Yes, ol Witnes Bilong Jehova i save givim helpim taim disasta i kamap. Mipela i save helpim ol wanbilip na ol narapela em ol i no Witnes, na givim ol samting ol i nidim olsem haus, klos, na kaikai. Dispela i stret wantaim tok bilong Baibel long Galesia 6:10: “Yumi mas mekim gutpela pasin long olgeta man, tasol moa yet long ol wanbilip.” Na tu, ol manmeri i save bel hevi tru taim disasta i kamap, olsem na mipela i save helpim long strongim na mekim isi bel na tingting bilong ol, na helpim ol long pas gut yet wantaim God.—2 Korin 1:3, 4.

 Bihain long disasta, ol elda bilong ol kongrigesen long hap we disasta i kamap long en, ol i save traim long kontektim olgeta husat i stap long ol dispela kongrigesen, na painimaut sapos olgeta i stap seif, na painimaut tu long ol samting ol i nidim. Bihain long dispela, ol elda i save salim ripot bilong dispela wok painimaut na fes rilif wok bilong ol i go long brens ofis bilong ol Witnes Bilong Jehova.

 Sapos rilif wok i bikpela tumas na ol kongrigesen long dispela hap i nidim helpim, orait Gavening Bodi Bilong Ol Witnes Bilong Jehova bai stretim rot long givim ol samting ol i nidim. Dispela i wankain long hau ol Kristen bilong pastaim i bin helpim narapela narapela long taim bilong bikpela hangre. (1 Korin 16:1-4) Brens ofis long olgeta wan wan kantri i makim ol Disasta Rilif Komiti long oganaisim na stiaim rilif wok. Ol Witnes i stap long ol narapela hap i save volantia long givim taim, mani, na ol narapela samting long sapotim dispela wok.—Provep 17:17.

 Wanpela rot bilong yusim ol donesen ol man i salim i kam long ol brens ofis bilong ol Witnes Bilong Jehova, em long helpim ol lain i kisim hevi long disasta. (Aposel 11:27-30; 2 Korin 8:13-15) Ol volantia long rilif wok i no save kisim pe long wok ol i mekim, olsem na mani bilong rilif wok i save go stret long baim ol samting ol manmeri i nidim, na i no bilong baim ol samting bilong helpim ol lain i oganaisim dispela wok. Mipela i save yusim gut olgeta donesen.—2 Korin 8:20.