Long taun Tabasco long Meksiko, namba bilong ol manmeri i suasaid i go antap tru. Olsem na long yia 2017, ol Witnes Bilong Jehova i oganaisim wanpela spesel kempein bilong 2-pela mun long tilim gen Kirap! bilong Epril 2014 we i gat dispela het tok, “No Ken Tingting Long Suasaid​—Tripela Risen Long Stap Laip.” Dispela kempein i bin helpim tru ol manmeri.

Faustino, wanpela Witnes Bilong Jehova, i toktok wantaim wanpela meri husat i wari long pikinini man bilong em i gat 22 krismas. Dispela yangpela man i gat sik dipresen na em i bin traim long suasaid. Mama i no save long hau em bai helpim pikinini. Tasol taim Faustino i givim magasin, mama bilong pikinini i tok, “Pikinini bilong mi i nidim stret dispela samting.” Long neks de, Faustino i visitim pikinini bilong dispela meri, na ol i stori long ol tok bilong Baibel i stap long dispela magasin. Faustino i visitim yet dispela yangpela man, na bihain long sampela visit, dispela yangpela i holim gen stretpela tingting. Faustino i tok: “Long nau em i stap bel isi moa na amamas.” Na brata bilong em tu i gat sik dipresen, olsem na em i save stori long brata bilong em long ol samting em i lainim.

Karla i stap long taun Huimanguillo, na em i yusim dispela magasin long helpim klasmeit bilong em. Karla i tok: “Mi luksave olsem wanpela gel long klas i stap bel hevi, na em i gat 14 krismas. Mi toktok wantaim em na em i stori long sindaun bilong famili bilong em. Taim mipela i stori, mi luksave olsem em i gat ol mak mak long left han bilong em.” Dispela gel i save katim han na lek bilong em. Em i pilim olsem em i no luk gutpela moa na laip bilong em i no gat mining. Karla i soim magasin Kirap! long em. Bihain long em i ritim, em i tokim Karla olsem ol i raitim dispela magasin long em stret. Em i smail na tok nau em i bilip olsem i gat risen long em i stap laip.

Long taun Villahermosa, wanpela man i bungim bikpela hevi. Ol i pinisim em long wok, na meri bilong em i lusim em wantaim ol pikinini. Em i beten askim God long kisim helpim, tasol em i pilim olsem i no gat gutpela samting i kamap. Em i laik kilim em yet i dai taim Martín na Miguel, tupela Witnes Bilong Jehova, i nok long dua bilong em. Em i opim dua na tupela i givim em magasin Kirap! Taim em i lukim taitol bilong magasin, em i pilim olsem God i bekim beten bilong em. Martín na Miguel i yusim tok bilong Baibel long mekim isi bel bilong em, na sampela de bihain ol i go bek na luksave olsem dispela man i stap bel isi moa winim long pastaim. Long nau, ol i save stadi wantaim em 2-pela taim long wanpela wik.

Ol Witnes i visitim tu ol haus kalabus long taun Tabasco na bai ol i ken stori long ol tok bilong Baibel we inap helpim ol kalabusman long luksave olsem i gat risen long ol i stap laip. Ol Witnes i redim ol vidio, wanpela tok i kam long Baibel, na ol risen bilong i stap laip em magasin i stori long en. Ol kalabusman na ol wokman bilong haus kalabus i amamas tru long ol dispela visit. Wanpela kalabusman i tok: “Inap 3-pela taim mi bin traim long suasaid. Sampela man i tokim mi olsem God i tingim mi, tasol ol i no bin yusim Baibel long soim olsem tok bilong ol i tru. Ol tok bilong yupela i strongim mi tru.”

Ol man i luksave long gutpela wok bilong dispela kempein. Sekreteri bilong helt i tok amamas long Ol Witnes long hatwok bilong ol long helpim ol manmeri long komiuniti. Wanpela niuspepa bilong dispela taun i kamapim stori bilong dispela kempein na raitim het tok bilong stori olsem “Ol i Go Aut Long Daunim Suasaid.”