Olgeta yia, planti tausen manmeri i save visitim brens ofis na hetkota bilong ol Witnes Bilong Jehova long New York, Amerika. Ol i kolim ol dispela ples Betel, em tok Hibru na mining bilong en em “Haus Bilong God.” Ol lain i save kam long olgeta hap long lukim wok bilong prinim na redim ol litresa, hau mipela i oganaisim wok bilong mipela, na tu, ol i kam long visitim ol poroman bilong ol husat i wok long Betel. Wanpela bilong ol dispela visita i bin i gat strongpela laik stret long mekim dispela raun.

Marcellus, wanpela Witnes Bilong Jehova husat i stap long Anchorage, Alaska, Amerika, em i gat hevi long toktok, long wanem, em i bin kisim sik strok sampela yia i go pinis. * Em i yusim wilsia na em i nidim ol narapela long helpim em long mekim ol samting long olgeta wan wan de. Maski em i gat ol dispela hevi, em i gat bikpela laik stret long go visitim Betel. I no longtaim i go pinis, dispela laik bilong em i bin kamap tru.

Corey em wanpela poroman husat i bin helpim Marcellus long oganaisim raun bilong em long visitim Betel, na Cory i tok: “Em i save ringim mi olgeta de long sekim sapos olgeta samting i orait long raun bilong em. Marcellus i hat long mekim planti toktok, na em inap tasol long tok ‘Yes’ na ‘No.’ Mi gat ol askim bilong givim long em taim em i ring.” Toktok bilong tupela i kain olsem:

“Yu laik bai mi kam long haus bilong yu?”

“No.”

“Yu laik bai mi ringim dokta?”

“No.”

“Yu laik save long raun bilong yu long Betel?”

“Yes.”

“Orait mi save eksplenim ol samting mi mekim bilong stretim raun bilong em. Mi amamas stret olsem em i winim mak em i bin putim.”

Marcellus i winim sampela samting we i laik pasim rot bilong em. Em i no gat planti mani, olsem na em i bungim mani inap tupela yia long baim rot bilong i go long New York, na rot em longpela inap 5,400 kilomita. Em yet i no inap long muv na mekim ol samting, olsem na em i nidim wanpela poroman long raun wantaim em na helpim em. Na tu, em i mas kisim tok orait long dokta bilong em paslain long em i go, na dispela tok orait i kam sampela de tasol paslain long em i kalap long balus.

Taim Marcellus i kamap long New York, em i visitim ol hap bilong brens ofis na hetkota long Brooklyn, Patterson, na Wallkill. Em i lukim ol traipela masin i prinim ol buk na ol Baibel, na em i lain long olsem wanem mipela i oganaisim wok lotu bilong mipela. Em i lukim tu ol displei seksen bilong “Baibel na Nem Bilong God” na “Ol Manmeri i Karim Nem Bilong Jehova.” Long ol dispela visit, em i bungim planti nupela poroman. Dispela em wanpela raun we i spesel tru!

Planti bilong ol lain husat i bin raun long Betel, ol i tok dispela raun i spesel tru na i no gat wanpela tok bai inap long kamapim tru filing bilong ol. Tasol taim mipela i askim Marcellus sapos em i bin amamas long raun bilong em long Betel, em i tok: “Yes. Yes. Yes!”

Olsem Marcellus, sapos yu na famili bilong yu tu i go raun long Betel, dispela inap strongim yupela. Olgeta lain i welkam long visitim ol brens ofis bilong mipela long olgeta hap bilong graun. Plis kam na visitim mipela!