Levhitika 15:1-33
15 Yehovha a ya emahlweni a byela Muxe na Aroni a ku:
2 “Byelani vana va Israyele mi ku eka vona, ‘Loko wanuna wihi ni wihi o tshuka a va ni ndzhundzhwana+ wu huma eka xirho xakwe xa rimbewu, ndzhundzhwana wakwe a wu tenganga.
3 Leswi swi ta n’wi endla a va la nyameke hikwalaho ka ndzhundzhwana wakwe: Ku nga khathariseki leswaku xirho xakwe xa rimbewu xi hume ndzhundzhwana kumbe xirho xakwe xa rimbewu xi kavanyetiwa hi ku huma ka ndzhundzhwana, u ta va a nga tenganga.
4 “‘Sangu rin’wana ni rin’wana leri loyi a nga ni ndzhundzhwana a nga etlelaka eka rona ri ta va leri nga tengangiki, naswona nchumu wun’wana ni wun’wana lowu a nga tshamaka eka wona wu ta va lowu nga tengangiki.
5 Munhu la nga ta khumba sangu rakwe u fanele a hlantswa tinguvu takwe naswona u fanele a hlamba hi mati, a va la nyameke ku fika nimadyambu.+
6 Mani na mani la tshamaka eka xilo lexi a ku tshame loyi a nga ni ndzhundzhwana, u fanele a hlantswa+ tinguvu takwe naswona u fanele a hlamba hi mati, a va la nyameke ku fika nimadyambu.
7 Mani na mani la khumbaka nyama ya loyi a nga ni ndzhundzhwana+ u fanele a hlantswa tinguvu takwe naswona u fanele a hlamba hi mati, kutani a va la nyameke ku fika nimadyambu.+
8 Loko loyi a nga ni ndzhundzhwana o tshuka a tshwutelela un’wana la tengeke, emhakeni yoleyo yena u fanele a hlantswa tinguvu takwe naswona a hlamba hi mati, kutani a va la nyameke ku fika nimadyambu.
9 Xitshamo+ xin’wana ni xin’wana lexi munhu a tshamaka eka xona loko a gade xifuwo, lexi loyi a nga ni ndzhundzhwana a a khandziye eka xona xi ta va lexi nga tengangiki.
10 Kutani mani na mani la nga ta khumba nchumu wihi ni wihi lowu wu nga tshukaka wu va ehansi ka yena u ta va la nyameke ku fika nimadyambu; loyi a nga ta swi rhwala u ta hlantswa tinguvu takwe naswona u fanele a hlamba hi mati, kutani a va la nyameke ku fika nimadyambu.
11 Mani na mani la nga ta khumbiwa hi loyi a nga ni ndzhundzhwana+ loko a nga hlambanga mavoko ya yena hi mati, u fanele a hlantswa tinguvu takwe naswona a hlamba hi mati, a va la nyameke ku fika nimadyambu.
12 Kutani xibya xa vumba lexi nga ha vaka xi khumbiwe hi loyi a nga ni ndzhundzhwana xi fanele xi fayiwa;+ naswona xibya xin’wana ni xin’wana xa ntsandza+ xi fanele xi hlantswiwa hi mati.
13 “‘Loko loyi a nga ni ndzhundzhwana o tshuka a va la tengeke endzhundzwaneni wakwe, u fanele a tihlayela masiku ya nkombo ma va ya ku tengisiwa+ kakwe, kutani u fanele a hlantswa tinguvu takwe naswona a hlamba nyama yakwe hi mati lama khulukaka;+ u ta va la tengeke.
14 Kutani hi siku ra vunhungu u fanele a teka magugurhwana+ mambirhi kumbe swituvana swimbirhi, u fanele a ta emahlweni ka Yehovha enyangweni ya ntsonga wa nhlangano, a swi nyika muprista.
15 Muprista u fanele a swi nyikela, xin’wana xi va gandzelo ra xidyoho kasi lexin’wana xi va gandzelo ro hisiwa;+ muprista u fanele a n’wi kombelela ku rivaleriwa emahlweni ka Yehovha malunghana ni ndzhundzhwana wakwe.
16 “‘Kutani loko wanuna o tshuka a humesa mbewu ya vununa,+ u fanele a hlamba nyama yakwe hinkwayo hi mati, a va la nyameke ku fika nimadyambu.
17 Nguvu yin’wana ni yin’wana kumbe dzovo rin’wana ni rin’wana leswi nga cheriwaka hi mbewu ya vununa swi fanele swi hlantswiwa hi mati, swi va leswi nga tengangiki ku fika nimadyambu.+
18 “‘Loko ku ri wansati loyi wanuna a etlelaka na yena ivi ku huma mbewu ya vununa, va fanele va hlamba hi mati kutani va va lava nyameke+ ku fika nimadyambu.
19 “‘Loko wansati o tshuka a va ni ndzhundzhwana, kutani ndzhundzhwana wa nyama yakwe wu va ngati,+ u fanele a heta masiku ya nkombo hi nkarhi wakwe wa switlhandla+ a nga tenganga,+ mani na mani la n’wi khumbaka u ta va la nyameke ku fika nimadyambu.
20 Nchumu wun’wana ni wun’wana lowu a nga etlelaka eka wona hi nkarhi wakwe wa switlhandla wu ta va lowu nga tengangiki+ ni hinkwaswo leswi a nga tshamaka eka swona swi ta va leswi nga tengangiki.
21 Kutani mani na mani la khumbaka sangu rakwe u fanele a hlantswa tinguvu ta yena naswona u fanele a hlamba hi mati, a va la nyameke ku fika nimadyambu.+
22 Mani na mani la khumbaka xilo xihi ni xihi lexi a a tshame eka xona u fanele a hlantswa tinguvu ta yena naswona u fanele a hlamba hi mati, a va la nyameke ku fika nimadyambu.+
23 Loko ku ri leswaku a a tshame esangwini kumbe eka xilo xin’wana, hi ku xi khumba+ ka yena xi ta va lexi nga tengangiki ku fika nimadyambu.
24 Loko wanuna o etlela na yena kutani ku nyama kakwe hi nkarhi wa switlhandla ku va eka yena,+ u fanele a va la nyameke masiku ya nkombo, sangu rin’wana ni rin’wana leri a nga ta etlela eka rona ri ta va leri nga tengangiki.
25 “‘Malunghana ni wansati, loko ndzhundzhwana wa ngati yakwe wo tshuka wu khuluka masiku+ yo tala loko ku nga ri nkarhi lowu tolovelekeke wa ku nyama kakwe hi nkarhi wa switlhandla,+ kumbe loko o tshuka a va ni ndzhundzhwana wo leha ku tlula nkarhi wa ku nyama kakwe hi nkarhi wa switlhandla, masiku hinkwawo ya ndzhundzhwana wakwe lowu nga tengangiki ma ta fana ni masiku ya ku nyama kakwe hi nkarhi wa switlhandla. U nyamile.
26 Sangu rin’wana ni rin’wana leri a nga etlelaka eka rona emasikwini wahi ni wahi ya ndzhundzhwana wakwe, eka yena ri ta fana ni sangu ra ku nyama+ kakwe hi nkarhi wa switlhandla, naswona xilo xin’wana ni xin’wana lexi yena a nga ta tshama eka xona xi ta va lexi nga tengangiki ku fana niloko yena a nyamile hi nkarhi wa switlhandla.
27 Mani na mani la swi khumbaka+ u ta va la nyameke, u fanele a hlantswa tinguvu takwe naswona a hlamba hi mati, a va la nyameke ku fika nimadyambu.
28 “‘Hambiswiritano, loko o basa endzhundzwaneni wakwe, na yena u fanele a tihlayela masiku ya nkombo kutani endzhaku ka sweswo u ta va la tengeke.+
29 Kutani hi siku ra vunhungu u fanele a teka magugurhwana+ mambirhi kumbe swituvana swimbirhi, u fanele a swi tisa eka muprista enyangweni ya ntsonga wa nhlangano.+
30 Muprista u fanele a endla gandzelo ra xidyoho hi xin’wana ivi a endla gandzelo ro hisiwa+ hi lexin’wana; kutani muprista u fanele a n’wi kombelela ku rivaleriwa+ emahlweni ka Yehovha malunghana ni ndzhundzhwana wakwe lowu nga tengangiki.
31 “‘Mi fanele mi endla vana va Israyele va hambana ni ku nga tengi ka vona leswaku va nga fi eku nyameni ka vona hikwalaho ka ku nyamisa tabernakela ya mina leyi nga exikarhi ka vona.+
32 “‘Lowu i nawu malunghana ni wanuna la nga ni ndzhundzhwana+ ni wanuna loyi a nga tshukaka a hume mbewu ya vununa+ lerova swi n’wi nyamisa;
33 ni wansati la nyameke hikwalaho ka swi switlhandla+ swakwe ni un’wana ni un’wana la nga ni ndzhundzhwana,+ ku nga khathariseki leswaku i waxinuna kumbe i waxisati kumbe loko wanuna a etlela ni wansati la nyameke.’”
