Daniyele 6:1-28
6 A swi vonaka swi ri swinene eka Dariyosi, kutani a veka valanguteri va 120 emfun’weni, lava a va ta va ehenhla ka mfumo hinkwawo;+
2 ehenhla ka vona a veka valawuri vanharhu, Daniyele a ri un’wana wa vona,+ leswaku valanguteri+ lava va hambeta va va nyika xiviko nileswaku hosi yi nga lahlekeriwi.+
3 Daniyele loyi a a tihlawula+ hilaha ku tiyeke eka valawuri ni valanguteri lava, tanihi leswi a a ri ni moya lowu nga tolovelekangiki;+ hosi a yi lava ku n’wi tlakusela ehenhla ka mfumo hinkwawo.
4 Enkarhini wolowo valawuri ni valanguteri a va ya emahlweni va lava ku kuma vukanganyisi byo karhi ku lwa na Daniyele malunghana ni mfumo;+ kambe ku hava vukanganyisi kumbe ku onhaka loku va ku kumeke, tanihi leswi a a tshembekile, naswona ku hava ku honisa kumbe nchumu lowu onhakeke nikatsongo lowu kumekeke eka yena.+
5 Hikwalaho vavanuna lava va tiyeke emirini a va ku: “Eka Daniyele loyi a hi nge byi kumi vukanganyisi nikatsongo, handle ka loko ho byi kuma enawini wa Xikwembu xa yena ku lwa na yena.”+
6 Hikwalaho valawuri lava ni valanguteri va nghena va ri ntshungu ehosini,+ va yi byela va ku: “Wena Dariyosi lowa hosi, hambeta u hanya hilaha ku nga riki na makumu.+
7 Valawuri hinkwavo va mfumo, valawuri lavakulu ni valanguteri, tindhuna ni tindhuna letikulu, va bohe makungu ya ku simeka nawu+ wa vuhosi ni ku sindzisa ku vekiwa ka xipimelo leswaku mani na mani la kombelaka eka xikwembu xin’wana kumbe munhu un’wana ku ringana masiku ya 30, ku nga ri eka wena, Wena hosi, u fanele a hoxiwa ekheleni ra tinghala.+
8 Sweswi, Wena hosi, onge u nga simeka nawu, u sayina marito lama tsariweke,+ leswaku wu nga hundzuriwi, hi ku landza nawu wa Vameda ni Vaperesiya,+ lowu wu nga herisiwiki.”+
9 Hi ku fambisana ni leswi, Hosi Dariyosi a sayina marito lama tsariweke ni ku vekiwa ka xipimelo.+
10 Kambe Daniyele, hi ku hatlisa loko a swi twa leswaku marito lama tsariweke ma sayiniwile, u nghene endlwini yakwe naswona a a pfuleriwe mafasitere lawa ma nga ekamareni rakwe ra le henhla ka lwangu, etlhelo ra le Yerusalema,+ kanharhu hi siku+ a a nkhinsama hi matsolo, a khongela,+ a dzunisa emahlweni ka Xikwembu xakwe,+ hilaha a a hamba a endla hakona emahlweni ka leswi.+
11 Enkarhini wolowo vavanuna lava va tiyeke emirini va hlengeletana kutani va kuma Daniyele a ri karhi a khongela, a kombela tintswalo emahlweni ka Xikwembu xakwe.+
12 Kutani va tshinela, va vulavula emahlweni ka hosi malunghana ni xipimelo xa hosi, va ku: “Xana a xi kona xipimelo lexi u xi sayineke, xa leswaku munhu un’wana ni un’wana loyi a kombelaka eka xikwembu xin’wana kumbe munhu un’wana ku ringana masiku ya 30, ku nga ri eka wena, Wena hosi, u fanele a hoxiwa ekheleni ra tinghala?”+ Hosi yi hlamula yi ku: “Mhaka leyi yi tiyisekisiwile hi ku ya hi nawu wa Vameda ni Vaperesiya, lowu wu nga herisiwiki.”+
13 Hi ku hatlisa va angula, va vula emahlweni ka hosi va ku: “Daniyele,+ loyi a nga wa lava va yisiweke evukhumbini va Yuda,+ a nga ku xiximanga, Wena hosi, hambi ku ri ku xixima xipimelo lexi u xi sayineke, kambe u endla xikombelo xakwe kanharhu hi siku.”+
14 Hikwalaho loko hosi yi twa rito rero, yi nga swi tsakeli nikatsongo,+ kutani yi anakanya hi ku ponisa Daniyele;+ yi hambeta yi tikarhatela ku n’wi kutsula kukondza dyambu ri pela.
15 Eku heteleleni, vavanuna lava va tiyeke emirini va nghena va ri ntshungu ehosini, va byela hosi va ku: “Lemuka, Wena hosi, leswaku nawu wa Vameda ni Vaperesiya wu vula leswaku xipimelo+ kumbe nawu wun’wana ni wun’wana lowu hosi yi wu simekaka a wu fanelanga wu hundzuriwa.”+
16 Hikwalaho hosi yi humesa xileriso, kutani va humesa Daniyele, va n’wi hoxa ekheleni ra tinghala.+ Hosi yi angula Daniyele yi ku: “Xikwembu xa wena lexi u xi tirhelaka nkarhi hinkwawo, xona xi ta ku ponisa.”+
17 Hiloko ku tisiwa ribye, ri vekiwa enon’wini wa khele, kutani hosi yi ri lema hi xingwavila xo fungha ha xona ni hi xingwavila xo fungha ha xona xa tindhuna ta yona, leswaku ku nga hundzuriwi nchumu malunghana na Daniyele.+
18 Enkarhini wolowo hosi yi ya exigodlweni xa yona, yi tshama yi titsona swakudya nivusiku,+ naswona a ku tisiwanga swichayachayana swa vuyimbeleri eka yona, vurhongo bya yona byi yi balekela.+
19 Eku heteleleni, loko vurhonga byi tsuvuka, hosi yi pfuka nimpundzu, yi hatlisa yi ya ekheleni ra tinghala.
20 Loko yi tshinela ekheleni, yi huwelela Daniyele hi rito ro hlunama. Hosi yi vulavula, yi ku eka Daniyele: “Wena Daniyele, nandza wa Xikwembu lexi hanyaka, xana Xikwembu xa wena lexi u xi tirhelaka nkarhi hinkwawo+ xi swi kotile ku ku ponisa etinghaleni?”+
21 Hi ku hatlisa Daniyele a vulavula ni hosi: “Wena hosi, hambeta u hanya hilaha ku nga riki na makumu.
22 Xikwembu+ xa mina xi rhume ntsumi ya xona,+ yi pfala nomu wa tinghala,+ a ti ndzi lovisanga, tanihi leswi ndzi kumekeke ndzi kala nandzu emahlweni ka xona;+ ni le mahlweni ka wena, Wena hosi, a ndzi endlanga nchumu xo biha.”+
23 Hiloko hosi yi tsaka ngopfu,+ kutani yi lerisa leswaku Daniyele a humesiwa ekheleni. Daniyele a humesiwa ekheleni, naswona a a nga vavisekanga nikatsongo, hikuva a a tshembe Xikwembu xakwe.+
24 Hosi yi humesa xileriso, kutani va tisa vavanuna lava va tiyeke emirini lava va hehleke Daniyele,+ ku hoxiwa vona ekheleni ra tinghala,+ vana va vona ni vasati va vona;+ tinghala ti va heta va nga si fika ehansi ka khele, ti pfotlosa marhambu ya vona hinkwawo.+
25 Hiloko Dariyosi lowa hosi a tsalela vanhu hinkwavo, vanhu va matiko ni tindzimi lava a va tshama emisaveni hinkwayo:+ “Onge ku rhula ka n’wina ku nga andza swinene!+
26 Emahlweni ka mina ku humesiwe xileriso+ xa leswaku, eka vulawuri byin’wana ni byin’wana bya mfumo wa mina, vanhu va ta rhurhumela, va chava emahlweni ka Xikwembu xa Daniyele.+ Hikuva i Xikwembu lexi hanyaka, lexi xi tshamaka hilaha ku nga riki na makumu,+ mfumo+ wa xona a wu nge lovisiwi,+ vulawuri bya xona byi tshama hi masiku.+
27 Xa ponisa ni ku kutsula+ ni ku endla swikombiso ni swihlamariso ematilweni+ ni le misaveni,+ hikuva xi ponise Daniyele emarhuveni ya tinghala.”
28 Loko ku ri Daniyele, u humelerile emfun’weni wa Dariyosi+ ni le mfun’weni wa Korexe lowa Muperesiya.+
