Nogat, ol Witnes Bilong Jehova i no wanpela lain kalt. Mipela i Kristen na mipela i traim bes long bihainim eksampel bilong Jisas Krais na bihainim ol tok em i bin skulim ol man long en.

 Ol man i gat kain kain tingting long dispela wed “kalt.” Tasol skelim 2-pela tingting em planti man i gat long kalt na bilong wanem ol dispela tingting i no stret wantaim pasin mipela i bihainim.

•   Sampela i ting kalt em nupela lotu o wanpela lotu we i no bihainim ol bilip we olgeta narapela lotu i wanbel long en. Ol Witnes Bilong Jehova i no bin kamapim wanpela nupela lotu, nogat. Long sait bilong lotu, mipela i bihainim eksampel bilong ol Kristen long taim bilong ol aposel, na mipela i bihainim tu ol tok ol i bin skulim ol man long en, na olgeta dispela tok i stap long Baibel. (2 Timoti 3:​16, 17) Mipela i bilip olsem i stret long Baibel tasol i makim wanem ol pasin i stret long sait bilong lotu.

•   Sampela i ting kalt em wanpela lotu we i no seif na wanpela man long graun i stap lida bilong en. Ol Witnes Bilong Jehova i no bihainim wanpela man long graun olsem lida bilong ol. Mipela i bihainim dispela tok em Jisas i bin givim long ol disaipel bilong em taim em i tok: “Yupela i gat wanpela Lida tasol, em Krais.”​—Matyu 23:10.

 Ol Witnes Bilong Jehova i no wanpela kalt we inap nogutim ol man, nogat, ol i bihainim ol samting ol i lainim na dispela i helpim ol yet na ol narapela insait long komiuniti. Eksampel, wok autim tok bilong mipela i bin helpim planti manmeri long lusim ol pasin we i bagarapim bodi na tingting, olsem pasin bilong kisim drak na dring planti alkohol tumas. Na tu, mipela i save mekim skul bilong rit na rait long olgeta hap bilong graun na dispela i helpim planti tausen manmeri long lain long rit na rait. Na mipela i save insait tru long wok bilong disasta rilif. Mipela i wok strong long kirapim ol manmeri long mekim gutpela pasin, olsem Jisas i bin tokim ol disaipel bilong em long mekim.​—Matyu 5:​13-​16.