as bilong ol dispela bung em olsem ol man i ting long betde bilong wanpela man, “ol spirit nogut bai mekim nogut long em,” olsem na “taim ol pren bilong em i kam bung wantaim em na tokaut olsem ol gutpela samting i ken kamap long em, dispela bai lukautim em.” Narapela buk (The Lore of Birthdays) i tok olsem long bipo, ol i save raitim bon det bilong man bikos “ol i nidim bilong lukluk long horoskop” na bai save bilong “astroloji long lukluk long ol sta i helpim ol long save long ol samting bai kamap bihain.” Na tu, “ol i bilip olsem ol betde kandel i gat strong long kamapim ol samting man i laik mas painim em.”

    Baibel i tambuim pasin bilong mekim mejik, pasin bilong givim save long ol samting i stap hait, wok bilong ol spirit nogut, o ‘mekim kain pasin’ olsem. (Lo 18:14; Galesia 5:19-21) Wanpela as na God i bagarapim taun Babilon bilong bipo em bikos ol manmeri bilong dispela taun i save lukluk long ol sta bilong painimaut ol samting bai kamap bihain, em pasin bilong givim save long ol samting i stap hait. (Aisaia 47:11-15) Ol Witnes Bilong Jehova i no save lusim bikpela haptaim long painimaut as bilong olgeta wan wan kastam; tasol taim Baibel i tokaut klia long wanem ol pasin i no stret, orait mipela i save bihainim.

2.   Ol Kristen long bipo i no selebretim betde. Wanpela buk (The World Book Encyclopedia) i tok: “Ol Kristen i tingim pasin bilong selebretim betde bilong man olsem pasin bilong ol haiden.” Baibel i soim olsem ol aposel na ol arapela em Jisas i bin skulim, ol i mekim pasin em olgeta Kristen i mas bihainim.​—2 Tesalonaika 3:6.

3.   Wanpela bung em ol Kristen i mas mekim, em bilong tingim indai bilong Jisas, na i no betde. (Luk 22:17-20) Yumi no kirap nogut long dispela, long wanem, Baibel i tok: “De man i dai i gutpela moa winim de man i bon.” (Eklisiastis 7:1) I go inap long taim Jisas i dai, em i gat gutpela nem long ai bilong God, dispela i mekim na de em i dai i bikpela samting moa winim de em i bon.​—Hibru 1:4.

4.   Baibel i no stori long wanpela wokman bilong God i selebretim betde. Baibel i bin stori long betde, tasol dispela tupela betde wantaim i bilong ol man i no lotuim God. Na ol samting nogut i bin kamap long ol dispela bung.​—Stat 40:20-22; Mak 6:21-29.

 Wankain olsem ol arapela gutpela papamama, ol Witnes i soim olsem ol i laikim ol pikinini bilong ol long ol samting ol i mekim insait long yia olgeta, dispela i makim tu olsem ol i save givim presen long ol pikinini na mekim ol bung bilong amamas wantaim. Ol papamama i bihainim gutpela pasin bilong God, em man bilong givim ol gutpela samting long ol pikinini bilong em long kain kain taim. (Matyu 7:11) Ol pikinini bilong ol Witnes i no bel hevi olsem ol i no selebretim betde, lukim sampela tok ol i kamapim:

•   “Yu amamas moa taim yu kisim presen long taim yu no ekspektim.​—Tammy, 12-pela krismas.

•   “Tru papamama i no save givim presen long betde bilong mi, tasol ol i save givim mi ol presen long ol narapela taim. Mi laikim olsem bikos mi no ekspektim.”​—Gregory, 11-pela krismas.

•   “Yu ting 10-pela minit, sampela kap keik, na wanpela singsing em wanpela pati? Yu mas kam long haus bilong mi na bai yu lukim tru tru pati em wanem kain!”​—Erik, 6-pela krismas.