Ezra 1:1-11
1 Hi lembe ro sungula ra Korexe+ hosi ya Peresiya, leswaku ku hetiseka rito ra Yehovha leri humaka enon’wini wa Yeremiya,+ Yehovha u pfuxe+ moya wa Korexe hosi ya Peresiya leswaku a huwelela+ emfun’weni wakwe hinkwawo, ni ku tsala,+ a ku:
2 “Korexe hosi ya Peresiya u te,+ ‘Yehovha Xikwembu xa matilo+ u ndzi nyike mimfumo hinkwayo ya misava,+ naswona u ndzi lerise leswaku ndzi n’wi akela yindlu eYerusalema,+ leyi yi nga eYuda.
3 Un’wana ni un’wana la nga kona exikarhi ka n’wina wa vanhu vakwe hinkwavo, onge Xikwembu xakwe xi nga va na yena.+ Xisweswo a a tlhandlukele eYerusalema, leyi yi nga eYuda, a pfuxa yindlu ya Yehovha Xikwembu xa Israyele—i Xikwembu xa ntiyiso+—leyi a yi ri eYerusalema.+
4 Loko ku ri mani na mani loyi a seleke etindhawini leti a luveleke eka tona,+ vanhu va ndhawu yoleyo a va n’wi pfune hi silivhere ni nsuku ni nhundzu ni swifuwo swin’we ni gandzelo ra ku tirhandzela+ ra yindlu ya Xikwembu xa ntiyiso, leyi a yi ri eYerusalema.’”
5 Kutani varhangeri+ va vatata wa Yuda na Benjamini ni vaprista ni Valevhi ni hinkwavo lava moya wa Xikwembu xa ntiyiso wu pfukeke eka vona,+ va tlhandluka va ya pfuxa yindlu ya Yehovha,+ leyi a yi ri eYerusalema.
6 Loko ku ri hinkwavo lava va va rhendzeleke, va tiyise+ mavoko ya vona hi swingolongondzwana swa silivhere, swa nsuku, hi nhundzu ni swifuwo ni swilo swo hlawuleka, handle ka hinkwaswo leswi a va swi endla hi ku tirhandzela.+
7 Nakambe, Hosi Korexe a humesa swingolongondzwana swa yindlu ya Yehovha,+ leswi Nebukadnetsara a swi humeseke eYerusalema+ a swi veka endlwini ya xikwembu xakwe.+
8 Kutani Korexe hosi ya Peresiya a swi humesa swi languteriwa hi Mitiredata mutameri wa xuma ni ku swi hlayela Xexebazara+ ndhuna ya Yuda.+
9 Hi leyi nhlayo ya swona: swibya leswi fanaka ni swirhundzu swa nsuku swa 30, swibya leswi fanaka ni swirhundzu swa silivhere swa 1 000, swibya swin’wana swa le tlhelo swa 29,
10 minkambana+ ya nsuku ya 30, minkambana ya vumbirhi ya silivhere ya 410 ni swingolongondzwana swin’wana swa 1 000.
11 Swingolongondzwana hinkwaswo swa nsuku ni silivhere a swi ri 5 400. Xexebazara+ a swi humesa hinkwaswo, swin’we ni ku humesa vanhu lava a va ri evukhumbini+ le Babilona va ya eYerusalema.
