Ol Yangpela i Kisim Helpim Long Daunim Buli Pasin Long Skul
Hugo i gat 10-pela krismas, na em i kisim wanpela prais, Diana Award, long wanpela lain long Briten long wok em i mekim bilong helpim ol wanskul bilong em long daunim pasin bilong buli.
Hugo i tok: “Mi laik tok tenkyu long dispela waitbot vidio Sakim Pasin Buli na Yu No Ken Pait. Mi kamap gutpela ambasada long sait bilong daunim pasin bilong buli bikos mi lainim ol samting long dispela vidio long jw.org.”
“Buli pasin i bagarapim planti pikinini long olgeta de . . . , tasol . . . yu ken mekim sampela samting.” (Hap tok i kam long Sakim Pasin Buli na Yu No Ken Pait)
Pastaim Hugo i soim dispela vidio Sakim Pasin Buli long ol tisa bilong em. Ol tisa i amamas tru long dispela vidio, olsem na ol i stretim rot na olgeta sumatin inap yusim websait bilong jw.org. Long nau, planti sumatin long skul bilong Hugo em krismas bilong ol i namel long 8 na 10, ol i save yusim jw.org long olgeta taim. Ol i tok websait i helpim ol long daunim hevi bilong buli, na tu, ol inap kisim bekim bilong askim olsem, Hau mi inap painim ol gutpela pren?
Ol Gutpela Rot i Helpim Ol Yangpela
Long narapela skul long Briten, ol wanskul i save buli long Elijah husat i gat 8-pela krismas. Em na famili bilong em i skelim gut dispela vidio Sakim Pasin Buli. Ol i prektis wantaim long mekim ol tok em bai mekim na ol samting em bai mekim taim ol narapela i buli long em. Dispela i strongim Elijah long daunim dispela hevi. Bihain, long wik we ol i mekim ol bung na ol narapela samting bilong daunim pasin buli, hetmasta bilong Elijah i soim dispela vidio long olgeta lain long skul.
Pasin buli em i no hevi bilong Briten tasol, nogat. Em i kamap long olgeta hap bilong graun, na dispela waitbot vidio i helpim ol yangpela long olgeta hap.
Long Yunaitet Stets, Ivie em liklik gel i gat 10-pela krismas, na em i save pret long wanpela wanskul bilong em husat i save buli long em. Bihain long em i watsim vidio Sakim Pasin Buli, Ivie i kisim strong long feisim dispela gel. Na tu, em i toktok long tisa bilong em na tisa i helpim em. Dispela wanskul i tok sori, na nau em na Ivie i save pas gut wantaim.
Ol Witnes Bilong Jehova i tingim tru ol yangpela. Mipela bai wok yet long kamapim ol gutpela edvais bilong helpim ol long daunim ol hevi bilong wan wan de, olsem pasin buli.