Nogat, ol Witnes Bilong Jehova i no save givim namba 10 hap bilong mani ol i kisim; ol i save givim donesen long laik bilong ol yet bilong sapotim wok. Givim namba 10 hap—wanem mining bilong en? Bilong wanem ol Witnes Bilong Jehova i no bihainim pasin bilong givim namba 10 hap?

 Dispela lo bilong givim namba 10 hap bilong ol samting, em hap bilong Lo em God i bin givim long lain Israel bilong bipo. Tasol Baibel i kamapim klia olsem ol Kristen i no stap aninit long dispela Lo​—wantaim lo bilong “kisim namba 10 hap bilong ol samting long ol manmeri”.​—Hibru 7:​5, 18; Kolosi 2:​13, 14.

 Ol Witnes Bilong Jehova i bihainim pasin bilong ol Kristen bilong bipo na ol i sapotim wok long 2-pela rot: ol i no kisim pe long wok ol i mekim long autim tok na skulim ol man, na ol i givim donesen long laik bilong ol yet.

 Olsem na mipela i bihainim tok Baibel i givim long ol Kristen: “Olgeta wan wan i ken givim samting ol i pasim tok long bel long givim. Ol i no ken bel hevi na givim na narapela i no ken fosim ol long givim bikos God i save laikim tumas man husat i amamas long givim samting.”​—2 Korin 9:7.