Esaya 19:1-25
19 Ku avanyisiwa ka Egipta:+ Waswivo! Yehovha u khandziye papa leri nga ni rivilo,+ u ya aEgipta. Kunene swikwembu leswi nga pfuniki nchumu swa Egipta swi ta rhurhumela hikwalaho ka yena,+ ni mbilu ya Egipta yi ta n’oka endzeni ka yena.+
2 “Kutani ndzi ta endla leswaku Vaegipta va lwa ni Vaegipta, kunene un’wana ni un’wana u ta lwa ni makwavo, ni un’wana a lwa ni nakulobye, muti wu lwa ni muti wun’wana, mfumo wu lwa ni mfumo wun’wana.+
3 Moya wa Egipta wu ta pfilunganyeka,+ naswona ndzi ta pfilunganya makungu ya yena.+ Hakunene va ta titshega hi swikwembu leswi nga pfuniki nchumu+ ni hi vangoma ni hi swingomatanda ni hi vavhumbhi lavakulu va swiendlakalo.+
4 Kutani ndzi ta nyiketa Egipta evokweni ra mulawuri la karhataka, naswona hosi leyi nga ta va fuma yi ta va yi ri ni matimba,”+ ku vula Hosi ya ntiyiso, Yehovha wa mavuthu.
5 Kunene mati ma ta oma elwandle, ni nambu wu ta phya wu oma.+
6 Kutani milambu yi ta nun’hwa; misele ya Nayili ya Egipta yi ta vohla, yi phya.+ Rihlanga+ ni vungu swi ta vuna.
7 Tindhawu leti nga riki na nchumu ekusuhi ni Nambu wa Nayili, laha Nambu wa Nayili wu sungulaka kona, ni tindhawu hinkwato leti byariweke mbewu eNambyeni wa Nayili, ti ta oma.+ Kunene ti ta susiwa, ti nga ha vi kona.
8 Kutani vaphasi va tinhlampfi va ta rila, ni hinkwavo lava hoxaka swinjovo eNambyeni wa Nayili va ta dyiwa hi mbitsi, ni lava andlalaka tinkoka ta tinhlampfi ehenhla ka vuandlalo bya mati va ta nyamalala.+
9 Kutani lava tirhaka hi ximila xa ntsembyana lexi basisiweke+ va ta khomiwa hi tingana; swin’we ni valuki va mapesa yo basa.
10 Vatirhi vakwe lava lukaka+ va ta pfotlosiwa, wu ta hlunama moya-xiviri wa hinkwavo lava tirhelaka hakelo.
11 Tihosana ta Sowana+ hakunene i swiphukuphuku. Loko ku ri tintlhari ta vatsundzuxi va Faro, kungu ra vona i nchumu lowu nga twaliki.+ Xana n’wina mi ta vurisa ku yini eka Faro mi ku: “Ndzi n’wana wa lavo tlhariha, n’wana wa tihosi ta minkarhi ya khale”?
12 Kutani, ti kwihi—tintlhari ta n’wina+—leswaku ti mi byela sweswi ni leswaku ti tiva xikongomelo xa Yehovha wa mavuthu malunghana na Egipta?+
13 Tihosana ta Sowana ti endle vuphukuphuku,+ tihosana ta Nofu+ ti xisiwile, varhangeri+ va tinyimba takwe va tsendzelekise Egipta.
14 Yehovha u chululele moya wa ku pfilunganyeka exikarhi ka yena;+ naswona va endle leswaku Egipta a tshetsheleka entirhweni wa yena hinkwawo, hilaha la dakweke a tshetshelekelaka emahlanteni yakwe hakona.+
15 Kutani Egipta wu ta pfumala ntirho lowu nga ta endliwa hi nhloko kumbe hi ncila, hi xihluke kumbe hi vungu.+
16 Esikwini rero Egipta u ta fana ni vavasati, kunene u ta rhurhumela,+ a chava loko Yehovha wa mavuthu a tlakusa voko ehenhla ka yena.+
17 Kutani misava ya Yuda yi ta tsekatsekisa Egipta.+ Un’wana ni un’wana loyi a byeriwaka ha yona u ta chava hikwalaho ka xikongomelo xa Yehovha wa mavuthu lexi a xi endlaka ku lwa na yena.+
18 Esikwini rero ku ta va ni miti ya ntlhanu etikweni ra Egipta+ leyi vulavulaka ririmi ra Kanana+ ni leyi hlambanyaka+ eka Yehovha wa mavuthu. Muti wun’wana wu ta vuriwa Muti wo Hirimuxa.
19 Esikwini rero ku ta va ni alitari ya Yehovha exikarhi ka tiko ra Egipta,+ ni phuphu ya Yehovha etlhelo ka ndzilakana wa yena.
20 Kutani yi ta va xikombiso ni vumbhoni eka Yehovha wa mavuthu etikweni ra Egipta;+ hikuva va ta huwelela eka Yehovha hikwalaho ka vatshikileri,+ kutani u ta va rhumela muponisi lonkulu, loyi entiyisweni a nga ta va kutsula.+
21 Kunene Yehovha u ta tiviwa hi Vaegipta;+ naswona Vaegipta va ta tiva Yehovha esikwini rero, va ta endla xitlhavelo ni nyiko+ naswona va ta endla xihlambanyo eka Yehovha kutani va ta xi hetisisa.+
22 Kunene Yehovha u ta twisa Egipta ku vava.+ Ku ta va ni ku twisiwa ku vava ni ku horisiwa;+ kutani va ta tlhelela eka Yehovha,+ yena u ta endla leswaku va kombela eka yena, a va horisa.+
23 Esikwini rero ku ta va ni gondzo lerikulu+ leri humaka aEgipta ri ya eAsiriya, kutani Asiriya u ta ta aEgipta, Egipta yena a ya eAsiriya; kunene va ta tirha, Egipta na Asiriya.
24 Esikwini rero Israyele u ta va wa vunharhu swin’we na Egipta na Asiriya,+ ku nga nkateko exikarhi ka misava,+
25 hikuva Yehovha wa mavuthu u ta va a n’wi katekisile,+ a ku: “Vanhu va mina a va katekisiwe, Egipta, ni ntirho wa mavoko ya mina, Asiriya,+ ni ndzhaka ya mina, Israyele.”+
