Yes. Mipela i Kristen, na em hia ol risen:

•   Mipela i traim bes long bihainim gut ol tok na ol pasin bilong Jisas Krais.—1 Pita 2:21.

•   Mipela i bilip olsem Jisas em i rot bilong kisim laip bikos “i no gat narapela nem long graun em God i makim namel long ol manmeri bilong kisim bek yumi.”—Aposel 4:12.

•   Taim ol manmeri i kamap Witnes Bilong Jehova, ol i kisim baptais long nem bilong Jisas.—Matyu 28:18, 19.

•   Mipela i yusim nem bilong Jisas olsem rot bilong salim beten long God.—Jon 15:16.

•   Mipela i bilip olsem Jisas em Het, o man God i makim long bosim olgeta manmeri.—1 Korin 11:3.

 Tasol sampela samting i mekim na mipela i no wankain long ol narapela lotu i gat nem Kristen. Eksampel, mipela i bilip olsem Baibel i tok Jisas em i Pikinini Bilong God, na em i no join long wanpela God Triwan. (Mak 12:29) Mipela i no bilip olsem man i gat wanpela spirit i no save dai, o God bai givim bikpela pen long ol man long helpaia inap oltaim oltaim, o ol bikman bilong lotu i mas gat ol biknem i makim olsem ol i winim ol narapela, bikos Baibel i no sapotim ol dispela bilip.—Eklisiastis 9:5; Esekiel 18:4; Matyu 23:8-10.