Ol lain i bin kisim baptais olsem wanpela Witnes Bilong Jehova, tasol ol i no autim tok moa, na i no bung moa wantaim ol wanbilip, mipela i no save givim baksait long ol, nogat. Mipela i save helpim ol na kirapim ol long tingim ol samting bilong lotu.

 Mipela i no save rausim nating wanpela husat i mekim bikpela rong. Tasol sapos wanpela Witnes husat i baptais pinis, i insait long pasin bilong brukim ol lo bilong Baibel long stretpela pasin na i no tanim bel, orait kongrigesen bai rausim em o givim baksait long em. Baibel i tok klia: “Yupela i mas rausim man nogut i stap namel long yupela.”​—1 Korin 5:13.

 Olsem wanem long man em kongrigesen i rausim em, tasol meri na ol pikinini bilong em ol i Witnes Bilong Jehova? Em i no inap mekim moa ol samting bilong lotu wantaim ol. Tasol em i stap yet olsem man bilong dispela meri na papa bilong ol pikinini na ol i ken mekim yet ol narapela samting ol i save mekim wantaim olsem famili.

 Ol lain em kongrigesen i rausim ol, ol i ken kam long ol bung bilong lotu bilong mipela. Sapos ol i laik, ol inap kisim ol gutpela tok bilong Baibel long ol elda bilong kongrigesen bilong helpim ol. Ol i mekim olsem bikos ol i laik helpim man long winim gen mak bilong stap gen olsem wanpela Witnes Bilong Jehova. Ol lain i bin raus long kongrigesen, tasol sapos ol i kirap sakim ol pasin nogut na ol i kamapim klia olsem ol i laik bihainim ol lo bilong Baibel, orait ol inap long stap gen olsem wanpela Witnes Bilong Jehova.