Levhitika 1:1-17
1 Kutani Yehovha a vitana Muxe a vulavula na yena a ri entsongeni wa nhlangano,+ a ku:
2 “Byela vana va Israyele+ u ku eka vona, ‘Loko munhu un’wana wa n’wina o tshuka a nyikela gandzelo eka Yehovha leri humaka eka swifuwo, mi ta nyikela gandzelo ra n’wina ri huma entlhambini wa tihomu ni le ntlhambini wa tinyimpfu.
3 “‘Loko gandzelo rakwe ku ri gandzelo ro hisiwa+ leri humaka entlhambini wa tihomu, ra nkunzi, leri hanyeke kahle,+ u ta ri nyikela. U ta ri nyikela emahlweni ka Yehovha+ hi ku tirhandzela enyangweni ya ntsonga wa nhlangano.
4 U fanele a tlhandleka voko ehenhla ka nhloko ya gandzelo ro hisiwa, naswona ri fanele ri amukeleka+ hi tintswalo eka yena leswaku ri va ro n’wi kombelela ku rivaleriwa.+
5 “‘Kutani nkunzi leyitsongo yi ta tlhaviwa emahlweni ka Yehovha; naswona vana va Aroni, lava va nga vaprista+ va ta nyikela ngati ivi va xuva ngati ehenhla ka alitari+ leyi nga enyangweni ya ntsonga wa nhlangano, va yi rhendzela.
6 Gandzelo ro hisiwa ri ta yevuriwa naswona ri tsemeleriwa hi swiphemu swa rona.+
7 Kutani vana va Aroni, lava va nga vaprista va fanele va tshivela ndzilo ealitarini,+ va veka tihunyi hi ndlela ya kona endzilweni.+
8 Vana va Aroni, lava va nga vaprista va ta veka swiphemu+ hi ndlela ya kona kutani nhloko ni mafurha ya tinso swi va ehenhla ka tihunyi leti nga endzilweni lowu nga ealitarini.
9 Marhumbu+ ya rona ni manqina ya rona swi ta hlantswiwa hi mati; kutani muprista u fanele a swi mbulukisa hinkwaswo ealitarini swi va gandzelo ro hisiwa, gandzelo leri endliwaka hi ndzilo ri va nun’hwelo lowu phyuphyisaka eka Yehovha.+
10 “‘Loko gandzelo rakwe ra gandzelo ro hisiwa ri huma entlhambini,+ u ta ri nyikela+ ri huma eka makhuna lamatsongo kumbe eka timbuti, ri ri xiphongo,+ ri hanye kahle.
11 Ri fanele ri tlhaviwa emahlweni ka Yehovha etlhelo ka alitari, etlhelo ra le n’walungwini, kutani vana va Aroni, lava va nga vaprista va fanele va xuva ngati ya rona ehenhla ka alitari+ va yi rhendzela.
12 U fanele a ri tsemelela hi swiphemu swa rona ni nhloko ya rona ni mafurha ya rona ya tinso, kutani muprista u ta swi veka hi ndlela ya kona ehenhla ka tihunyi leti nga endzilweni lowu nga ealitarini.+
13 U ta hlantswa marhumbu+ ni manqina+ hi mati; kutani muprista u fanele a ri nyikela hinkwaro, a ri mbulukisa+ ealitarini. I gandzelo ro hisiwa, gandzelo leri endliwaka hi ndzilo ri va nun’hwelo lowu phyuphyisaka eka Yehovha.+
14 “‘Kambe, loko gandzelo rakwe leri ri nga gandzelo leri hiseriwaka Yehovha ri endliwe hi ku tirhisa tinyenyana, u ta nyikela gandzelo rakwe hi magugurhwana+ kumbe hi swituvana.+
15 Muprista u fanele a ri nyikela ealitarini kutani a ri khatlula+ nhloko, a ri mbulukisa ealitarini, kambe ngati ya rona yi ta chuluriwa etlhelo ka alitari.
16 U fanele a susa chelele ra rona ni tinsiva ta rona a ti lahlela etlhelo ka alitari, etlhelo ra le vuxeni, endhawini ya nkuma lowu nga ni mafurha.+
17 U fanele a ri handzula hi le timpapeni ta rona. A nga fanelanga a ri tsema hi le xikarhi.+ Kutani muprista u ta ri mbulukisa ealitarini ehenhla ka tihunyi leti nga endzilweni. I gandzelo ro hisiwa,+ gandzelo leri endliwaka hi ndzilo ri va nun’hwelo lowu phyuphyisaka eka Yehovha.+
