Fifti yia i go pinis, 583 Witnes Bilong Jehova i bin raun i go long olgeta hap bilong graun inap 10-pela wik. Tasol ol i no wanpela lain turis. Namba 1 risen bilong raun bilong ol em long bung wantaim ol narapela Kristen na strongim narapela narapela long kibung “Everlasting Good News” i bin kamap long 1963. Ol deleget i bin raun i go bungim ol Witnes long winim 20 kantri, olsem na ol i kolim ol dispela kibung i kamap olsem Kibung Bilong “Olgeta Hap.”

Nem bilong bikpela tok i bin kamap long dispela kibung em “When God Is King Over All the Earth.” Long planti bilong ol dispela kibung, Nathan Knorr long wol hetkota bilong ol Witnes Bilong Jehova i mekim dispela tok. Em i stori long samting i kamap long graun i wok long i go nogut moa na kamapim klia tok promis bilong Baibel kamapim gen Paradais long graun. Ol manmeri i go long dispela kibung long olgeta hap bilong graun em 580,509.

Kibung i kirap long Milwaukee, Wisconsin, long Amerika. Bihain, ol deleget i go olsem long hap is. Taim kibung i pinis long New York, ol i go long Inglan, Swiden, Jemani, na Itali. Taim ol i go long ol dispela kantri, ol i autim gutnius bilong Baibel long ol manmeri.

Planti asples manmeri i amamas olsem ol Witnes i lusim haptaim long toktok wantaim ol. Wanpela yangpela meri long Stockholm, long Sweden, i tok: “Visit bilong yupela bai stap olsem memori long laip olgeta bilong mi. . . Tru tru yupela i kam longwe hap tru long toktok wantaim mi long bilip bilong yupela long God? Mi laikim tru pasin bilong yupela.”

Tasol ol deleget i bel hevi taim ol i go long Atens, long Grik. Ol bikman bilong ol lotu i putim presa long gavman na gavman i rausim tok orait bilong mekim kibung long Panathinaikos Stadium. Maski i olsem, ol Witnes i strongim bel na ol i no givap. Long pinis long mun Ogas, klostu 10,000 i go long dispela kibung i kamap long ol haus na long kongrigesen.

Bihain long Atens, ol deleget i go long Lebanon, Jordan, Israel, na Saiprus. Ol wanbilip bilong ol i amamas long lukautim ol, na sampela taim ol i mekim pani wantaim. Long Nicosia, long Saiprus, wanpela deleget i stori long samting i kamap long su bilong em: “Olgeta taim mi go bek long haus [bilong ol lain mi stap wantaim ol] na rausim su bilong mi . . . , ol su i no save stap . . . , tasol 5 minit bihain su i save kam bek na stap na ol i polisim na i sain tru!”

Ol laspela kibung i kamap long ol hap bilong Asia na Pasifik. Ol Witnes long India, Bema (nau Mianma), Tailan, Hong Kong, Singapo, Filipins, Indonesia, Australia, Taiwan, Japan, Nu Silan, Fiji, na Korea i lukautim ol deleget na planti tausen asples Witnes. Planti manmeri i stretim sediul bilong ol bilong i go long kibung, tasol man na meri long Yokosuka long Japan husat i mekim tok promis long marit i bin mekim bikpela senis tru. Taim dispela man i askim bos long givim em malolo na bai em i ken go long kibung i kamap long Kyoto, bos i tok ol i save givim taim bilong malolo sapos i gat fiuneral o weding. Olsem na dispela man na meri i mekim disisen long marit paslain liklik long det ol i makim. Tupela i stap long hanimun bilong tupela long dispela kibung!

Dispela raun bilong ol deleget i kam long pinis bilong en long Septemba kibung long Hawaii na California long Amerika. Long Pasadena, California, em laspela kibung na namba bilong ol manmeri i go antap tru winim namba ol i bin ting long en. Olsem na bihain long kibung i pinis, rot i pulap long ol kar. Maski i olsem, wanpela niuspepa i stori olsem wanpela polis i tok “dispela em wanpela bikpela bung i gat planti manmeri moa we ol manmeri i bihainim gut ol lo bilong trefik, na mi no bin lukim kain samting bipo.”

Ol man i tingim yet ol gutpela samting i kamap long dispela kibung. Ol i bin rilisim wanpela referens bilong Baibel long dispela kubung, em bilong en “All Scripture Is Inspired of God and Beneficial,” na ol i yusim yet dispela pablikesen long ol miting bilong ol Witnes Bilong Jehova.

Ol i bin tokaut long nupela singsing long kibung i kamap long New York. Harold King i raitim dispela singsing, em wanpela Witnes husat i lusim kamapim long Saina long 1963. Nem bilong singsing em “From Door to Door.” Harold King i raitim dispela singsing taim em i stap long kalabus, na ol Witnes Bilong Jehova i mekim yet dispela singsing long nau, em ol i trensletim olsem “Long Ol Haus.”

Long nau, kibung bilong ol Witnes Bilong Jehova i no wankain olsem long bipo. Liklik lain manmeri i bung long wanpela liklik ples. Ol i mekim kibung long planti hap so i no gat wok long i go long ol longwe hap bilong insait long kibung. Olsem na dispela i helpim ol lain i kam long kibung long putim gut yau long ol tok i kamap. Winim 7 milion Witnes Bilong Jehova na ol ges bilong ol i save go long ol kibung long olgeta yia. Yu laik joinim mipela long kibung bai kamap long dispela yia? Painim ples bilong kibung i stap klostu long yu.