Planti pablikesen bilong ol Witnes Bilong Jehova i gat ol naispela piksa i gat kala we ol i save putim wantaim ol tok, tasol long bipo i no gat ol kain piksa. Fes nius bilong Zion’s Watch Tower, em ol i wokim long 1879, i no gat ol piksa. Inap planti yia, ol pablikesen bilong yumi i pulap long ol tok, na sampela taim i gat ol piksa long blak na wait.

Planti pablikesen bilong mipela long nau i pulap long ol piksa. Ol atis bilong mipela yet na ol man bilong kisim piksa i save kamapim ol naispela piksa na poto i stap long ol pablikesen bilong mipela em ol i prinim, na tu, long dispela websait. Ol i save skelim gut na mekim wok painimaut na bai ol i wokim ol piksa we inap skulim yumi long ol bikpela samting i kamap long bipo na ol tok i tru bilong Baibel.

Olsem lukim piksa i stap long dispela atikol, em piksa i bin stap long sapta 19 bilong buk “Autim Gut Tru” Tok Bilong Kingdom Bilong God. Piksa i soim Korin bilong bipo. Olsem tok i stap long sapta 18 long buk bilong Baibel long Aposel, aposel Pol i go long bema, o ples kot. Ol man bilong mekim wok painimaut i helpim ol atis long ol infomesen olsem hap ol piksa bilong ston mabol i sanap long en na kala bilong ol dispela ston piksa i stap long hap em ating Pol i go long en bilong lukim Galio. Ol man bilong mekim wok painimaut i givim ol infomesen tu long klos bilong lain Rom i stap long taim bilong ol aposel na bai klos gavana Galio, olsem i stap long namel bilong piksa, i werim i ken soim olsem em man i gat namba. Em i werim longpela waitpela klos bilong ol Rom na i gat pepol bilas long en, na em i pasim su bilong lain Rom em ol i kolim calcei. Ol man bilong mekim wok painimaut i tok long ples kot, ating Galio i sanap na lukluk i go olsem long hap not wes. Ating dispela infomesen i helpim atis long tingim hau em bai penim dispela piksa.

Mipela i save bungim gut ol piksa mipela i kisim long ol wok painimaut na bai mipela i ken yusim gen long bihain. Inap planti yia, mipela i putim ol piksa long ol bikpela envelop na raitim nem bilong ol pablikesen we mipela i bin yusim ol dispela piksa long en. Na mipela i putim ol poto aninit long ol topik we mipela i yusim ol dispela poto long en. Taim mipela i bungim planti bilong ol dispela piksa, nau em i kamap hatwok moa long painim na yusim gen ol dispela piksa.

Long 1991, mipela i pinisim wok bilong kamapim database, em wanpela kain program long kompiuta bilong holim ol piksa. Mipela i kolim dispela olsem Image Services System, nau em i holim winim 440,000 piksa. Mipela i putim ol piksa we mipela i bin yusim long ol pablikesen, na tu, planti tausen poto we mipela bai yusim long ol pablikesen long bihain.

Mipela i raitim planti infomesen—dispela i makim tu taim na ples mipela i bin yusim dispela piksa, nem bilong wan wan lain i stap long piksa, na taim we dispela piksa i makim—long ol dispela piksa. Nau mipela inap hariap long painim ol piksa long taim mipela i redim wanpela nupela pablikesen.

Sampela taim mipela i yusim ol piksa we ol man i kisim bilong salim. Olsem, sapos mipela i laik yusim piksa bilong ol ring bilong planet Saturn long atikol long nius Kirap! Ol lain i save helpim long painim ol piksa bai painim wanpela piksa i stret long yusim na ringim man i gat dispela piksa na askim sapos mipela i ken yusim. Sampela i tingim olsem mipela i mekim wok bilong skulim ol man long Baibel long olgeta hap bilong graun, olsem na ol i givim tok orait long yusim ol piksa na ol i no salim long mipela. Tasol ol narapela i askim mipela long baim o putim liklik toksave long piksa olsem ol dispela piksa i bilong ol. Taim mipela i kisim tok orait long yusim ol dispela piksa, orait nau mipela i yusim long ol pablikesen na putim long kompiuta na bai mipela i ken yusim gen long bihain.

Long nau, sampela pablikesen bilong mipela i gat planti piksa. Olsem, long dispela websait i gat dispela hap Illustrated Bible Stories; i gat planti piksa, na tu, yu ken prinim, i gat ol naispela piksa long ol buklet, olsem Harim Tok Bilong God, em i kamapim ol bikpela poin long liklik tok tasol. Ol dispela pablikesen na ol narapela pablikesen mipela i save prinim na i stap tu long Intenet i tokaut long ol tok bilong Baibel.