Nehemiya 5:1-19
5 Hambiswiritano, ku va ni nkosi+ lowukulu wa vanhu ni vasati va vona hikwalaho ka vamakwavo va Vayuda.+
2 A ku ri ni lava a va ku: “Vana va hina va majaha ni va vanhwanyana ha va nyiketa va va xitiyisekiso leswaku hi kuma mavele hi dya, hi ya emahlweni hi hanya.”+
3 Naswona a ku ri ni lava a va ku: “Masimu ya hina ni masimu ya hina ya vhinya ni tindlu ta hina ha swi nyiketa swi va xitiyisekiso+ leswaku hi kuma mavele hi nkarhi wa ku kayivela ka swakudya.”
4 Naswona a ku ri ni lava a va ku: “Hina hi lombe mali leswaku yi va ndzuvo+ wa hosi emasin’wini ya hina ni le masin’wini ya hina ya vhinya.+
5 Sweswi nyama ya hina yi fana ni nyama ya vamakwerhu;+ vana va hina va fana ni vana va vona, kambe sweswi hi endla vana va hina va majaha ni va vanhwanyana va va mahlonga,+ ku ni vana va hina van’wana va vanhwanyana lava ana va nga mahlonga; naswona a hi na matimba emavokweni ya hina loko masimu ya hina ni masimu ya hina ya vhinya ma ri ya van’wana.”
6 Hiloko ndzi hlundzuka ngopfu loko ndzi twa xirilo xa vona ni marito lawa.
7 Kutani mbilu ya mina yi sungula ku ehleketa, ndzi vona va ri ni xihoxo+ vanhu va xiyimo xa le henhla ni vafumi lava nga khomela, ndzi ku eka vona: “Mi sindzisa ku bindzula,+ un’wana ni un’wana eka makwavo.”
Tlhandlakambirhi, ndzi va hlelela nhlengeletano leyikulu.+
8 Kutani ndzi ku eka vona: “Hina hi kutsule+ vamakwerhu va Vayuda lava a va xavisiwe eka va matiko, hi endle hinkwaswo leswi a swi ri ematimbeni ya hina; hi nkarhi lowu fanaka, xana n’wina mi nga xavisa vamakwenu,+ xana va fanele va xaviseriwa hina?” Hiloko va miyela, a va kumanga rito.+
9 Kutani ndzi ya emahlweni ndzi ku: “Nchumu lowu mi wu endlaka a hi wunene,+ mi ta va mi nga chavi+ Xikwembu+ loko mi famba hikwalaho ka ndzhukano+ wa matiko, valala va hina?+
10 Na mina, vamakwerhu ni vatirhi va mina va lombisa mali ni mavele hi ntswalo exikarhi ka vona. Ndzi kombela leswaku hi tshika ku lombisa hi ntswalo.+
11 Esikwini leri ndzi kombela mi va tlherisela masimu ya vona,+ masimu ya vona ya vhinya, mitlhwari ya vona ni tindlu ta vona, ni xiphemu xa dzana xa mali ni mavele, vhinyo leyintshwa ni mafurha, leswi mi swi tekaka hi ku sindzisa swi ri mbuyelo lowu humaka eka vona.”
12 Hiloko va ku: “Hi ta swi tlherisela,+ naswona a hi nge kombeli nchumu eka vona.+ Hi ta endla hi ku pakanisa hilaha mi vulaka hakona.”+ Kutani ndzi vitana vaprista ndzi va hlambanyisa leswaku va endla hi ku landza rito leri.+
13 Ndzi tlhele ndzi dzudza nguvu ya mina leyi nga exifuveni ndzi ku: “Onge Xikwembu xa ntiyiso xi nga n’wi dzudza hi ndlela leyi a huma endlwini ya xona ni le ndhawini ya xona leyi kumiweke, un’wana ni un’wana la nga ri hetisisiki rito leri; hi mukhuva lowu a a dzudziwe a sala a nga ri na nchumu.” Hiloko nhlengeletano hinkwayo yi ku: “Amen!”+ Kutani va sungula ku dzunisa Yehovha.+ Vanhu va endla hi ku landza rito leri.+
14 Nchumu wun’wana: Ku sukela esikwini leri a ndzi leriseke leswaku ndzi va ndhuna-nkulu+ etikweni ra Yuda, ku sukela elembeni ra vu-20+ ku ya elembeni ra vu-32+ ra Atazekiseki+ lowa hosi, malembe ya 12, mina ni vamakwerhu a hi xi dyanga xinkwa xa ndhuna-nkulu.+
15 Loko ku ri tindhuna-nkulu to sungula leti veke kona mina ndzi nga si va kona, ti tikisele vanhu, ti hambete ti teka silivhere ya tixikele ta 40 ya xinkwa ni vhinyo. Ni vatirhi va tona va tshikilele vanhu.+ Loko ku ri mina, a ndzi endlanga hi ndlela+ yoleyo hikwalaho ka ku chava Xikwembu.+
16 Ku tlula kwalaho, ndzi nghenise xandla entirhweni wa rirhangu leri,+ naswona a hi tekanga nsimu;+ vatirhi va mina hinkwavo va hlengeletane kwalaho leswaku va tirha.
17 Kutani Vayuda ni vafumi lava nga khomela, vavanuna lava ringanaka 150, lava a va ta eka hina va huma eka matiko lawa ma hi rhendzeleke, a va ri etafuleni ra mina.+
18 Loko ku ri leswi a swi lunghiseleriwa siku ni siku, nkunzi yin’we, tinyimpfu ta tsevu leti hlawuriweke, ni tinyenyana a swi lunghiseleriwa mina, kan’we emasikwini hinkwawo ya khume, vhinyo+ yo tala ya mixaka hinkwayo. Naswona a ndzi xi koxanga xinkwa xa ndhuna-nkulu hikuva ntirho lowu a wu ri ehenhla ka vanhu lava a wu tika.
19 Oho Xikwembu xanga,+ ndzi tsundzuke hi vunene,+ hinkwaswo leswi ndzi swi endleleke vanhu lava.+
