Ol Witnes Bilong Jehova i rispektim ol gavman na samting ol i yusim bilong makim kantri bilong ol. Mipela i orait long disisen ol narapela i mekim long kolim pledge o tok i litimapim kantri, salutim fleg, na singim nesenel entem.

 Tasol mipela ol Witnes Bilong Jehova i no insait long ol dispela bung bikos mipela i bilip olsem ol i pait wantaim ol tok Baibel i kamapim. Mipela bai amamas long ol man i givim wankain rispek long bilip bilong mipela olsem mipela i mekim long ol narapela husat i mekim narapela disisen.

Long dispela atikol

•  Wanem ol stiatok bilong Baibel i stori long dispela samting?

•  Olsem wanem sapos lo i tok long yumi mas insait long ol dispela bung?

•  Yu ting ol Witnes Bilong Jehova i laik sapotim wanpela lain o lain politik?

 Dispela tupela stiatok bilong Baibel i stiaim disisen bilong mipela:

•   Yumi mas lotuim God wanpela tasol. Baibel i tok: “Yu mas lotu long Jehova, God bilong yu, na yu mas mekim wok bilong em wanpela tasol.” (Luk 4:8) Planti taim ol pledge na nesenel entem bilong kantri i kamapim ol tok promis bilong stap gut long kantri winim olgeta narapela samting. So ol Witnes Bilong Jehova i pilim olsem bel bilong ol bai i gat tok long insait long ol dispela kain bung.

   Ol Witnes Bilong Jehova i bilip olsem pasin bilong salut long fleg i wankain long pasin bilong lotuim ol imis, em samting Baibel i tambuim. (1 Korin 10:14) Sampela saveman i tok ol fleg bilong kantri em ol mak bilong lotu. Saveman Carlton J. H. Hayes,  a i tok: “Fleg em nambawan samting bilong kantri long makim bilip, na em i nambawan samting bilong kantri ol man i lotu long en.” Wanpela man bilong raitim ol samting i painim ol Kristen long bipo, em Daniel P. Mannix, i tok: “Ol Kristen i no laik. . . mekim sakrifais long was spirit bilong empera [bilong Rom]—wankain olsem sampela long nau i no laik salut long fleg.” b

  Maski ol Witnes Bilong Jehova i no save salut long fleg, mipela i no save mekim ol samting bilong bagarapim, kukim, o mekim ol narapela samting bilong soim olsem mipela i no rispektim fleg na ol narapela samting bilong makim kantri.

•   Olgeta man i wankain long ai bilong God. (Aposel 10:34, 35) Baibel i tok “long rot bilong wanpela man em i kamapim olgeta lain man.” (Aposel 17:26) Dispela em risen na ol Witnes Bilong Jehova i bilip olsem i no stret long givim biknem long wanpela lain o kantri winim ol narapela. Yumi mas rispektim olgeta man, maski ol i bilong wanem ples o ol i stap long wanem ples.​—1 Pita 2:17.

 Ol Witnes Bilong Jehova i no save birua long gavman. Mipela i bilip olsem ol gavman i hap bilong “wanpela wok bilong God” na em yet i larim ol i stap. (Rom 13:1-7) Na tu, mipela i bilip olsem ol Kristen i mas bihainim tok bilong ol man i mekim wok bos.​—Luk 20:25.

 Olsem wanem sapos lo bilong gavman i pait wantaim lo bilong God? Sampela taim i stret long askim gavman long em inap senisim lo. c Tasol sapos gavman i no inap long senisim lo, long pasin rispek ol Witnes Bilong Jehova i ‘bihainim tok bilong God tasol, na i no bilong ol man.’​—Aposel 5:29.

 Nogat. Ol Witnes Bilong Jehova i no save sapotim wanpela lain o lain politik. Taim mipela i no insait long kolim pledge, salutim fleg, o singim nesenel antem, dispela i no makim olsem mipela i birua long wok politik. Nogat, mipela i bihainim tok Baibel i mekim long ol kain bung olsem.