Kirap long Julai 2011, ol i mekim nupela edisen bilong Wastaua long tok Inglis na ol i traim dispela senis insait long 1-pela yia. Nau haptaim bilong traim nupela edisen em pinis, na ol i tok orait long wokim tasol nupela edisen bilong Wastaua long ol yia bihain.

Kirap long Janueri 2013, dispela nupela edisen i stap long tokples Frans, Potugal, na Spen.

Ol i wokim nupela edisen bilong helpim ol manmeri i go long miting long tok Inglis long Haus Kingdom tasol Inglis em i no namba wan tokples bilong ol.

Taim ol lain long kongrigesen i kisim fes Wastaua i gat nupela senis long en, planti i salim ol pas i kam bilong tok tenkyu. Wanpela pas i kam long Rebecca long Laibiria, husat i gat 64 krismas na em i no bin go long skul. Em i tok: “Mi lain long rit. Sampela taim mi ritim Wastaua, tasol mi no klia long ol tok bilong en. Mi laikim nupela edisen. Mi kliagut long ol tok bilong en.”

Planti papamama i yusim nupela edisen long helpim ol pikinini long redim Wastaua Stadi, em wanpela miting bilong ol Witnes Bilong Jehova.

Rosemary i mekim bikpela long 3-pela tumbuna pikinini meri. Em i tok: “Mi save hatwok long stadi long Wastaua wantaim 3-pela gel. Mipela i save yusim dikseneri long painim mining bilong planti tok. Mipela i save lusim bikpela haptaim long painim mining bilong ol tok long atikol na ol pikinini i no kisim gut ol poin. Nau mipela i lusim taim long skelim ol skripsa na hau tok bilong ol i stret wantaim skul i kam long atikol.”

Hia em eksampel i soim hau olpela Wastaua i no wankain long nupela edisen bilong Wastaua long tok Inglis. Long stori bilong miting bilong ol aposel bilong Krais long Aposel sapta 15, olpela Wastaua long Inglis i tok: “What followed was, not a mind-numbing theological debate over dry technicalities, but a lively doctrinal discussion.” Nupela edisen bilong Wastaua i tok: “Their meeting was, not a boring religious argument about unimportant details, but an exciting discussion about Bible teachings.”