Eksoda 9:1-35
9 Hikwalaho Yehovha a byela Muxe a ku: “Yana eka Faro, u n’wi byela u ku,+ ‘Yehovha Xikwembu xa Vaheveru u te: “Tshika vanhu va mina va famba leswaku va ta ndzi tirhela.
2 Kambe loko u hambeta u ala ku va tshika va famba, u hambeta u va khomile,+
3 waswivo, voko+ ra Yehovha ri ta ehenhla ka swifuwo+ swa wena leswi nga enhoveni. Etihancini, etimbhongolweni, etikameleni, entlhambini wa tihomu ni le ntlhambini wa tinyimpfu ku ta va ni ntungu+ lowukulu.
4 Kunene Yehovha u ta endla ku hambana exikarhi ka swifuwo swa Israyele ni swifuwo swa Egipta, a xi kona ni xin’we xa swilo hinkwaswo leswi nga swa vana va Israyele lexi nga ta fa.”’”+
5 Ku tlula kwalaho, Yehovha a veka nkarhi, a ku: “Mundzuku Yehovha u ta endla nchumu lowu etikweni.”+
6 Hikwalaho Yehovha a endla nchumu lowu hi siku leri landzelaka, kutani mixaka hinkwayo ya swifuwo swa Egipta yi sungula ku fa;+ kambe a xi kona ni xin’we xa swifuwo swa vana va Israyele lexi feke.
7 Kutani Faro a rhuma, waswivo, a ku nga fanga ni xin’we xa swifuwo swa Israyele. Hambiswiritano, mbilu ya Faro yi hambeta yi nonon’hwa,+ a nga va tshikanga vanhu va famba.
8 Endzhaku ka sweswo Yehovha a byela Muxe na Aroni a ku: “Tekani nsiti evuhiselweni+ wu tata mavoko mambirhi, Muxe u ta wu tsutsuxela ematilweni Faro a swi vona.
9 Wu ta va mapa ehenhla ka tiko hinkwaro ra Egipta, kutani wu ta hundzuka marhumba lama endlaka swilondza+ eka vanhu ni swiharhi etikweni hinkwaro ra Egipta.”
10 Hikwalaho va teka nsiti wa le vuhiselweni va ya yima emahlweni ka Faro, kutani Muxe a wu tsutsuxela ematilweni, hiloko wu hundzuka marhumba lama endlaka swilondza,+ ma huma vanhu ni swiharhi.
11 Vaprista lava endlaka masalamusi a va swi kotanga ku yima emahlweni ka Muxe hikwalaho ka marhumba, hikuva marhumba a ma hume vaprista lava endlaka masalamusi ni Vaegipta+ hinkwavo.
12 Kambe Yehovha a sihalarisa mbilu ya Faro, a nga va yingisanga, hilaha Yehovha a vuleke hakona eka Muxe.+
13 Hiloko Yehovha a byela Muxe a ku: “Pfuka nimpundzu swinene u ya yima emahlweni ka Faro,+ u ku eka yena, ‘Yehovha Xikwembu xa Vaheveru u te: “Tshika vanhu va mina va famba leswaku va ta ndzi tirhela.+
14 Hikuva eka nkarhi lowu ndzi rhumela makhombo ya mina hinkwawo ku lwa ni mbilu ya wena ni le henhla ka malandza ya wena ni vanhu va wena, ku fikela laha u nga ta tiva leswaku a nga kona la fanaka na mina emisaveni+ hinkwayo.
15 Hikuva hi nkarhi lowu a ndzi ta va ndzi tshambulute voko leswaku ndzi ta ku ba hi ntungu, wena ni vanhu va wena leswaku mi herisiwa emisaveni.+
16 Kambe entiyisweni, ndzi ku hlayise u hanya+ hikwalaho ka xivangelo lexi, hikwalaho ka ku lava ku ku komba matimba ya mina leswaku vito ra mina ri twarisiwa emisaveni+ hinkwayo.
17 Xana wa ha titlakusa eka vanhu va mina hi ku ala ku va tshika va famba?+
18 Mundzuku hi nkarhi lowu ndzi ta nisa xihangu lexikulu ngopfu, a ku si tshama ku na xo fana na xona aEgipta hi mpfhuka ri va kona ku ta fikela sweswi.+
19 Kutani sweswi, rhumela rito leswaku swifuwo swa wena hinkwaswo swi tisiwa laha ku nga ni vutumbelo. Munhu wihi ni wihi ni xiharhi, leswi nga ta kumeka enhoveni swi nga ri endlwini, xihangu+ xi ta swi wela, kutani swi ta fa.”’”
20 Un’wana ni un’wana la chavaka rito ra Yehovha exikarhi ka malandza ya Faro a balekisa malandza ya yena ni swifuwo swa yena etindlwini,+
21 kambe un’wana ni un’wana la nga vekangiki mbilu yakwe leswaku yi xixima rito ra Yehovha, a tshika malandza yakwe ni swifuwo swakwe enhoveni.+
22 Kutani Yehovha a byela Muxe a ku: “Tshambulutela voko+ ematilweni leswaku ku na xihangu+ etikweni hinkwaro ra Egipta, ehenhla ka munhu ni xiharhi ni le ka swimila hinkwaswo swa nhova etikweni ra Egipta.”
23 Hiloko Muxe a tshambulutela nhonga yakwe ematilweni; Yehovha a tisa ku dzindza ni xihangu,+ ndzilo a wu rhelela emisaveni kutani Yehovha a nisa xihangu ehenhla ka tiko ra Egipta.
24 Hikwalaho ku na xihangu, ndzilo wu ri exikarhi ka xihangu. A xi ri xikulu ngopfu lerova a ku si tshama ku va ni xo fana na xona etikweni hinkwaro ra Egipta hi mpfhuka ri va tiko.+
25 Xihangu xi ya emahlweni xi ba tiko hinkwaro ra Egipta. Xihangu xi be hinkwaswo leswi a swi ri enhoveni, ku suka eka munhu ku ya eka xiharhi ni mixaka hinkwayo ya swimila swa nhova; naswona xi tshovelele mixaka hinkwayo ya mirhi ya nhova.+
26 Etikweni ra Goxeni laha vana va Israyele a va ri kona, hi kona ntsena laha ku nga vangiki na xihangu.+
27 Eku heteleleni Faro a rhumela rito leswaku ku vitaniwa Muxe na Aroni, a ku eka vona: “Sweswi ndzi dyohile.+ Yehovha u lulamile,+ kambe mina ni vanhu va mina hi hoxile.
28 Kombelani Yehovha leswaku ku dzindza ni xihangu+ leswi humaka eka Xikwembu, swi va swi ringene. Kutani ndzi tiyimiserile ku mi tshika mi famba, naswona a mi nge he tshami.”
29 Hiloko Muxe a ku eka yena: “Hi ku hatlisa loko ndzi huma emutini ndzi ta tshambulutela mavoko eka Yehovha.+ Ku dzindza ku ta yimisiwa ni xihangu a xi nge he yi emahlweni, u ta tiva leswaku misava i ya Yehovha.+
30 Loko ku ri wena ni malandza ya wena, ana se ndza swi tiva leswaku ni hi nkarhi wolowo a mi nge kombisi ku chava Yehovha Xikwembu.”+
31 Hilaha a swi ri hakona, swimila swa ntsembyana ni maxalana a swi biwile, hikuva maxalana a ma ri ni min’oko kasi swimila swa ntsembyana a swa ha ku baleka swiluva.+
32 Kambe koroni leyi tolovelekeke ni koroni yo tshwuka+ a swi biwanga, hikuva hi ku landza nguva a swi hlwerile.
33 Kutani Muxe a huma emutini a suka eka Faro a tshambulutela mavoko eka Yehovha, hiloko ku dzindza ku yima ni xihangu xi yima, mpfula a yi nanga emisaveni.+
34 Loko Faro a vona leswaku mpfula ni xihangu ni ku dzindza swi yimile, a dyoha nakambe naswona a nonon’hwisa+ mbilu yakwe, yena ni malandza yakwe.
35 Mbilu ya Faro yi hambeta yi sihalala, kutani a nga va tshikanga vana va Israyele va famba, hilaha Yehovha a vuleke hakona ha Muxe.+
