Tok giaman: Ol Witnes Bilong Jehova i no bilip long marasin o medikal tritmen.

 Tok tru: Mipela i save kisim bes marasin na tritmen bilong helpim mipela yet na famili bilong mipela. Taim mipela i sik, mipela i save go long ol dokta husat i save gut long givim medikal helpim, na ol inap mekim operesen na i no yusim blut. Mipela i amamas long ol nupela save bilong ol dokta long sait bilong helpim ol sikman. Ol i bin kamapim ol tritmen we i no gat blut long en, na ol i yusim ol dispela tritmen long helpim ol Witnes, tasol nau ol i yusim ol dispela tritmen long helpim tu olgeta lain long komiuniti. Long planti kantri, ol sikman inap mekim disisen long abrusim blut, na dispela i lukautim ol na ol i no kisim ol sik we binatang bilong ol i stap insait long blut, na i no gat wanpela samting inap bagarapim imiun sistem, na ol i no inap kisim hevi long popaia bilong ol dokta.

 Tok giaman: Ol Witnes Bilong Jehova i holim tingting olsem bilip bai oraitim ol sik bilong man.

 Tok tru: Mipela i no save tingim bilip olsem mirakel bilong oraitim ol sikman.

 Tok giaman: Taim man i no kisim blut, em bai tromoi bikpela mani tru long kisim narapela tritmen.

 Tok tru: Taim man i no kisim blut, em inap baim ol medikal tritmen we i no gat bikpela pe long en. a

 Tok giaman: Planti Witnes, na ol pikinini tu, i dai long olgeta yia bikos ol i no laik kisim blut.

 Tok tru: Dispela tok i no gat as bilong en. Oltaim ol dokta i save wokim ol bikpela operesen bilong stretim sampela hap bilong bodi olsem lewa, ol bun na ol masol, na putim kidni o liva bilong narapela man long bodi bilong sikman, na ol i no save yusim blut. b Ol sikman, na ol pikinini tu, husat i no kisim blut, ol i save kamap orait kwiktaim, na sampela taim ol i orait moa winim ol sikman i bin kisim blut. c Olsem na i no gat wanpela man inap tok stret olsem sikman bai dai bikos em i no kisim blut, o em bai stap laip bikos em i kisim blut.

 Tok bilong Baibel i as bilong dispela disisen, na dispela disisen i no kirap long sait bilong marasin. Olpela na Nupela Testamen wantaim i tokim yumi stret olsem yumi no ken kisim blut. (Stat 9:4; Wok Pris 17:10; Lo 12:23; Aposel 15:28, 29) Na tu, God i tingim olsem laip i stap insait long blut. (Wok Pris 17:14) So mipela i no kisim blut bikos mipela i bihainim tok bilong God, na tu, mipela i rispektim em olsem Man bilong givim laip.

 Long bipo, ol lain dokta i holim tingting olsem, sapos sikman i sakim blut na em i laik kisim ol tritmen we ol i no yusim blut long en, dispela em bikpela rong, na i olsem man i laik suasaid. Tasol dispela tingting i senis long nau. Eksampel, long 2004, atikol long wanpela medikal magasin i tok “ol dokta i bin kamapim planti tritmen na wei bilong mekim ol operesen taim ol i laik helpim ol sikman em ol i Witnes Bilong Jehova, na dispela bai kamap nomol tritmen na wei bilong helpim olgeta sikman long ol yia bihain.” d Long 2010, wanpela atikol long magasin Heart, Lung and Circulation i tok, “taim ol dokta i mekim nomol wok bilong ol long operetim ol man, ol i mas bihainim wei bilong ‘mekim operesen we ol i no yusim blut,’ na ol i mas yusim dispela wei long helpim olgeta narapela sikman, na i no long ol Witnes Bilong Jehova tasol.”

 Long nau, planti tausen dokta long olgeta hap i bihainim ol nupela wei bilong mekim operesen na planti blut i no lus, olsem na ol bikpela operesen inap kamap na i no gat nid long givim blut long man. Long ol kantri i no gat planti mani, ol dokta i wok long bihainim ol dispela nupela wei bilong helpim ol sikman, na planti sikman i save rikwes long kisim ol dispela tritmen maski ol i no Witnes Bilong Jehova.