Marka 16:1-20
16 Kuteloko savata+ yi hundzile, Mariya Magadala,+ na Mariya mana wa Yakobo, na Salome va xava mirhi yo nun’hwela leswaku va ta n’wi tota.+
2 Nimpundzu swinene hi siku+ ro sungula ra vhiki, va ta eka sirha-bako ra xitsundzuxo, loko dyambu ri tsuvukile.+
3 Naswona a va byelana va ku: “I mani la nga ta hi khunguluxela ribye a ri susa enyangweni ya sirha-bako ra xitsundzuxo?”
4 Kambe loko va languta, va vona leswaku ribye ri khunguluxiwile, hambileswi a ri ri rikulu+ swinene.
5 Loko va nghena eka sirha-bako ra xitsundzuxo, va vona jaha ri tshame etlhelweni ra xinene ri ambale nguvu yo leha yo basa, kutani va tshuka.+
6 Ri ku eka vona: “Mi nga chavi. Mi lava Yesu wa Munazareta, la beleriweke.+ U pfuxiwile,+ a nga kona laha. Maswivo! Hi leyi ndhawu leyi a va n’wi late eka yona.+
7 Kambe fambani, mi ya byela vadyondzisiwa vakwe na Petro mi ku, ‘Wa mi rhangela ku ya eGaleliya;+ mi ta n’wi vona kwale, hilaha a mi byeleke hakona.’”+
8 Kutani loko va humile, va suka hi rivilo eka sirha-bako ra xitsundzuxo, hikuva a va rhurhumela naswona a va tlhavekile etimbilwini. A va vulanga nchumu eka vanhu, hikuva a va chava.+
MAHETELELO YO KOMA
Matsalwa man’wana ya khale ni vuhundzuluxeri swi tamele mahetelelo yo koma endzhaku ka Marka 16:8, ma yimise xileswi:
Kambe swilo hinkwaswo leswi lerisiweke va swi hlamusele hi ku komisa eka lava a va ri na Petro. Ku tlula kwalaho, endzhaku ka swilo leswi, Yesu hi byakwe, a rhumela ha vona ku huweleriwa loku kwetsimaka ni loku nga onhakiki ka ku ponisiwa loku nga riki na ku hela ku sukela evuxeni ku ya evupela-dyambu.
MAHETELELO YO LEHA
Matsalwa man’wana ya khale (ACD) ni vuhundzuluxeri (VgSyc,p) ma engetela mahetelelo lama landzelaka yo leha, kambe lawa אBSysArm yi nga ma nghenisiki:
9 Loko a pfukile nimpundzu hi siku ro sungula ra vhiki u humelele ro sungula eka Mariya Magadala, loyi a hlongoleke madimona ya nkombo ma huma eka yena.
10 A famba a ya vikela lava a va ri na yena, lava a va kolola ni ku rila.
11 Kambe vona, loko va twa leswaku wa hanya naswona u n’wi vonile, a va kholwanga.
12 Ku tlula kwalaho, endzhaku ka swilo leswi, a humelela hi xivumbeko xin’wana eka vambirhi va vona lava a va khomisane ndlela, va ya endhawini ya le makaya;
13 kutani va vuya va vikela lavan’wana hinkwavo. Na vona a va va kholwanga.
14 Kambe endzhaku a humelela eka lava 11 loko va vurhame etafuleni, kutani a sola ku pfumala ka vona ripfumelo ni ku nonon’hwa ka timbilu ta vona, hikuva a va va kholwanga lava n’wi voneke a pfuxiwile eka lava feke.
15 Kutani a ku eka vona: “Yanani emisaveni hinkwayo mi ya chumayela mahungu lamanene eka swivumbiwa hinkwaswo.
16 Loyi a kholwaka a tlhela a khuvuriwa u ta ponisiwa, kambe loyi a nga kholwiki u ta gweviwa.
17 Ku tlula kwalaho, masingita lawa ma ta fambisana ni lava va kholwaka: Hi ku tirhisa vito ra mina va ta hlongola madimona, va ta vulavula hi tindzimi,
18 naswona va ta khoma tinyoka hi mavoko ya vona, loko va nwa nchumu wihi ni wihi lowu dlayaka, va nga ka va nga vaviseki nikatsongo. Va ta va tlhandleka mavoko lava vabyaka, kutani va ta hanya.”
19 Kutani Hosi Yesu, loko a heta ku vulavula na vona, a tlhandlukiseriwa etilweni ivi a tshama evokweni ra xinene ra Xikwembu.
20 Kutani va huma va ya chumayela hinkwako-nkwako, Hosi yi ri karhi yi tirha na vona naswona yi seketela rungula hi masingita lawa a ma fambisana na rona.
