Long olgeta yia, ol Witnes Bilong Jehova i save wokim ol vidio long kibung bilong ol. Planti bilong ol dispela vidio ol i wokim i stap long Inglis. So olsem wanem ol manmeri husat i go long ol kibung long planti handret tokples inap kliagut long ol dispela vidio long narapela tokples? Long planti bilong ol dispela tokples, ol i rausim ol toktok na saun long ol vidio long Inglis​—ol i edim nupela saun na toktok bilong tokples i go long vidio. Olsem wanem ol dispela vidio i bin helpim ol manmeri i go long ol dispela kibung?

Skelim sampela tok em ol man i no Witnes husat i go long ol kibung long Meksiko na Sentral Amerika i mekim:

• “Mi kliagut long ol tok i kamap long ol dispela vidio na mi pilim olsem mi stap insait long dispela vidio. Mi pilim tru long bel ol tok bilong dispela vidio.”​—Wanpela man i go long kibung long tokples Popoluca, Veracruz, Meksiko.

• “Mi pilim olsem mi stap Iong asples bilong mi, na stori wantaim pren bilong mi we mi kliagut long olgeta samting em i tok. Dispela ol vidio i winim tru ol muvi bikos mi kliagut long olgeta tok.”​—Wanpela man i go long kibung long tokples Nahuatl, Nuevo León, Meksico.

• “Taim mi lukim ol vidio long tokples bilong mi, mi pilim olsem ol man long dispela vidio i wok long toktok long mi stret.”​—Wanpela meri i go long kibung long tokples Chol, Tabasco, Meksiko.

• “Dispela oganaisesen i gat tingting long helpim ol manmeri long kisim save long tokples bilong ol yet. I no gat wanpela oganaisesen i olsem!”​—Wanpela man i go long kibung long tokples Cakchiquel, Sololá, Guatemala.

Ol Witnes Bilong Jehova i no save haiarim ol teknisen o vois ekta na planti taim ol i save rekod long ol rimot ples na ol lokesen we i no gat planti mani, olsem wanem ol i save wokim ol gutpela rekoding?

Long ol yia i go pinis, brens ofis bilong ol Witnes Bilong Jehova long Sentral Amerika i kodinetim wok bilong ol vidio bilong kibung long tokples Spen na 38 tokples bilong ol asples. Sampela 2,500 volantia i helpim dispela wok. Ol teknisen na ol asples trenslesen tim i rekodim ol nupela vidio long brens ofis, long rimot trenslesen ofis, o long ol narapela lokesen we ol i sanapim ol studio bilong sotpela taim tasol. Olgeta tim i rekodim ol vidio long winim 20 lokesen long Belis, Guatemala, Honduras, Meksiko, na Panama.

Em bikpela wok tru na i mas i gat ol samting bilong sanapim ol studio bilong sotpela taim. Ol i yusim ol samting bilong ples na ol blanket na matres bilong wokim ol samting bilong pasim saun.

Planti husat i stap olsem ol vois ekta long tokples bilong ol i no gat planti mani, na ol i mas mekim ol bikpela sakrifais long go long hap em studio i stap long en. Sampela bilong ol i mas lusim 14 aua long go long studio! Wanpela taim, wanpela papa na pikinini man bilong em i wokabaut klostu 8-pela aua long kamap long studio.

Naomi i kamap bikpela long famili we ol i save sanapim ol studio bilong sotpela taim. Em i tok: “Mipela i save luk fowed long dispela wik taim ol i wokim ol rekoding. Papa bilong mi i save wok hat tru long kodinetim dispela wok. Sampela taim, mama bilong mi i save kukim kaikai bilong ol volantia we i gat 30 volantia i stap long wan wan grup.” Long nau, Naomi i volantia long trenslesen ofis long Meksiko. Em i tok: “Mi amamas tru long dediketim taim na laip bilong mi long helpim ol manmeri long harim tok bilong Baibel long tokples bilong ol yet. Mi lukim olsem dispela wok i givim mi bikpela amamas tru.”

Ol kibung bilong ol Witnes Bilong Jehova i save kamap long olgeta yia long olgeta hap bilong graun na olgeta manmeri i ken go long en. Lukim KIBUNG pes long websait long kisim sampela moa infomesen.