Ol Witnes Bilong Jehova i Protestan o Nogat?

PLEI

Nogat. Ol Witnes Bilong Jehova ol i Kristen, tasol mipela i no tingim mipela yet olsem ol Protestan. Bilong wanem?

Wanpela dikseneri i tok Protestan em wanpela “lain lotu i sakim Misin Katolik.” Em tru olsem mipela ol Witnes Bilong Jehova i no wanbel wantaim ol tok em Misin Katolik i skulim ol man long en, tasol mipela i no tingim mipela yet olsem ol Protestan, na em hia ol risen:

Sampela bilip bilong ol Protestan i no stret wantaim tok bilong Baibel. Eksampel, Baibel i tok “i gat wanpela God tasol i stap,” i no God Triwan. (1 Timoti 2:5; Jon 14:28) Na Baibel i tokaut stret olsem God i save givim panismen long ol man nogut, ol i no inap kisim bagarap long helpaia, nogat, ol bai “bagarap inap oltaim.”—Buk Song 37:9; 2 Tesalonaika 1:9.
Mipela i no protes o traim long stretim Misin Katolik o narapela lain lotu. Mipela i autim gutnius bilong Kingdom Bilong God, na traim long helpim ol narapela long bilip long dispela gutnius. (Matyu 24:14; 28:19, 20) Mipela i no gat tingting long stretim ol narapela lotu, nogat, mipela i laik helpim ol lain i gat gutpela bel na skulim ol long tok i tru bilong God na Baibel.—Kolosi 1:9, 10; 2 Timoti 2:24, 25.