Ol Witnes Bilong Jehova i bilip olsem God i save mekim wankain pasin long ol manmeri bilong olgeta kain skin kala na ples. (Aposel 10:34, 35) Long rot bilong Baibel stadi, mipela i helpim ol manmeri long lusim pasin bilong bel nogut long ol man bilong narapela hap.

Na tu, mipela i no sapotim ol grup husat i save kirapim ol manmeri long heitim ol man i gat narapela skin kala o ol man bilong narapela hap. Eksampel, long taim bilong ol lain Natsi, ol Witnes Bilong Jehova long Jemani na long ol narapela hap tu, ol i no sapotim Hitler taim em i mekim kempein long pinisim ol manmeri bilong ol narapela skin kala na narapela hap. Planti handret Witnes i lusim laip bilong ol, long wanem, ol i no insait long dispela kempein.

Wankain samting i kamap long ol Witnes long Ruanda long 1994 taim wanpela grup i kilim ol lain bilong narapela grup. Long dispela taim, sampela Witnes i bin riskim laip na sampela i lusim laip bilong ol taim ol i haitim ol lain we ol birua i wok long painim na kilim.

Mipela i laik helpim ol manmeri bilong olgeta hap, olsem na mipela i wokim na tilim Baibel nius long inap olsem 600 tokples. Na tu, insait long kongrigesen, mipela i welkamim ol manmeri “bilong olgeta kantri na olgeta traib na olgeta lain pipol na olgeta tokples.”​—Revelesen 7:9.