Nahume 2:1-13
2 Loyi a hangalasaka u humelele emahlweni ka xikandza xa wena.+ Onge ndhawu leyi tiyisiweke yi nga hlayisiwa. Langutela ndlela. Tiyisa masenge. Tinyike matimba lamakulu.+
2 Kunene Yehovha u ta hlengeleta ku tinyungubyisa ka Yakobe,+ ku fana ni ku tinyungubyisa ka Israyele, hikuva lava va thangulaka va va thangurile;+ swihluke swa vona va swi onhile.+
3 Xitlhangu xa vavanuna va yena va matimba xi pendiwe xi va xo tshwuka; vavanuna va yena va ntamu lowukulu va ambale nguvu ya xivunguvungu.+ Esikwini leri a lunghekaka ha rona, kalichi ya nyimpi yi nghenisiwe mabawuti ya nsimbi yo kotisa ndzilo, naswona mafumu ya murhi wa yunipa+ ma tsekatseka.
4 Makalichi ya nyimpi ma tshamela ku tsutsuma ma nga lawuleki eswitarateni.+ Ma tshamela ku ya ehansi ni le henhla emintsendzeleni. Ma languteka ku fana ni swisana. Ma tshamela ku tsutsuma ku fana ni tindlati.+
5 U ta tsundzuka vanhu va yena lavakulu.+ Va ta khunguvanyeka loko va famba.+ Va ta hatlisela erirhangwini ra wona, kutani rihlampfu ri fanele ku simekiwa ri tiya.
6 Kunene tinyangwa ta milambu ti ta pfuriwa, ni xigodlo xi ta hela.
7 Xi yimisiwile; wu fununguriwile; kunene wu ta tekiwa,+ vanhwanyana va yena lava nga mahlonga va ta va ni xiviti, ku fana ni mpfumawulo wa matuva,+ ma tshamela ku tiba timbilu.+
8 Kutani Ninivha, ku sukela emasikwini ya ku va kona ka yena,+ a a fana ni xidziva xa mati;+ kambe va baleka. “Yimani mi nga fambi! Yimani mi nga fambi!” Kambe a nga kona loyi a tlhelaka.+
9 Phangani silivhere; phangani nsuku;+ hikuva swilo leswi hleriweke a swi pimiwanga. Ku ni ntsengo lowukulu wa swilo leswi navelekaka swa mixaka hinkwayo.+
10 Vuhava ni ku pfumala nchumu, ni muti lowu wu mbundzumuxiweke!+ Kutani mbilu ya n’oka,+ matsolo ma gudlagudla,+ masenge hinkwawo ma ni switlhavi leswikulu;+ loko ku ri swikandza swa vona hinkwavo, swa chava.+
11 Byi kwihi byetlelo bya tinghala, ni bako ra swinghalana swa ntshiva, laha nghala yi fambeke kona, yi nghena,+ laha n’wana wa nghala a a ri kona, ku nga ri na munhu loyi a a va chavisa?+
12 Nghala a yi handzulela leswi ringaneke swinghalana swa yona, naswona a yi dlayela tinghala ta yona ta matswele. A yi tshama yi tate makhele ya yona hi nyama ni tindhawu ta yona ta ku tifihla ti tele swiharhi leswi handzuleriweke.+
13 “Waswivo! Ndzi lwa na wena,” ku vula Yehovha wa mavuthu,+ “ndzi ta hisa kalichi ya wona ya nyimpi hi ndzilo.+ Kutani banga ri ta lovisa swinghalana swa wena swa ntshiva.+ Xiharhi lexi u xi khomeke ndzi ta xi lovisa emisaveni, rito ra varhumiwa va wena a ri nge he twakali.”+
