1 Vakorinto 16:1-24
16 Malunghana ni nhlengo+ lowu nga wa vakwetsimi,+ hilaha ndzi leriseke hakona emavandlheni ya Galatiya,+ na n’wina endlani hi ndlela yoleyo.
2 Siku rin’wana ni rin’wana ro sungula evhikini, un’wana ni un’wana wa n’wina a a veke swo karhi etlhelo endlwini ya yena a swi hlayisa, hi ku ya hilaha a fuweke hakona, leswaku ku nga endliwi mihlengo hi nkarhi lowu ndzi nga ta fika ha wona.
3 Kambe loko ndzi fika kwahalano, vanhu van’wana ni van’wana lava mi va bumabumelaka hi mapapila,+ hi vona ndzi nga ta va rhuma leswaku va yisa nyiko ya n’wina ya musa eYerusalema.
4 Hambiswiritano, loko swi fanela leswaku na mina ndzi ya kona, va ta famba na mina.
5 Kambe ndzi ta ta eka n’wina loko ndzi hundze hi le Makedoniya, hikuva ndzi ya hundza hi le Makedoniya;+
6 kumbexana ndzi ta tshama na n’wina, hambi ku ri ku heta vuxika hinkwabyo na n’wina, leswaku mi ta ndzi heleketanyana+ laha ndzi yaka kona.
7 Hikuva a ndzi lavi ku mi vona sweswi ntsena loko ndzi hundza, hikuva ndzi tshemba leswaku ndzi ta tshama na n’wina+ nkarhinyana, loko Yehovha+ a swi pfumelela.+
8 Kambe ndza ha ta tshama aEfesa+ kukondza ku fika nkhuvo wa Pentekosta;
9 hikuva ndzi pfulekeriwe hi nyangwa leyikulu leyi yisaka entirhweni,+ kambe ku ni vakaneti vo tala.
10 Hambiswiritano, loko Timotiya+ a fika, vonani leswaku a nga tshuki a chava exikarhi ka n’wina, hikuva u endla ntirho wa Yehovha,+ kukota mina.
11 Hikokwalaho, ku nga tshuki ku va ni loyi a n’wi langutelaka ehansi.+ N’wi heleketeninyana hi ku rhula, leswaku a ta fika haleno ka mina, hikuva ndzi n’wi rindzile ni vamakwerhu.
12 Loko a ri Apolosi+ makwerhu, ndzi n’wi komberile ngopfu swinene leswaku a ta eka n’wina ni vamakwerhu, kambe a nga swi rhandzanga nikatsongo ku ta sweswi; kambe u ta ta loko a ri ni nkarhi.
13 Tshamani mi hitekile,+ yimani mi tiyile eripfumelweni,+ yanani emahlweni tanihi vavanuna,+ vanani ni matimba.+
14 Timhaka ta n’wina hinkwato a ti endleke hi rirhandzu.+
15 Kutani ndza mi khongotela vamakwerhu: Ma swi tiva leswaku vandyangu wa ka Stefanasi i swirhangana+ swa le Akaya, ni leswaku va tinyiketele ku tirhela vakwetsimi.+
16 Onge na n’wina mi nga hambeta mi titsongahata eka vanhu va muxaka wolowo, ni le ka un’wana ni un’wana loyi a khomisanaka na n’wina ni ku gingiriteka.+
17 Kambe ndza tsaka hi vukona bya Stefanasi+ na Fortunato na Akayiko, hikuva va sive n’wina leswi mi nga riki kona haleno.
18 Hikuva va phyuphyise moya+ wa mina ni wa n’wina. Hikokwalaho, xiyani vanhu va muxaka+ wolowo.
19 Mavandlha ya Asiya ma mi rungula.+ Akhwila na Priska swin’we ni vandlha leri nga endlwini+ ya vona va mi rungula hi mbilu hinkwayo eHosini.
20 Vamakwerhu hinkwavo va mi rungula. Xewetanani hi ku ntswontswana+ ko kwetsima.
21 Hi lawa marungula ya mina Pawulo, lama tsariweke hi voko+ ra mina.
22 Loko munhu a nga ri na xinakulobye eka Hosi, a a rhukaniwe.+ Oho Hosi ya hina, tana!+
23 Onge musa lowu nga faneriwiki wa Hosi Yesu wu nga va na n’wina.
24 Onge rirhandzu ra mina ri nga va na n’wina hinkwenu evun’weni na Kreste Yesu.
