Sofaniya 3:1-20
3 Khombo eka loyi a xandzukaka, loyi a tinyamisaka, muti lowu wu tshikilelaka!+
2 A wu ri yingisanga rito;+ a wu yi amukelanga ndzayo.+ A wu n’wi tshembanga Yehovha.+ A wu tshinelanga eka Xikwembu xa wona.+
3 Tihosana ta wona exikarhi ka wona a ti ri tinghala leti vombaka.+ Vaavanyisi va wona a va ri timhisi ta nimadyambu leti ti nga phorhangiki marhambu ku fikela nimixo.+
4 Vaprofeta va wona a va tikurisa, a va ri vanhu va vuxengi.+ Vaprista va wona va nyamise leswi a swi ri swo kwetsima; va endle madzolonga enawini.+
5 Yehovha a a lulamile exikarhi ka wona;+ a a nga swi endli leswi swi nga lulamangiki.+ Mixo wun’wana ni wun’wana a a hambeta a humesa xiboho xakwe xa vuavanyisi.+ A xi pfumalekanga ninhlikanhi.+ Kambe loyi a nga lulamangiki a a nga ri na tingana.+
6 “Ndzi dlaye matiko; swihondzo swa wona swa le yinhleni swi hundzuke rhumbi. Ndzi onhe switarata swa wona, lerova a ku vanga na munhu loyi a tsemakanyaka eka swona. Miti ya wona yi endliwe marhumbi, lerova a ku nga ri na munhu, a ku nga ri na muaki.+
7 Ndzi te, ‘Hakunene u ta ndzi chava; u ta amukela ndzayo’;+ leswaku vutshamo bya wona byi nga tshuki byi lovisiwa+—hinkwaswo sweswo ndzi fanele ndzi wu tengisa ha swona.+ Entiyisweni va hatlise va onha mintirho ya vona hinkwayo.+
8 “‘Hikokwalaho tshamani mi ndzi languterile,’+ ku vula Yehovha, ‘ku fikela esikwini leri ndzi nga ta yima ha rona ndzi phanga,+ hikuva xiboho xa mina xa vuavanyisi i ku hlengeleta matiko,+ leswaku ndzi hlengeleta mimfumo, ndzi chululela xigwevo xa mina ehenhla ka wona,+ ku hlundzuka ka mina hinkwako lokukulu; hikuva misava hinkwayo yi ta herisiwa hi ndzilo wa ku hiseka ka mina.+
9 Hikuva enkarhini wolowo ndzi ta endla leswaku vanhu va hundzukela eka ririmi leri tengeke,+ leswaku hinkwavo va vitana vito ra Yehovha,+ va n’wi tirhela hi mbilu yin’we.’+
10 “Ku suka exifundzheni xa milambu ya Etiyopiya lava va ndzi kombelaka, ku nga n’wana wa nhwanyana wa vanhu va mina lava hangalasiweke, u ta ndzi tisela nyiko.+
11 Esikwini rero a wu nge khomiwi hi tingana hikwalaho ka mintirho ya wena hinkwayo leyi u tluleke nawu wa mina ha yona,+ hikuva enkarhini wolowo ndzi ta susa lava va khanaka hi ku titlakusa exikarhi ka wena;+ a wu nge he tlheli u titlakusa entshaveni ya mina yo kwetsima.+
12 Kunene exikarhi ka wena ndzi ta siya vanhu lava va titsongahataka, lava va tivekaka ehansi,+ entiyisweni va ta tumbela evitweni ra Yehovha.+
13 Loko ku ri lava va seleke va Israyele,+ a va nge swi endli leswi swi nga lulamangiki,+ kumbe va vulavula mavunwa,+ naswona ririmi ra mano+ a ri nge kumeki emilon’wini ya vona; hikuva va ta dya kutani va etlela va nava,+ a ku nge vi na munhu loyi a va chavisaka.”+
14 Huwelela hi ku tsaka, Wena nhwanyana wa Siyoni! Bana xivuvutana,+ Wena Israyele! Tsaka, u khana hi mbilu hinkwayo, Wena nhwanyana wa Yerusalema!+
15 Yehovha u suse vuavanyisi ehenhla ka wena.+ U hlongole nala wa wena.+ Yehovha, hosi ya Israyele, u le xikarhi ka wena.+ A wu nge he ri chavi khombo.+
16 Esikwini rero ku ta vuriwa leswi eka Yerusalema: “U nga chavi, Wena Siyoni.+ Mavoko ya wena ma nga tshuki ma lelemela.+
17 Yehovha Xikwembu xa wena u le xikarhi ka wena. U ta ponisa, leswi a nga Lowa matimba.+ U ta khana ha wena hi ku tsaka.+ U ta miyela erirhandzwini ra yena. U ta tsaka ha wena hi ku huwelela ka ku tsaka.
18 “Kunene ndzi ta hlengeleta lava va nga ni gome,+ lava nga riki kona enkarhini wa wena wa ntsako; a va vanga kona eka wena,+ hikwalaho ka ku byarha ndzhukano wa yena.+
19 Waswivo, ndzi teka goza ku lwa ni hinkwavo lava va ku xanisaka, enkarhini wolowo;+ loyi a khutaka ndzi ta n’wi ponisa,+ loyi a hangalasiweke ndzi ta n’wi hlengeleta.+ Ndzi ta va veka va va ku dzuneka etikweni hinkwaro ra tingana ta vona.
20 Enkarhini wolowo ndzi ta mi nghenisa, enkarhini lowu ndzi mi hlengeletaka ha wona. Hikuva ndzi ta mi endla mi va ni ndhuma ni ku dzuneka exikarhi ka vanhu hinkwavo va misava, loko ndzi tlhela ndzi hlengeleta lava va nga makhumbi eka n’wina emahlweni ka mahlo ya n’wina,” Yehovha u vurile.+
