1 Tikronika 18:1-17
18 Endzhaku ka sweswo Davhida a dlaya Vafilisita,+ a va hlula, a teka Gati+ evokweni ra Vafilisita ni swimitana leswi swi titshegeke ha wona.
2 Hiloko a hlasela Mowabu,+ kutani Vamowabu va va malandza ya Davhida lama rhwalaka ndzuvo.+
3 Davhida a ya emahlweni a dlaya Hadadezera+ hosi ya Soba+ eHamati+ loko a ri endleleni ya ku ya lawula enambyeni wa Yufrata.+
4 Ku tlula kwalaho, Davhida a n’wi tekela makalichi ya 1 000 ni vagadi va tihanci va 7 000 ni vavanuna va 20 000 lava fambaka hi milenge.+ Davhida a tsema misiha+ hinkwayo ya tihanci ta ku koka makalichi,+ kambe eka tona, a siya tihanci ta ku koka makalichi ta 100.
5 Loko Siriya wa Damaska a fika ku ta pfuna Hadadezera hosi ya Soba,+ Davhida a dlaya vavanuna va 22 000 exikarhi ka Vasiriya.
6 Endzhaku ka sweswo Davhida a veka masocha eSiriya wa Damaska,+ kutani Vasiriya va va malandza ya Davhida lawa ma rhwalaka ndzuvo.+ Yehovha a ya emahlweni a ponisa Davhida kun’wana ni kun’wana laha a a ya kona.+
7 Tlhandlakambirhi, Davhida a teka switlhangu+ swa xirhendzevutana swa nsuku leswi a swi ri swa malandza ya Hadadezera a swi tisa eYerusalema.+
8 Ku sukela eTibihata+ na Kuni, miti ya Hadadezera, Davhida a teka koporo yo tala ngopfu. Solomoni u endle lwandle+ ra koporo ni tiphuphu+ ni swingolongondzwana swa koporo ha yona.+
9 Loko Toyi hosi ya Hamati+ a twa leswaku Davhida u dlaye vandla hinkwaro ra nyimpi ra Hadadezera+ hosi ya Soba,
10 xikan’we-kan’we a rhuma Hadorama+ n’wana wakwe eka Hosi Davhida a ya n’wi pfuxela ni ku n’wi ndhundhuzela hikwalaho ka leswi a lweke na Hadadezera kutani a n’wi dlaya, (hikuva Hadadezera a a leteriwile enyimpini ku lwa na Toyi,) naswona a a ri ni swilo swa mixaka hinkwayo swa silivhere+ ni swa nsuku ni swa koporo.
11 Leswi na swona Hosi Davhida u swi hlawulekisele+ Yehovha swin’we ni silivhere ni nsuku leswi a swi tekeke ematikweni hinkwawo,+ ku suka aEdomu ni ku suka eMowabu+ ni ku suka eka vana va Amone+ ni ku suka eka Vafilisita,+ ni ku suka eka Amaleke.+
12 Loko ku ri Abixayi+ n’wana wa Seruya,+ u dlaye Vaedomu va 18 000, eNkoveni wa Munyu.+
13 Kutani a veka masocha aEdomu, hiloko Vaedomu hinkwavo va va malandza ya Davhida.+ Yehovha a hambeta a ponisa Davhida kun’wana ni kun’wana laha a a ya kona.+
14 Davhida a ya emahlweni a fuma tiko hinkwaro ra Israyele,+ a a hambeta a avanyisa vanhu va yena+ hinkwavo ni ku va endlela swo lulama.
15 Kutani Yowabu n’wana wa Seruya a a lawula vuthu ra nyimpi;+ Yehoxafati+ n’wana wa Ahiludi a a ri mutsari wa timhaka.
16 Sadoki+ n’wana wa Ahithuba na Ahimeleke+ n’wana wa Abiyatara a va ri vaprista, Xavhixa+ a a ri matsalana.
17 Kutani Benaya+ n’wana wa Yoyada+ a a ri mulawuri wa Vakereti+ ni Vapeleti.+ Vana va Davhida a va ri exiyin’weni xo rhanga etlhelo ka hosi.+
