Taim ol man i kisim bikpela sik, ol inap tingting planti, na sapos i gat nid long ol i mas slip long haus sik, dispela i save mekim ol i bel hevi moa yet. Olsem na wanpela ripot long nius magasin bilong ol saveman bilong helt i tok, “wok painimaut i soim olsem sapos sikman i stap belgut, na tu, em i harim ol tok i strongim bilip bilong em, dispela i save helpim em tru.” *

Olsem na ol Witnes Bilong Jehova i tingim ol wanlotu bilong ol husat i sik na stap long haus sik, na ol i givim helpim we i strongim bilip bilong ol wanlotu, na helpim ol long ol narapela samting tu. Ol elda i save gopas long visitim ol lain insait long kongrigesen taim ol i sik. Tasol olsem wanem sapos wanpela Witnes i sik na em i kisim helpim long haus sik i stap long narapela ples? Long ol bikpela siti long olgeta hap bilong graun, ol Witnes Bilong Jehova i oganaisim wanpela grup bilong visitim ol sikman, em Patient Visitation Groups (PVG). Oltaim ol elda insait long ol dispela grup i save visitim ol haus sik long helpim ol Witnes husat i sik na helpim tu famili bilong ol husat i kam long ol narapela hap bilong kantri, o ol i kam long ol narapela kantri, long kisim helpim long haus sik. Winim 28 tausen volantia i stap insait long 1,900 grup bilong PVG long 6-pela kontinen. *

William em memba bilong PVG na em i tok: “Mi inap stap na toktok na putim yau long ol Witnes na ol wanfamili bilong ol husat i no Witnes, na dispela i bin mekim gut bel bilong ol. Mi strongim ol long holim tingting olsem God Jehova i save long hevi bilong ol na em i tingim ol. Ol sikman wantaim famili bilong ol i save amamas tru taim mi beten wantaim ol.”

Visit bilong ol PVG i helpim tru planti lain, olsem na ol i bin mekim ol tok amamas. Daunbilo em sampela tok amamas i kam long ol lain long Amerika we inap olsem 7,000 memba bilong PVG i save visitim ol sikman.

• Priscilla i tok: “Tenkyu long visitim papa bilong mi long haus sik bihain long em i kisim sik strok. Em i pilim tru ol visit bilong yupela! Em i amamas tru long dispela naispela sevis. Mi pilim olsem ol visit bilong yupela i bin helpim em long kamap orait kwiktaim.”

• Ophilia, em pikinini meri bilong sikmeri husat i dai, na em i tokim mausman bilong PVG olsem: “Ol visit bilong yupela i bin helpim tru mama bilong mi! Em i save olsem Jehova i bin salim yupela i kam. Tenkyu long naispela pasin bilong yupela long tingim em.”

• Wanpela sikman i bel hevi na tingting planti taim em i harim olsem em bai stap laip inap sampela de tasol. James, em memba bilong PVG, em i lusim haptaim long stap wantaim dispela sikman na stori long em long Filipai 4:​6, 7. James i tok: “Taim mi visitim em long neks de, tingting bilong em i senis olgeta. Nau em i holim stretpela tingting long helpim i kam long Jehova, na mi pilim olsem em i bin strongim mi!”

Pauline, em man bilong em i dai long haus sik i stap longwe long ples, em i tok: “Tenkyu tru long helpim yupela i bin givim long mipela long dispela taim nogut tru i bin painim famili bilong mipela. Taim mipela i harim olsem yupela bai stap long haus sik na bungim mipela long biknait, maski yupela bai go long wok long neks de, dispela i bin mekim gut bel bilong mipela. Tenkyu long stretim rot bilong mipela olgeta 11-pela long kisim ples slip, na oltaim yupela i save sekim mipela. Mi tok tenkyu long Jehova na oganaisesen bilong em long redim kain helpim olsem we i mekim gut bel bilong mipela.”

Nicki, Gayle, na Robin i kisim eksiden taim ol i lusim ples bilong ol na ol i stap longwe inap olsem 300 kilomita. Carlos, em memba bilong PVG, em i kisim toksave na em i go stap long haus sik na bungim ol taim ol i kamap. Carlos i tok: “Mi tokim ol olsem mi redi long helpim ol long olgeta kain samting ol i nidim, olsem na mi holim liklik dok bilong Nicki taim em i go long ol nes na dokta bai helpim em.” Bihain Curtis, narapela memba bilong PVG, em i kam wantaim meri bilong em. Ol i stap long haus sik i go inap long ol wanfamili bilong ol dispela bratasista i kam kamap sampela aua bihain. Wanpela man i tok: “Olgeta tripela i belgut long ol inap kisim helpim. Tasol Robin, em susa bilong Nicki na em i no wanpela Witnes Bilong Jehova, em i pilim tru helpim i kam long ol memba bilong PVG.”