Luka 13:1-35
13 Enkarhini wolowo a ku ri na van’wana lava n’wi vikeleke hi ta Vagaleliya+ lava Pilato a pfanganiseke ngati ya vona ni switlhavelo swa vona.
2 Kutani a va angula a ku: “Xana mi anakanya leswaku Vagaleliya lava va kumeke va ri vadyohi+ lavakulu ku tlula Vagaleliya lavan’wana hinkwavo hikwalaho ka leswi va humeleriweke hi swilo leswi?
3 Ndza mi byela, a swi tano nikatsongo; kambe, loko mi nga hundzuki, mi ta lovisiwa+ hinkwenu hilaha ku fanaka.
4 Kumbe lava 18 lava weriweke hi xihondzo xa Silowama, xi va dlaya, xana mi anakanya leswaku va kumeke va kolota ngopfu ku tlula vanhu lavan’wana hinkwavo lava tshamaka eYerusalema?
5 Ndza mi byela, a swi tano nikatsongo; kambe, loko mi nga hundzuki, mi ta lovisiwa hinkwenu hi ndlela leyi fanaka.”+
6 Kutani a ya emahlweni a hlamusela xifaniso lexi: “Wanuna un’wana a a ri ni murhi wa nkuwa lowu a wu byariwe ensin’wini yakwe ya vhinya,+ ivi a ya lava mihandzu eka wona,+ kambe a nga kumi nchumu.+
7 Kutani a ku eka murimi wa vhinya, ‘Se swi endla malembe manharhu+ ndzi ta lava mihandzu emurhini lowu wa nkuwa, kambe a ndzi kumi nchumu. Wu tseme!+ Kahle-kahle wu tshamela yini kasi a wu pfuni nchumu?’
8 A n’wi angula a ku, ‘N’wini wanga, tlhela u wu tshika+ lembe leri ndzi kondza ndzi cela ematlhelweni ka wona ndzi chela manyoro;
9 kutani loko wu humesa mihandzu enkarhini lowu taka, swi kahle; kambe loko wu nga yi humesi, u ta wu tsema.’”+
10 Kutani a a dyondzisa eka rin’wana ra masinagoga hi savata.
11 Waswivo, a ku ri ni wansati loyi a a ri ni moya+ wa ku tsana ku ringana malembe ya 18, naswona a a govekile a nga swi koti ku ololoka nikatsongo.
12 Kuteloko a n’wi vona, Yesu a vulavula na yena a ku: “Wansati, u ntshunxiwile+ eku tsaneni ka wena.”
13 Kutani a n’wi tlhandleka mavoko; hi ku hatlisa a ololoka,+ a sungula ku vangamisa Xikwembu.
14 Kambe ndhuna leyi ungamelaka sinagoga loko yi angula, yi hlundzukisiwa hileswi Yesu a hanyiseke hi savata, yi byela ntshungu yi ku: “Ku ni masiku ya tsevu lawa ntirho wu faneleke ku endliwa ha wona;+ hikokwalaho tanani ha wona mi ta hanyisiwa, hayi hi siku ra savata.”+
15 Hambiswiritano, Hosi yi n’wi hlamula yi ku: “Vakanganyisi,+ xana un’wana ni un’wana wa n’wina a nga yi ntshunxi hi savata nkunzi kumbe mbhongolo yakwe exivaleni a ya yi nwisa mati?+
16 Kutani, xana a swi nga fanelanga leswaku wansati loyi a nga n’wana wa Abrahama,+ loyi Sathana a n’wi boheke, maswivo, ku ringana malembe ya 18, a ntshunxiwa etimpecaneni leti hi siku ra savata?”
17 Kuteloko a vule swilo leswi, vakaneti vakwe hinkwavo va khomiwa hi tingana;+ kambe ntshungu hinkwawo wu tsakisiwa hi swilo hinkwaswo leswi dzunekaka leswi a swi endleke.+
18 Hikokwalaho a ya emahlweni a ku: “Xana mfumo wa Xikwembu wu fana na yini, naswona ndzi nga wu fanisa na yini?+
19 Wu fana ni ndzoho ya sinapi leyi munhu a yi tekeke a yi byala entangeni wakwe, kutani yi kula yi va murhi, hiloko tinyenyana ta tilo+ ti tshama emarhavini+ ya wona.”
20 Kutani a tlhela a ku: “Xana mfumo wa Xikwembu ndzi nga wu fanisa na yini?
21 Wu fana ni comela, lexi wansati a xi tekeke a xi fihla eka swipimo swinharhu swa mapa ku fikela loko mbila hinkwayo yi kukumuka.”+
22 Kutani a nghena hi muti ni muti ni hi ximutana ni ximutana, a dyondzisa, a ya emahlweni ni riendzo rakwe ro ya eYerusalema.+
23 Kutani munhu un’wana a ku eka yena: “Hosi, xana i vatsongo lava ponisiwaka?”+ A ku eka vona:
24 “Tikarhateni+ hi matimba leswaku mi nghena hi nyangwa yo khuma,+ hikuva ndza mi byela, vo tala va ta lava ku nghena kambe a va nge swi koti,+
25 loko se n’wini wa yindlu a pfukile a lotlela nyangwa, kutani mi yima ehandle mi gongondza enyangweni, mi ku, ‘Nkulukumba, hi pfulele.’+ Ka-mbe u ta mi hlamula a ku, ‘A ndzi swi tivi leswaku mi huma kwihi.’+
26 Kutani mi ta vula mi ku, ‘A hi dya hi tlhela hi nwa emahlweni ka wena, naswona u dyondzisile etindleleni ta hina to anama.’+
27 Kambe u ta mi byela a ku, ‘A ndzi swi tivi leswaku mi huma kwihi. Sukani eka mina, n’wina hinkwenu vaendli va leswi nga lulamangiki!’+
28 Kwalaho hilaha ku rila ni ku getsela ka meno+ ya n’wina ku nga ta va kona, loko mi vona Abrahama na Isaka na Yakobe ni vaprofeta hinkwavo emfun’weni wa Xikwembu,+ kambe n’wina mi cukumeteriwe ehandle.
29 Ku tlula kwalaho, vanhu va ta ta va huma etindhawini ta le vuxeni ni le vupela-dyambu, ni le n’walungwini ni le dzongeni,+ kutani va ta vurhama etafuleni emfun’weni wa Xikwembu.+
30 Kutani, maswivo, ku ni lavo hetelela lava nga ta va vo sungula, naswona ku ni lavo sungula lava nga ta va vo hetelela.”+
31 Enkarhini wowolowo ku ta Vafarisi van’wana, va ku eka yena: “Huma laha u famba, hikuva Heroda u lava ku ku dlaya.”
32 Kutani a ku eka vona: “Fambani mi ya byela mhungubye+ yoleyo mi ku, ‘Waswivo, ndzi hlongola madimona ndzi tlhela ndzi horisa namuntlha ni mundzuku, hi siku ra vunharhu ndzi ta va ndzi hetile.’+
33 Nilokoswiritano, ndzi fanele ku famba namuntlha ni mundzuku ni mundlwana, hikuva a swi amukeleki leswaku muprofeta a lovisiwa ehandle ka Yerusalema.+
34 Yerusalema, Yerusalema, mudlayi+ wa vaprofeta ni loyi a khandlaka+ hi maribye lava rhumiwaka eka yena—hi minkarhi yo tala swonghasi a ndzi lava ku hlengeleta vana va wena hi mukhuva lowu mbhaha wu hlengeletaka ha wona ntlawa wa swiciwana ehansi ka timpapa+ ta wona, kambe n’wina a mi swi lavanga!+
35 Maswivo! Yindlu+ ya n’wina yi tshikeriwa n’wina. Ndza mi byela, a mi nge he ndzi voni kukondza mi ku, ‘U katekile loyi a taka hi vito ra Yehovha!’”+
