Olsem planti kantri, Australia i gat populesen bilong ol lapun manmeri we i wok long go bikpela tru. Sampela lapun i muv i go long ol haus bilong lukautim ol lapun we ol wokman i save helpim ol gut long sait bilong helt, na ol samting ol i nidim long wan wan de.

Planti haus bilong lukautim ol lapun i nidim ol narapela helpim tu. Sampela taim ol lapun i pilim boring, wanpis, o ol i no gat strong. Ol Witnes Bilong Jehova i save bringim hop na mekim isi bel bilong ol taim ol i visitim 2-pela haus bilong lukautim ol lapun long olgeta wik long Portland, wanpela taun long Victoria, Australia.

Ol Witnes long Australia i save bung wantaim wanpela grup bilong ol lapun na stori long ol topik bilong Baibel, ol topik olsem ol bikpela wok long laip bilong Jisas. Jason i tok: “Mipela i save ritim wanpela hap bilong Baibel wantaim ol lapun, na bihain mipela i stori wantaim ol long dispela tok.” Planti bilong ol lapun i stap long dispela grup i karim bikpela hevi bilong sik, ol Witnes Bilong Jehova i givim ol hop na strongim ol long rot bilong stori long ol tok promis bilong God long pinisim sik na dai.

Tony, wanpela asples Witnes i tok: “Mipela i kirapim ol visit inap 30 minit, tasol ol lapun i laik bai mipela i lusim sampela moa taim wantaim ol. So nau, mipela i stori inap 1pela aua maski wanpela lapun i tok em i laikim mipela long stori inap 2-pela aua.” Sampela bilong ol lapun i aipas, sampela i slip tasol long bet, o sampela i no inap holim ol samting, olsem na ol Witnes i save helpim ol na kirapim ol long insait long grup stadi.

Long dispela visit tu, ol Witnes na ol lapun i save singim sampela singsing bilong litimapim nem bilong God, na planti taim ol lapun i save askim long sampela moa singsing. John, * wanpela bilong ol lapun i tok: “Mipela i laikim ol musik yupela i bringim. Em i helpim mipela long kliagut na rispektim God.” Judith, em wanpela lapun husat i aipas, i bin tingim tingim olgeta tok bilong feiveret singsing bilong em!

Ol Witnes i tingim tru ol lapun wan wan. Wanpela volantia nem bilong em Brian i tok olsem sapos ol lapun i no pilim orait, ol Witnes i save visitim ol long rum bilong ol. “Mipela i stori wantaim ol na sekim sapos ol i orait. Sampela taim mipela kam bek long narapela de long lukim sapos ol i stap orait.”

Planti ol lapun i amamas tru long ol dispela visit. Peter, husat i save go long ol dispela grup stadi long olgeta wik i tok: “Mi no inap wet long go long dispela bung.” Judith i save tokim wokman i lukautim em olsem: “Em Trinde! Plis redim mi bilong Baibel stadi grup bilong mi. Mi no laik go leit!”

Ol lapun i enjoim ol samting ol i lainim, na ol i go klostu long God winim long bipo. Bihain long ol i skelim ol tok Jisas i skulim, Robert i tok: “Mi no save kliagut long dispela tok long Baibel. Tasol nau mi kliagut!” David i lain olsem em bikpela samting long beten, na em i tok: “Dispela i helpim mi long gat pasin pren wantaim God na em i stap olsem wanpela man tru.”

Ol lapun i save amamas long kisim save long ol tok promis bilong God long Baibel long ol samting bai kamap bihain. Wanpela lapun nem bilong em Lynette i tokim ol Witnes olsem: “Tenkyu long bringim ol gutpela tok bilong mekim isi bel bilong mipela.” Narapela lapun meri i tok: “God i salim yupela i kam long mipela.”

Margaret i bin enjoim stret ol visit bilong ol Witnes olsem na nau em i save go long ol miting bilong ol Witnes Bilong Jehova long Haus Kingdom. Em i mekim bikpela hatwok tru bikos helt bilong em i no gutpela na em i no inap wokabaut tumas. Em i tokim ol Witnes: “Yupela i givim mipela olgeta samting yumi wet long en.”

Ol wokman tu i amamas long ol visit bilong ol Witnes. Anna, wanpela asples Witnes i tok: “Ol wokman i save kirapim ol lapun long kam long ol dispela grup stadi bikos ol i luksave olsem long pinis bilong dispela bung ol lapun i save luk amamas. Brian, em yumi stori long en, em i tok: “Ol wokman i gat gutpela pasin na ol i wok bung wantaim. Ol i save painim rot bilong helpim ol lapun.”

Ol famili bilong ol lapun i amamas long lukim olsem ol lapun i enjoim ol grup stadi. Wanpela pikinini meri bilong wanpela lapun i mekim tok amamas long ol Witnes na em i tok: “Yupela i mekim gutpela samting long mama bilong mi.”